1Ha ojehu ohasávo pe ambue áño, umi ára tetã ruvichakuéra osẽ hag̃ua ñorãirõme, Joab oguenohẽ isoldádo aty tuichakue ha ohundi Amon ñemoñarenguéra yvy, ha ou omongora Raba. Ha David opyta Jerusalénpe; ha Joab oity Raba ha ombyai.
2Ha David ojapyhy Raba retã ruvicha akã jeguaka (coróna) ipohýiva 33,5 kílo oroguigua, ha pévare ningo oñemoĩ avei ita vera hepýva; ha oñemoĩ David akã rehe. Ha oguenohẽ avei pe távagui heta mba’eporã ojehejava’ekue.
3Oguenohẽ avei umi tavaygua oĩva ipype, ha omomba’apouka oikytĩ hag̃ua yvyra siérrape térã háchape ha ojoka hag̃ua ita, ha peichaite David ojapo avei opaite ambue Amon ñemoñarenguéra tavayguakuéra rehe. Ha David ojevy opaite hetãyguakuéra ndive Jerusalénpe.
Kuimba’ekuéra David poguypegua ojuka kuimba’e ijyvatetévape (gigántepe)4Ko’ã mba’e rire oiko jevy ñorãirõ Gézerpe, Filisteayguakuéra ndive; ha Sibecái, peteĩ Husatgua, ojuka Sipáipe, peteĩ umi kuimba’e ijyvatetéva ñemoñare apytégui; ha omotĩ ichupekuéra.
5Oiko jevy ñorãirõ Filisteayguakuéra ndive; ha Elhanan, Jair ra’y, ojuka Lahmi, Goliat ryvýpe, peteĩ Gatgua ijyvyra puku akua ýva ojoguáva aorã pyahaha yvyra apu’ápe.
6Ha oiko jevy ñorãirõ Gátpe, upépe oĩkuri peteĩ kuimba’e ijyvateitéva, ha’e 6 ikuã ha 6 ipysã, oñondivepa 24; ha’e avei umi kuimba’e ijyvatetéva ñemoñare.
7Ko kuimba’e kóva oñe’ẽ vai Israel rehe, ha Jonatan, Simea ra’y, David ryke’y ojuka ichupe.
8Ko’ã kuimba’e ijyvatetéva ñemoñare oiko Gátpe, ho’ava’ekue David ha hembiguaikuéra po rupi.
Who We AreWhat We EelieveWhat We Do
2025 by iamachristian.org,Inc All rights reserved.
