Salmokuéra 69 - Biblia en Guaraní - ?anderuete ?e’? Por? 2015

David oñembo’e ojejopy jave David purahéi liriokuéra (yvoty) reheguáva

1Nde, ore Ruete, cheguenohẽmína umi ýgui, ojupímagui che ajúra peve.

2Añapymi’aína karugua (tuju vai) pypukúpe, ha ndaikatúi añembo’y huguápe, ha’áma yeta hugua’ỹvape, ha pe ysyry chejaho’ipapotaitéma.

3Chekane’õma ahenói haguére, che ahy’o hasypáma, ikangypáma che resakuéra oha’ãrõva che Jára pytyvõre.

4Cherayhu’ỹva hetave che akã raguégui, ipu’akapave umi cherehe ija’e’ỹva, umi chehundiséva reiete og̃uahẽ che rendápe. Ha he’i hikuái amyengovia’arãha umi mba’e che namondaiva’ekue.

5Ñanderuete, Nde ningo reikuaa porã che rembiapo vaikue, ha che jejavy nokañýi ndehegui.

6Ore Ruete anítei cherupi avave umi ojeroviáva nderehe opia nde rapégui, anítei cherupi avave ohundi pe esperánza umi nderekaséva apytégui, Nde ningo yvága atykuéra Jára iporãitéva, Ñanderuete ipu’akapáva.

7Nderehe chemboyke hikuái ha ñemotĩ oñu’ã che rova.

8Tetã ambueygua ramo aiko che pehẽnguekuéra apytépe, ha ojekuaa’ỹva ramo apyta che sy membykuéra apytépe.

9Cherakate’ỹ haguére nde rogaguasu rehe chepytupa, ha pe ñembohory oñembohasáva ndéve g̃uarã, chénte ahupitypáva.

10Che rasẽme aipy’apy che ánga karuve’ỹme, ha upeichavéramo jepe cheja’o hikuái.

11Ha añemonde ao vosakuépe, ahechauka hag̃ua añembyasyeteha, ha’ekuéra katu oñembohory cherehe.

12Umi cherehe oñe’ẽ vaíva oguapy pe táva rokẽguasúpe (mbojovakehára rendápe) ha umi oka’úva oñembohory cherehe ipuraheikuérape.

13Che katu añembo’e’aína ndéve, che Ruete, pe hóra nde reipotahápe. Nde, che Ruete, cherendumíkena ha ehechaukamína nde poriahuvereko ha ne pytyvõ añeteguáva.

14Cherenohẽmína pe karuguágui, anítei añapymi, chepe’amína uvei cherayhu’ỹva pógui ha avei pe y pypukúgui.

15Anítei chejaho’ipa umi yeta hatã osyrýva, ha anítei pe karugua chemokõ, ha ani reheja pe yvykua juru oñemboty cheári.

16Chembohovaimína, ore Ruete, nde py’aporã rupi ha nde poriahuvereko rupi ema’ẽmína cherehe.

17Aníkena reñomítei nde rova ne rembiguáigui, ajepy’apyetereígui, pya’emína cherendu.

18Eñemoag̃uína che ánga rehe, ha chepytyvõmína chepe’a hag̃ua cherayhu’ỹva pógui.

19Nde ningo reikuaa porã ha’ekuéra chemboyke ha cherehe oñemoĩ hague ha upéi oñembohory avei cherehe, opaite oñemoĩva cherehe Nde voi reikuaa.

20Pe ñemotĩ chepy’ambyai, ha che añembyasyeterei. Aha’ãrõ oĩ ramog̃uarã cheporiahuverekóva ha chemoangapyhykuaáva, ndaipóri katu avave.

21Ha che rembi’úpe omoĩ hikuái ponzónã, ha chey’uhéi ramog̃uarã chemboy’uka hikuái mba’erópe.

22 Imesakuéra toiko henondepekuéra ñuhã ramo ha imba’eporãva ñepysãngaha ramo.

23Taiñypytũ hesakuéra ohechave’ỹ hag̃uáicha ha humbykuéra toryrýi tapia g̃uarã.

24Eñohẽ hi’arikuéra nde pochy, ha nde py’aro tohupity ichupekuéra.

25Taitaperepa hogaguasukuéra, ha anítei avave oikove hogakuérape.

26Ha’ekuéra omuñave pe nde rehavirávape ha oñembohory hikuái pe Nde rembuepotívape.

27Embohetave hembiapo vai iñañáva reko ári ha araka’eve ndohupitymo’ãi hikuái nde justícia.

28Tojepe’apa herakuéra pe jeikove kuatiañe’ẽgui, ha herakuéra ani ojehai umi heko potĩva apytépe.

29Che ajepy’apy ha cherasypa, Nde, che Ruete, cheguenohẽmína che jejopy vaígui ne pytyvõ rupi.

30Puraheipópe amomba’eguasu ore Ruete réra, ha ambotuichase ichupe che ñe’ẽ porã rupi,

31kóva ombovy’avéta Ñanderuetépe aikuave’ẽ rãngue peteĩ tóro ra’yrusu hatĩ ha ipysãpẽvagui.

32Umi ojejopýva ohecha ramo upéva ovy’a joáta. Peẽ pehekáva Ñanderuetépe, peñemokyre’ỹ jevy pende py’apýpe.

33Ñanderuete ohendúgui umi imboriahuetereívape, ha nomboykemo’ãi umi oñeñapytĩvape.

34Tomomba’eguasu ichupe yvagakuéra ha pe yvy, yguasukuéra, ha opaite mba’e ipype oku’éva guive.

35Ñanderuete oipytyvõta Sion ha umi táva Judápe oĩva guive omopu’ãmba jevýta, ha oiko jevyva’erã hikuái upépe, ha oñemomba’e jevýta ijyvytee rehe.

36Umi hembiguái ñemoñare opyta jevýta ijyvyteépe, ha umi ohayhúva guive Ñanderuetépe oikóta ipype.