Isaías 32 - Biblia en Guaraní - ?anderuete ?e’? Por? 2015

Pe tetã ruvicha heko porãva

1Pema’ẽ porãke, og̃uahẽta peteĩ tetã ruvichaguasu oisãmbyhýtava justícia reheve ha imburuvichakuéra ombojovakéta hekoitépe.

2Ha upe kuimba’e ojoguáta ñemo’ãháme yvytu’atãme ha ama vaípe; ku ysyrýicha yvy perõme, ku itaguasu kuarahy’ãicha ára hakuetépe.

3Umi tesa ohecháva naiñypytũmo’ãi, ha umi ojapysakáva ohendu porãta.

4Umi itavýva py’a iñarandúta ha umi juru oñe’ẽ pa’ã pa’ãva, oñe’ẽ syryry porãta.

5Upe ára upévape ndoje’emo’ãvéi tekove ñañáme imba’e porãha, ni ijapúvape ndoje’emo’ãvéi heko potĩha.

6Pe iñañáva oñe’ẽvai ha ipy’a oñeha’ãva ojapoha oñe’ẽvai hag̃ua Ñanderueterehe, ha’e nomongaruséi iñembyahýivape ni nomboy’uséi ijy’uhéivape.

7Upe oporombotavýva ohayhu voi hembiapo vai; ha’e oñeha’ã oityve hag̃ua upe ohasa asývape, kóa ohechauka ramojepe hembiapokue iporãha.

8Ha pe ipy’a porãva katu ojepy’amongeta mba’eporã rehe, ha ñeha’ã avei ojapo hag̃ua mba’eporã.

Profecía kuñakuérape g̃uarã oikóva Jerusalénpe

9Peẽ kuñakaraikuéra ndapejepy’apýiva mba’eve rehe, pepu’ã joáke pehendu hag̃ua che ñe’ẽ; peẽ tajyrakuéra peñembotuicháva, pehendúke che ha’étava peẽme:

10Ohasa mboyve peteĩ áño peẽ peryryipáta peñembotuicha haguérehe, parral’a ha ñemitỹngue ñemono’õrã ndoikomo’ãvéigui peẽme.

11Peryrýike, peẽ pejepy’apy’ỹva mba’eve rehe; peñemyangekõike, peẽ peñembotuicháva; peipe’a pendejehegui pende aokuéra, peñemboi ha pemonde ao vosakue pehechauka hag̃ua pende vy’a’ỹ.

12Peñembyasýke ha peñenupã pende pyti’áre oñehundi haguére koga’a ha parral’a ñemono’õrã.

13Ko che retã yvýpe heñói ñanandy ha ñuatĩndy, upévare pe vy’a pende táva rogakuérare opa reíta.

14Umi ogaguasu itaperepa, pe táva pegua ayvu opáma, umi óga yvate táva tápiare ojehejapa rei guyra raitýpe g̃uarã heta áñoma, umi búrro saite opytu’úta, ha pene rymbakuéra okarúta upérupi.

15Oñeñohẽ meve Pytu Porãite yvate pegua ñandeári pe ñu perõgui oiko jevýta kokue porã oñeñemitỹ hag̃ua, ha pe kokue porãgui oiko jevýta ka’aguy porã.

16Upéramo opa rupi oĩta justícia pe tetã ruguaietépe jepe ha hekoitépe oñembojovakéta.

17Ha justíciagui heñóita tapia g̃uarã py’aguapy, angapyhy ha kyhyje’ỹ.

18Ha che retã ryepýpe oĩta py’aguapy ha che retãygua rogakuérape pytu’u kyhyje’ỹre.

19Ko’ã mba’e mboyve katu amandáu ho’áta ka’aguýpe ha Jerusalen oñembotaperéta avei.

20Uperire katu pevy’a ha peñemitỹ y rembe’ýpe, ha pepoikuaa pene rymba guéi ha búrro kapi’ipe porãme.