Éxodo 35 - Biblia en Guaraní - ?anderuete ?e’? Por? 2015

Pytu’uha ára rembiapoukapy

1Moises ohenoiuka opaite Israel ñemoñarenguéra peteĩ atyguasúpe ha he’i ichupekuéra: Ko’ã mba’e Ñanderuete he’iva’ekue ojejapo hag̃ua:

2 Seis ára oñemba’apova’erã ha pe ára 7-ha oñemboykeva’erã Ñanderuetépe, Ha’e opytu’úgui avei pe ára pévape; oimeraẽ omba’apóva pe ára pévape omanova’erã katuete.

3Ndapejatapyiva’erã mamove pende rekohápe pe jepytu’uha árape.

Israelguakuéra ogueru hemime’ẽ óga jojohuhápe g̃uarã

4Ha Moises oñe’ẽve opaite, Israel ñemoñarenguéra ijatýva guivépe, ombohasa hag̃ua umi ñe’ẽ Ñanderuete he’iva’ekue ojejapo hag̃ua:

5Pemboyke pende apytégui pene me’ẽmby Ñanderuetépe g̃uarã; mayma ipy’aporãva ogueruva’erã Ñanderuetépe: Óro, pláta, brónce,

6aorã (paño) hovýva, pytãva, pytãũva, líno inimbo porãva, kavara rague,

7ovecha ra’yrusu pirekue oñemopytãmbyréva, vaka ypegua pirekue, yvyra acácia,

8 acéite tataindyenda ohesape hag̃ua, mba’e ryakuã porãva, acéite oñemona hag̃ua ha pe mba’e ryakuã asýva ojehapy hag̃ua,

9ita vera pytãva ha ambue ita vera oñemoĩva’erã pa’i póncho mbyky rehe ha ipyti’a voko rehe.

Oñemopu’ã pe óga jojohuha

10Mayma iñakã porã ha iñarandúva guive pende apytépe ouva’erã ojapo hag̃ua opaite mba’e Ñanderuete he’iva’ekue guive ojejapo hag̃ua:

11Pe óga jojohuha ijape ha itápia reheve, ty’ãinguéra (gáncho), itábla, hi’ýva pukukuéra, horconguéra ipyendakuéra reheve;

12karameg̃ua ha hi’yvakuéra yvyraguigua ha pe karameg̃ua juru mbotyha, umi aosãingo hóga pegua ojepysova’erã tenonde.

13Pe mesa hi’ýva pukukuéra ha opaite hembiporukuéra, ha pe pan hi’ári oñemõiva’erã,

14pe tataindyenda ohesapeva’erã ha hembiporukuéra, hemiendynguéra ha acéite pe tataindyenda ohesape hag̃ua;

15pe kuave’ẽmby renda ári ojehapy hag̃ua mba’e hyakuã porãva ha hi’yvakuéra, pe acéite omona hag̃ua, pe mba’e ryakuã asýva, pe aosãingo pe óga jojohuha rokẽ rehe g̃uarã;

16kuave’ẽmby renda ojehapyhápe umi kuave’ẽmby, iparrílla bronceguiguáva, hi’ýva pukukuéra, opaite hembiporukuéra, pe yenda ipykuéra reheve,

17pe aosãingo korapy rehe g̃uarã, horconguéra ha ipyendakuéra, pe aosãingo pe korapy rokẽ rehe g̃uarã.

18Umi óga poste’i, ikorapy postekuéra ha isãnguéra,

19umi Levigua aokuéra omba’apo hag̃ua Ñanderuete rógape, umi pa’i guasu ao Aarónpe g̃uarã ha umi pa’i ao ita’ýrape g̃uarã.

Tetãyguakuéra ogueru hemime’ẽmby

20Ha Israel ñemoñarenguéra osẽmba rire Moises renondégui.

21Ha ou mayma kuimba’e iñe’ẽ, opokova’ekue ipy’apy rehe, ha maymaite umi hi’ángapýpe ome’ẽseva’ekue ogueru ime’ẽmby Ñanderuetépe g̃uarã, ojejapopa hag̃ua pe óga jojohuha, hembiporukuéra reheve ha umi ao ojeporúva pe óga jojohuha rembiapópe.

22Péicha umi kuimba’e ha kuñakuéra ipy’aporãva ou ogueru hag̃ua ijajuriguakuéra, inamichãinguéra, ikuãirũ, ipyapy reheguáva (brazaléte) ha opaichagua jeguaka oroguiguáva; ha ome’ẽmba umi mba’e oroguiguáva Ñanderuetépe g̃uarã ime’ẽmby ramo.

23Mayma kuimba’e oguerekóva aorã hovy, pytã, pytãũ, líno inimbo porãva, kavara rague, ovecha ra’yrusu pirekue oñemopytãmbyréva, térã vaka ypegua pirekue, ogueru joa hikuái.

24Maymavéva ome’ẽséva ipláta térã brónce togueru Ñanderuetépe g̃uarã ime’ẽmby ramo; ha mayma oguerekóva yvyra acácia, togueru ojejapopa hag̃ua umi tembiapopyrã.

25Avei opaite kuña iñakã porã ha iñarandúva guive ha oipovãva ipópe togueru ipovãmbyre; paño hovýva, pytãva, pytãũva térã líno inimbo porãva.

26Ha maymaite kuña, omba’aposéva guive toipovã kavara rague.

27Umi mburuvicha ogueru ita vera pytã ha ambue ita ombojegua hag̃ua pa’i póncho mbyky ha ipyti’a voko,

28ha umi mba’e ryakuã porã, pe acéite tataindyenda ohesape hag̃ua, pe acéite omona hag̃ua ha pe mba’e ryakuã asýva.

29Umi Israel ñemoñarenguérava guive, taha’e kuimba’e térã kuña, opavave ipy’aporãva guive togueru ime’ẽmby Ñanderuetépe g̃uarã, Ha’e he’i haguéicha Moiséspe ojejapo hag̃ua.

Oñehenói Bezaleel ha Aholiábpe hembiaporãme

30Ha Moises he’i Israel ñemoñarenguérape: Pema’ẽ, Ñanderuete ohenói Bezaleel, Uri ra’ýpe, Hur ra’yre, Juda tríbugui,

31ha omyenyhẽ ichupe Ipytu Porãitégui, omoarandu ha ombokatupyry hag̃ua ichupe opaichagua mba’e apópe.

32Ojapo porã hag̃ua opaichagua tembiaporã óro, pláta habronceguiguáva,

33omba’apo hag̃ua ita oñeñoñava’erã (omoinge) yvyra rehe ha ojapo hag̃ua opaichagua tembiapo katupyrýpe oñekotevẽva guive.

34Bezaleel ha Aholiábpe, Ahisamac ra’y, Dan tríbu pegua oñeme’ẽ arandu Ñanderuetégui;

35ikatupyryete hag̃ua opaichagua tembiapo iporãvape ha ombojeguaka hag̃ua aorã (páño) hovýva, pytãva, pytãũva, líno inimbo ha opaichagua ao apópe, ojapokuaa hag̃ua hikuái avei opaichagua ambue tembiapo ha ta’ãnga.