1Nde, ore Ruete, oupa ningo ambue tetãnguéra Israel rendápe, omongy’a hikuái nde rogaguasúpe, oity Jerusalen rogakuéra, ha oheja nde táva peteĩ yty atyguasu ramo.
2Ne rembiguaikuéra retekue ome’ẽ hikuái yryvúpe hembi’urã ramo; ha heko potĩva ro’okue ome’ẽ umi mymba ñarõme.
3Ha’ekuéra oñohẽ huguykue ýicha Jerusalen jerekue rehe, ha avave noñotỹséi ichupekuéra.
4Oremotĩ umi tetãgui ore jere rupi oikóva guive, oñembohory ha opuka hikuái orerehe.
5Araka’e pevépa, Nde, ore Ruete ndepochýta orendive, tatáicha hendy nde py’aro.
6Eñohẽ nde pochy umi tetã ndekuaa’ỹva ári, ha nde réra ohenoi’ỹva ári.
7Sarambiguasu ojapo hikuái Jacóbogui, ha nde rogaguasu ombotaperepa hikuái.
8Ani nemandu’átei ore ypykue ñaña reko rehe, pya’e tou nde poriahuvereko orejohu hag̃ua, ore py’a ningo ikangypáma.
9Orepytyvõmína, Nde, ore Ruete, oreguenohẽ ore jejopy vaígui nde réra rehehápe, ha eperdona ore rembiapo vaikue nde réra rayhupápe.
10Mba’érehe piko umi ojerovia’ỹva he’íta: Moõ piko oime Ijára. Emyengovia ore resakuéra renondépe orerayhu’ỹva rembiapo vai oñohẽ haguére hikuái ne rembiguaikuéra ruguy.
11Tog̃uahẽ ne renondépe umi iñapytĩháme oikóva pyahẽ asy, ha nde pyapy mbaretépe eipytyvõ umi ojejukasévape.
12Nde, ore Ruete, emyengovia 7 jevyve ore retã ykeregua rembiapo vai, ha’ekuéra oñembohory haguére nderehe.
13Ha ore, ne retãtee, ore nde ovechakuéra ñu megua, opaite ára ore romomba’eguasúta, ore ypykuéra guive ore ñemoñarenguéra jevy peve, ndéve ore rogueropurahéita.
Who We AreWhat We EelieveWhat We Do
2025 by iamachristian.org,Inc All rights reserved.
