1Uperire ajesaupi ha ama’ẽ porãvo, ahecha peteĩ kuimba’e oguerekóva ipópe peteĩ sã oha’ã hag̃ua.
2Ha che ha’e ichupe: Moõ piko reho. Ha ha’e he’i chéve: Aháta Jerusalénpe aha’ã hag̃ua ipykue ha ipukukue.
3Ha upéi osẽ ohóvo pe yvága rembiguái, oñe’ẽva’ekue chendive, ha ojohu ambue yvága rembiguáipe,
4ha he’i ichupe: Eñani, ha ere ko kuimba’épe, oguerekóva ipópe pe sã: Jerusalen opytáta kora yvate’ỹre, hetaitereíta kuimba’e, kuñakuéra ha tymbakuéra oikotavahína ipype.
5Ñanderuete katu he’i: Che aikóta ichupekuéra g̃uarã peteĩ kora yvate ijerekuévo tataguiguáva ramo, ha Che aikóta ijapytépe che reko jajaipáva reheve.
6Angái, angái, pya’éke pekañy pe tetã yvateoguágui, he’i pende Ruete, Che voi pomosarambipava’ekue umi ára umívape irundyve yvytu rehe.
7Nde Sion, reikóva Babilónia retãme, ekañýke.
8Péicha he’iuka ángel atykuéra Jára: Che añorãirõta che reko jajaipa rehehápe, ha Ha’e chemondóta umi tetã nemondapava’ekuépe, ha’e hag̃ua: Umi opokóva che retãyguakuéra rehe, opoko hesa ra’ỹitee rehe.
9Péina ápe Che añorãirõta hendivekuéra, ha ijarakuégui oikóta hembiguairã, ha upérõ peikuaáta ángel atykuéra Jára chembou hague.
10Pepurahéi ha pevy’aitéke peẽ, Jerusalenguakuéra, péina ápe Che ajúta ha aikóta pende apytépe, he’i pende Ruete.
11Ha heta tetã ojoajuva’erã pende Ruete ndive upe ára upévape, ha oikóta hikuái avei che retã ramo, ha Che aikóta ijapytepekuéra, upéramo peikuaáta ángel atykuéra Jára chembou hague pene rendápe.
12Ha Ñanderuete oguereko jevýta Judápe imba’etee ramo ijyvy jeporavopyrépe, ha oiporavóta Jerusalénpe imba’etee ramo.
13Opaite tetãyguakuéra tokirirĩ Ñanderuete renondépe, Ha’e opu’ãmagui osẽ hag̃ua hekoha porãitégui.
Who We AreWhat We EelieveWhat We Do
2025 by iamachristian.org,Inc All rights reserved.
