Apostolkuéra 13 - Biblia en Guaraní - ?anderuete ?e’? Por? 2015

Bernabe ha Sáulo oho omoherakuã Hesu Crísto evangélio

1Antioquía pegua iglésiape oĩ ko’ã proféta ha mbo’ehára: Bernabe, Simon, hérava avei kamba Lúcio, peteĩ Cireneygua, Manaen, oñembohekomiva’ekue mburuvicha Heródes ndive, imitãrusu arakuérape, ha Sáulo.

2Ha’ekuéra oñembyaty oajuna (ojeko’akúpe) ha omomba’eguasu hag̃ua Ñanderuetépe, pe Pytu Porãmbáva katu he’i ichupekuéra: Pemboyke chéve g̃uarã Bernabe ha Sáulope pe tembiaporãme che ame’ẽmava’ekuépe ichupekuéra.

3Upérõ oajuna ha oñembo’e rire omoĩ hikuái ipo hi’arikuéra, ha omondo ichupekuéra omombe’u hag̃ua Hesu Crísto evangélio.

4Upéicha pe Pytu Porãmbáva omondo Bernabe ha Sáulo Seléuciape, ha upégui omondo ichupekuéra bárcope Chíprepe.

5Ha og̃uahẽvo Salamínape omombe’u Hesu Crísto evangélio Judayguakuérape opaite Ñanderuete rogakuérape oĩva guivépe upérupi; Juan, hérava avei Márcos, omoirũ ichupekuéra ipytyvõhára ramo.

6Ha’ekuéra ohasapa pe ísla Chípre tuichakue rupi Páfos peve, ha upépe ojohu hikuái peteĩ paje apohára, peteĩ proféta japu, ha’e ningo peteĩ Judaygua hérava Barjesus.

7Ko Barjesus oĩ Chípre ruvicha ndive, hérava Sérgio Páulo, kóva peteĩ kuimba’e iñakã porãva. Ko Sérgio Páulo ohenoiuka Bernabe ha Sáulope ohendu hag̃ua Hesu Crísto evangélio.

8Pe paje apohára Barjesus, ojehérova avei Ipu’akáva, oñemoĩ katu Bernabe ha Sáulo rehe, ndoipotáigui Sérgio Páulo ojerovia Hesu Crísto rehe.

9Upérõ Sáulo, hérava avei Páblo, henyhẽ Pytu Porãmbávagui, oma’ẽ porã pe paje apohára rehe ha he’i ichupe:

10Nde, tekove japu ha iñañáva, aña ra’y, oñemoĩva opaichagua heko peguáva rehe, nderepoimo’ãi piko nde reko ñaña ombyaisévagui Ñanderuete rape porã.

11Upévare Ñanderuete po oĩ nde’ári, ha neresatũta heta ára anive hag̃ua rehecha pe kuarahy. Upevovete ho’a hi’ári pytũ ha pyhare, ha oguatapa reívo oheka peteĩ oisãmbyhyva’erãva, ichupe ndohechavéigui opytávo.

12Ha pe Chípre ruvicha, Sérgio Páulo, ohechávo umi mba’e ojehuva’ekue ojerovia Hesu Crísto rehe, ha ohecharamo pe evangélio.

Páblo ha Bernabe oho Antioquía Pisídia peguápe

13Páblo ha iñirũnguéra oho bárcope Páfosgui Pérge peve, opytáva Panfília departaméntope, Juan katu nomoirũsevéima ichupekuéra ha ojevy Jerusalénpe.

14Ha’ekuéra oho Pérgegui Antioquíape, opytáva Pisídia departaméntope, ha sábado árape oike hikuái Ñanderuete rógape, oñembyatyhápe Judayguakuéra, ha oguapy hikuái.

15Ha omoñe’ẽ rire Ñanderuete ñe’ẽ umi omyakãva pe cúlto he’i hikuái Páblo ha Bernabépe: Peẽ, ore ryvykuéra, peñe’ẽse ramo pemokyre’ỹ hag̃ua ñane retãyguakuérape peñe’ẽ katu.

16Upérõ Páblo opu’ã ha ohupívo ipo okirirĩmba hag̃ua he’i ichupekuéra: Kuimba’e Israelguáva, ha peẽ ambuekuéra pekyhyjéva avei Ñanderuetégui, pejapysakamína che ñe’ẽ rehe:

17Israel Jára oiporavova’ekue ñande ypykuérape, ha ijyva mbarete rupi omopu’ã ha oguenohẽ ichupekuéra Egípto retãgui,

18ha 40 áño pukukue oñangareko hesekuéra desiértope heta paciéncia ha mborayhu reheve.

19Ha’e ohundi 7 tetãnguérape Canaánpe ome’ẽ hag̃ua Israelguakuérape ijyvy imba’eteéva ramo, ha péva hi’are 450 áño rupi,

20upéi ome’ẽ Israelguakuérape mbojovakehára oisãmbyhy hag̃ua ichupekuéra, pe proféta Samuel peve.

21Upéi Israelguakuéra ojerure asy avei peteĩ tetã ruvicháre ha Ñanderuete ome’ẽ ichupekuéra Saul, Cis ra’ýpe, peteĩ kuimba’e Benjamin tríbugui, 40 áño pukukue ha’e oisãmbyhy Israélpe.

22Ha oñemboyke rire Saúlpe Israel guapyhaguasúgui, Ñanderuete omopu’ã Davídpe, hetã ruvicha ramo, ha Ha’e he’i hese: Che ajohu David, Isai ra’ýpe, peteĩ kuimba’e oñembopy’apeteĩva chendive, ha’e ojapopáta che rembipota.

23David ñemoñarenguéra apytégui Ñanderuete omoingo Hesúpe osalva hag̃ua Israelguakuérape, iprofetakuéra he’i haguéicha.

24Hesu renonderãme og̃uahẽmava’ekue Juan Bautísta omyasãi hag̃ua Israelguakuérape pe bautísmo ojevy hag̃ua Ñanderuete rendápe.

25Juan ojapopa rire hembiapo oporandu: Mávapa peẽ peimo’ã che ha’eha. Che ningo ndaha’éi pe Crísto. Che rire katu Ha’e oúta, ha ndaijái chéve ajora hag̃ua isapatu sãnte jepe.

26Che ryvykuéra, Abraham ñemoñare ra’ykuéra ha peẽ pekyhyjéva Ñanderuetégui, peẽme g̃uarã oñembou ko Hesu Crísto evangélio.

27Umi oikóva Jerusalénpe ha imburuvichakuéra ndoikuaaséi ramojepe Hesu Crístope, Ha’e ojapopa umi ñe’ẽ oje’éva guive hese profetakuéra juru rupi ha omoñe’ẽva sábado arakuérape Ñanderuete rogakuérape.

28Ndojohúi ramojepe hikuái mba’eve ivaíva Hesu rekovépe, ojerure asy Pilátope ojukauka hag̃ua ichupe.

29Ojapopávo hikuái umi mba’e ojehaiva’ekue Hesu rehe, omboguejy hetekue kurusúgui omoĩ hag̃ua peteĩ itakuaguasúpe.

30Ñanderuete katu omoingove jevy Hesúpe omanova’ekue apytégui.

31Ha uperire Hesu ojehechauka heta ára umi omoirũva’ekuépe ichupe Galiléa guive Jerusalen peve, umíva ko’ág̃a Hesu rechahare hetãyguakuérape g̃uarã.

32Ha ore ningo romombe’u peẽme Hesu Crísto evangélio oñeprometeva’ekue ñande ypykuérape,

33ha pe promésa péva ojehúma, Ñanderuete ohaiuka haguéicha: Nde ningo che Ra’y, ko ára kóvape che romoingo, (Salmokuéra 2,7).

34Ñanderuete omoingove jevy ichupe omanova’ekue apytégui ani hag̃ua hetekue oñembyai, Ha’e he’imava’ekue ko’ã ñe’ẽ rupi: Che katuete ame’ẽva’erã peẽme umi promésa Che ha’eva’ekue Davídpe, (Isaías 55,3).

35Upévare Ha’e he’i avei: Nderehejamo’ãi nde reiporavopyre retekue oñembyai.

36Añetehápe David ojapo Ñanderuete rembipota, omanóvo katu hetekue oñeno ijypykuéra ndive ha oñembyai avei.

37Pe tetekue Ñanderuete omoingove jevymava’ekue omanova’ekue apytégui katu noñembyaíri.

38Che ryvykuéra peẽ peikuaa porã hag̃ua oñemoherakuã avei Hesu Crísto evangélio peẽme oñeperdona hag̃ua pene rembiapo vai Hesu Crísto rupi. Moises rembiapoukapy rupi avave ndaikatúi ohupity pe salvacion,

39Hesu Crísto rupínte oimeraẽ ojeroviáva guive hese ojesalvava’erã.

40Pema’ẽ porãke, ani hag̃ua ojehu peẽme umi mba’e umi proféta ohaiva’ekuére:

41Pema’ẽ porãke, peẽ pemboykéva Ñanderuete rembiapo, ha peñembohorýva hese, cháke, peẽ peñemondyiva’erã ha peñehundiva’erã, Che ajapótagui peteĩ tembiapo peẽ ndapegueroviáitava, oñemombe’u ramojepe peẽme che rembiaporã, (Habacuc 1,5).

42Ha Páblo ha Bernabe osẽvo Ñanderuete rógagui, ha’ekuéra ojerure ichupekuéra ou jevy ha omombe’uve hag̃ua ambue sábado árape.

43Opa rire pe cúlto heta Judayguakuéra ha tetã ambueygua omoirũ Páblo ha Bernabépe. Páblo ha Bernabe omokyre’ỹ ichupekuéra ojeroviaite hag̃ua Hesu Crísto rehe.

44Ambue sábado haimete opaite tavayguakuéra oñembyaty jevy ohendu hag̃ua Ñanderuete ñe’ẽ.

45Heta Judaygua katu henyhẽ py’a rasýgui ohechávo hetaiterei tetã ambueygua oñembyaty hague, upévare oñemoĩ Páblo ha Bernabe rehe, oñembohory ha oñe’ẽ vai hesekuéra.

46Páblo ha Bernabe katu oñe’ẽ kyhyje’ỹre ha he’i: Peẽme oñemombe’u raẽva’erã Hesu Crísto evangélio, peẽ ningo ndapejeroviaséigui ha pemboykégui ko evangélio ndapehupitymo’ãi pe tekove tapia g̃uarãva, ha upévare ore romombe’u tetã ambueyguakuérape.

47Ñanderuete voi he’iuka oréve: Che amoĩ Hesu Crístope tesape ramo opaite tetãnguérape g̃uarã yvy pahaite peve, ha’ekuéra ojesalva hag̃ua (Isaías 49,6).

48Ko’ã ñe’ẽ ombovy’a tetã ambueyguakuérape, ha opaite Ñanderuete ohenoiva’ekue oikove tapia hag̃ua ojeroviágui Hesu Crísto rehe.

49Ha Hesu Crísto evangélio oñemombe’u opaite tetã tuichakuépe.

50Umi Judayguakuéra katu oñe’ẽ umi kuñakarai imba’e hetávape ha okyhyjéva avei Ñanderuetégui ha oñe’ẽ avei umi karaiguasuvéva ndive oñemoĩ hag̃ua Páblo ha Bernabe rehe, upévare umía omosẽ Páblo ha Bernabépe hekohágui.

51Páblo ha Bernabe katu oityvyro pe yvy timbo ipy reheguáre ha upéi oho pe táva Icóniope.

52Ha Páblo ha Bernabe henyhẽ torýgui ha Pytu Porãmbávagui.