Jeremías 14 - Biblia en Guaraní - ?anderuete ?e’? Por? 2015

Ndokymo’ãvéi

1Ñanderuete he’i Jeremíaspe ndokyveitaha.

2Juda oñemonde ao vosakuépe, hokẽnguérape ndaiporivéima avave; ñembyasypópe oguapy joa hikuái yvýpe, ha Jerusalenguakuéra ojahe’ohína.

3Umi karaiguasu katu omondo hembiguaikuéra y rekávo, ha oúrõ ykuápe, ndojohúi; ha ojevy imba’yrukuéra nandi reheve; otĩ joa hikuái, ipy’a tarovapa; ha otĩgui omo’ã hikuái iñakãnguéra.

4Ndokyvéigui tetãpýre, ojekapa pe yvy, umi kokuépe omba’apóva ndoikuaavéima mba’épa ojapo’arã, ha otĩgui omo’ã hikuái avei iñakãnguéra.

5Umi guasu kuña jepeve imemby ramo ñu rehe oheja rei imembýpe, ndaiporivéigui kapi’i.

6Ha umi búrro saite ojupi pe yvy ijyvateha rupi, ha oñetĩupi yvytu rehe, ku jagua saitéicha, hesakuéra iñypytũ ohóvo ndaiporivéigui kapi’i.

Jeremías ojerure Ñanderuetépe oiporiahuvereko hag̃ua hetãme

7Ore rembiapo ivaiete ha roñemoĩ ramo jepe nderehe, ore rojerure asy, Nde, ore Ruete nde réra rayhupápe orepytyvõ jevýna, ore voi ropia nde rapégui, ne renondépe roñemoangaipa haguére.

8Ndémante Israel esperánza, Ndémante reñangarekokuaa orerehe rojepy’apy vaiete aja. Mba’érehe piko reiko ku tetã ambueyguávaicha ko tetãpýpe, ha ku mbohupáicha ohasáva oke hag̃uante.

9Mba’érehe piko reiko ku yvyarigua oikuaa’ỹvaicha mba’épa ojapo’arã, térã ku ipy’aguasuetévaicha ikatu’ỹva oporopytyvõ ñorãirõme. Nde reimereína ore apytépe, Nde, ore Ruete, ha nde réra ningo oĩ ore retã rérape; anína oremotyre’ỹ.

10Péicha he’i Ñanderuete ko tetã kóvare: Ovy’a ningo oguata rei aja, ha nomombytu’úi ramo ipykuéra; upévare Ñanderuete ndoguerohorýi ichupekuéra: Ko’ág̃a ae oñemomandu’áta iñaña reko rehe Ha’e ohavira aja hembiapo vaietáre.

11Ñanderuete he’i chéve: Ani remba’ejerurétei mba’eporã ko tetã kóva renondépe.

12Karu’ỹme ohasa ramojepe hikuái, Che nahendumo’ãi imba’ejerure asy, ha oikuave’ẽ ramojepe hikuái kuave’ẽmby ojehapypáva nachembovy’amo’ãi, ahundíta uvei ichupekuéra kyse puku rupi, ñembyahýi ha mba’asy iñasãiva rupi.

13Ha che, Jeremías, ha’ékuri: Angái, angái, che Jára, che Ruete: Eikuaa porã, proféta gua’u he’i voi hetãyguakuérape: Ndapehechamo’ãi kyse puku, pende apytépe ndaiporimo’ãi ñembyahýi, oñeme’ẽta uvei peẽme py’aguapy añeteguáva.

14Upéramo Ñanderuete he’i chéve: Iproféta omomarandu japu che rérape; Che katu namondói ichupekuéra, ha nda’éi mba’eve ichupekuéra, ha nañe’ẽi hendivekuéra. Techapáy japu rehegua, ta’yvõ, mba’e rei ha japu ipy’apýgui voi heñóiva, péva omomarandu che retãme.

15Upévare Ñanderuete he’i umi proféta rehe omomarandúva che rérape, Che namondóiva, ha he’íva kyse puku ha ñembyahýi ndoumo’ãiha ko tetã kóvape: Kyse pukúpe ha ñembyahýi rupi oñehundipáta ko’ã profetakuéra.

16Ha umi tetãygua, ha’ekuéra omomaranduva’ekue, oñemombóta Jerusalen callekuéra rehe, ñembyahýi ha kyse puku rupi omanóta, ha ndaiporimo’ãi oñotỹséva ichupekuéra; ha upéicha avei proféta rembireko, ita’ýra ha itajyrakuérape, iñakã ári añohẽta hembiapo vaikue.

17Ha nde, Jeremías, eréta ichupekuéra ko ñe’ẽ kóva: Che resakuéragui osyry che resay opi’ỹre ára ha pyhare, jepy’apyrã tuichaitéva og̃uahẽta che retãme ha jehasa asy ipohyietereíva ho’áta hi’arikuéra.

18Asẽ ramo ñúre ahecháta umi omanova’ekuépe kyse puku rupi ha aike ramo itáva ryepýpe ahecháta umi omanova’ekuépe ñembyahýi rupi. Maranduhára ha pa’ikuéra ohova’erã peteĩ tetãme oikuaa’ỹvape.

19Remboykete piko ra’e Judápe, ndekueráima piko Sióngui. Mba’érehe piko orembohasy ndaiporivéi peve ore pohãrã. Roiko roha’ãrõvo py’aguapy, ndojehúi katu mba’eve iporãva; ore roha’ãrõ Nde oremonguera hag̃ua, ore ánga katu oñemondyimanterei.

20Nde ore Ruete roikuaa porã ningo ore rojapo vaiha ha ore rukuéra reko iñaña hague; roñemohembiapo vai ne renondépe.

21Nde réra rayhupápe katu anítei oremboyke, ha anítei oñembohory hikuái nde guapyhaguasu jajaipáva rehe; nemandu’ána, ani reity tesaráipe, ne ñe’ẽ reme’ẽmava’ekue oréve.

22Oime nga’u piko peteĩ jára, ijára gua’ukuéra apytépe, ikatúva omongy térãpa umi arai ogueru reínte pe ama. Ore Ruete, ore Jára, nderehe rojerovia, Nde ningo opaite ko’ã mba’e apohare.