1Upéi David he’i ipy’apýpe: Ipahápe peteĩ árape Saul chejukáta; ndaipóri chéve g̃uarã ambue pohã, tahánte Filisteaygua retãme, anive hag̃ua Saul oñeko’õi cherehe, ha anive hag̃ua chereka Israel retã tuichakuépe, ha upéicha nda’amo’ãi ipópe.
2Upéicha David opu’ã ha oho, umi 600 kuimba’e oĩva hendive, Aquis, Maoc ra’y, Gat retã ruvicha rendápe,
3Ha David oiko Aquis ndive Gátpe, ha’e, iñirũnguéra, opaite hogayguakuéra ha mokõive hembireko ndive, Ahinoam, Jisreelgua, ha Abigail, Nabal, pe Carmel pegua rembirekore.
4Ha Saúlpe oñemombe’u David okañy hague Gátpe, upévare ha’e ndohekavéi ichupe.
5Ha David he’i Aquíspe: Oime ramo ha’a porã nde resa renondépe, toñeme’ẽ chéve aiko hag̃ua oimeraẽva tava’ípe. Mba’érehe piko ne rembiguái oikóta nendive pe távape tetã ruvicha oikohápe.
6Ha pe árape Aquis ome’ẽ ichupe Siclag, oiko hag̃ua upérupi, upévare Siclag opyta Judaygua retã ruvicha mba’érõ ko ára kóva peve.
7Upéicha David oiko Filisteaygua retãme, peteĩ áño ha irundy jasy.
8David ha iñirũnguéra oho jepi ojeity hag̃ua umi Gesurgua, Gezergua ha Amalecguakuéra ári; ko’ãva ymaite guivéma oiko pe tetãme, Shur rape guive Egípto retã rembe’y peve.
9Ha David ombyai umi tetã, ndohejái hekove reheve kuña ni kuimba’e; ha oguerahapa ijovecha, ivaka, ibúrro, icaméllo ha ijaokuéra ha oho jevy jepi Aquis retãme.
10Ha Aquis oporandu jepi: Mamo rupípa reikóra’e ko ára peve. Ha David he’i jepi ichupe: Juda yvy gotýo, térã Jerameel yvy gotýo, térã Cenguakuéra yvy gotýo.
11David ndohejái hekove reheve kuimba’e ni kuña ani hag̃ua ou Gátpe, omombe’u hag̃ua: Ko’ã mba’evai David ojapóva. Péicha voi ojepokuaa hikuái oiko aja pukukue Filisteaygua retãme.
12Ha Aquis oguerovia Davídpe ha he’i ipy’apýpe: Ha’e ohasa asýgui hetã Israélpe, opytáta tapia che rembiguái ramo.
Who We AreWhat We EelieveWhat We Do
2025 by iamachristian.org,Inc All rights reserved.
