Provérbios 3 - Biblia en Guaraní - ?anderuete ?e’? Por? 2015

Umi okyhyjéva Ñanderuetégui ojehovasáta

1Che ra’y, aníke nderesarái che rembiapoukapýgui, eñongatu uvei nde py’apýpe che rekombo’e,

2upéicharõ tekove puku ha heta áño py’aguapy reheguáva omyenyhẽta nde rekove.

3Ani reñemboyke pe poriahuverekógui ni pe añeteguágui; eñapytĩke umía nde ajúra rehe ha ehaíke nde py’apýpe avei,

4péicharõ rejohúta py’aporã ha rembovy’áta Ñanderuetépe ha nde rapichakuérape avei.

5Ejeroviáke nde py’aite guive Ñanderuete rehe, ha ani rejejoko ne arandu rehe.

6Nemandu’áke hese opaite nde rape rehe, ha Ha’e omyesakãta ne raperã.

7Anína ere nearanduha; ekyhyjéke Ñanderuetégui ha eñemboyke mba’evaígui,

8péva ningo pohã añeteguáva nde retépe g̃uarã, ha piro’y ne kanguekuérape g̃uarã.

9Emomba’éke Ñanderuetépe ne mba’e rupi ha ne ñemitĩngue’a ypykue rupi;

10upéicharamo nde róga henyhẽta koga’águi ha nde parral rakã’a omyenyhẽta ne mba’yru vínogui.

11Aníke ndepochy, che ra’y, Ñanderuete ndehavira ramo ha aníke ndekuerái hekombo’égui;

12Ñanderuete ningo ohavira pe ohayhúvape, pe túva ohavira háicha ita’ýra ohayhúvape (oipotágui oguatá porã).

13Ovy’aite upe tapicha ojohúva arandu ha ohupitýva akãguapy;

14umía jahupity ramo iporãve plátagui ha umía jaguereko ramo iporãve órogui.

15Hepyeteve ita vera hepývagui; ha opaite mba’e ikatúva guive reipota, ndaikatúi ñambojoja hesekuéra.

16Tekove puku oĩ ijakatúa gotýo; ha ijasu gotýo oĩ mba’erepyeta ha terakuã porã.

17Hapekuéra ningo nembopy’a rory ha hape po’ikuéra nembopy’aguapýta.

18Ha’ehína yvyra oporomoingovéva umi hese oñemomba’évape g̃uarã, ha ovy’a iterei umi oñemomba’etévape hese.

19Arandupópe Ñanderuete ojapo ypyva’ekue ko yvy ha akãporãme omohendava’ekue yvagakuéra.

20Ikuaapy rupi umi yvu osẽ yvy pypukuetégui, ha áragui omondyky ysapy.

21Che ra’y, ejepy’amongeta porã ha eiporu arandu añeteguáva, ko’ã mba’e ani remboyke nde resa renondégui.

22Umía oikóta jeguaka ramo nde ajúrare g̃uarã ha ne ánga oikoveva’erã.

23Upéicha reikova’erã kyhyje’ỹme nde rape rehe, ha nde py noñepysãngamo’ãi.

24Reñeno vove, nderekyhyjemo’ãi, ha reñeno rire reke porãta.

25Nderekyhyjemo’ãi pe jehasa asýgui, ni mba’evaiguasúgui oúva tekove iñañáva ári.

26Ñanderuete ningo oñangarekóta nderehe ha Ha’e ndohejamo’ãi re’a peteĩ ñuhãme.

27Aníke reñemboykétei oikotevẽvagui, nde, ikatu guive, eipytyvõ ichupe.

28Aníke erétei nde rapichápe: Tereho, ha eju jevy, ha ko’ẽrõ ame’ẽta ndéve; reme’ẽkuaa ramo ko árape, eme’ẽ katu ichupe.

29Aníke reñeha’ã rejapo hag̃ua mba’e ivaíva nde rapicha oikóva rehe nde ykére.

30Ani reiko vai avave ndive, ndojapói guive nderehe mba’e ivaietéva.

31Ani reikótei umi imbaretéva oiko háicha, ha ani reiporavótei hapekuéra.

32Ñanderuete ndohayhúi iñañávape, Ha’e katu oĩ umi heko potĩva ndive.

33Ñanderuete maldicion ningo oĩ pe tekove ñañáva ndive, Ha’e katu ohovasava’erã umi heko potĩvape.

34Añetehápe Ha’e oñembohoryva’erã umi toryja apoha rehe, umi heko ñemomirĩvape katu ome’ẽva’erã mba’eporã.

35Umi iñarandúva ohupityva’erã terakuã porã, umi ivýrova katu oñemotĩva’erã katuete.