Daniel 6 - Biblia en Guaraní - ?anderuete ?e’? Por? 2015

Daniel oñemombo leõ kuárape

1Oĩ porãváicha Daríope omoĩ 120 tetã sãmbyhyhára oisãmbyhy hag̃ua hetãguasúpe.

2Ha umía ári omoĩ jevy mbohapy mburuvichaguasu oisãmbyhypáva, ha Daniel oĩ avei ijapytepekuéra, ha ko’ã mbohapy tetã sãmbyhyharaguasu poguýpe oĩmba umi 120 tetã sãmbyhyhára, ani hag̃ua avave ombotavy tetã ruvichaguasúpe.

3Pe tetã ruvicha omoĩse Daniélpe umi 120 tetã sãmbyhyhára ári, oĩgui ipype peteĩ pytu porã ndetuicháva.

4Umi tetã sãmbyhyhára katu oheka mba’éichapa omoĩvaikuaa Daniélpe hembiapo rupi, ha’ekuéra katu ndojohúi mba’eveichagua jeja’yvere Daniel rekovépe.

5Upéramo umi kuimba’e he’i: Ndajajohumo’ãi Daniel rekovépe mba’eve ivaíva ñañe’ẽ vai hag̃ua hese, Ijára ñemomba’eguasu rupi ñamoñuhãkuaánte ichupe.

6Ha tetã sãmbyhyhára ha mburuvichakuéra oñembyaty tetã ruvicha renondépe, ha he’i hikuái ichupe: Tetã ruvicha Darío, tereikove tapia g̃uarã,

7ore, ne retã sãmbyhyhára ha opaite mburuvichakuéra, roñembopy’apeteĩ rojerurévo nde rehai ha remoañete hag̃ua peteĩ tembiapoukapy he’íva: Ko ára guive, 30 ára peve, opaite tetãygua oikóva guive ne retãguasúpe tomba’ejerurepánte ndéve, ha oĩ ramo peteĩ omba’ejeruréva ambue kuimba’e térã ijárape (itupãme), upéva toñemombo leõ kuárape.

8Ha nde, ore retã ruvicha, remoañete rire ko tembiapoukapy ha remoĩvo nde réra ko kuatiañe’ẽre avave ndaikatumo’ãi oheja rei Média ha Persiaygua rembiapoukapy.

9Ha tetã ruvicha Darío omoĩ héra pe kuatiañe’ẽ rehe.

10Daniel oikuaa vove Darío omoĩ hague héra pe kuatiañe’ẽ rehe, oike hógape, ha oipe’a ikoty rovetã oma’ẽva Jerusalen gotýo ha oñesũ, oñembo’e ha omomba’eguasu hag̃ua Ñanderuetépe, ojapo jepi háicha mbohapy jevy meme árape.

11Upéramo pya’e oñembyaty umi kuimba’e, ha ojohu hikuái Daniélpe oñembo’e ha omba’ejerurévo Ñanderuetépe.

12Upéi oho hikuái tetã ruvicha rendápe ha oñe’ẽ ichupe pe kuatiañe’ẽ oguenohẽukava’ekue rehe: Neremoañetéipara’e peteĩ kuatiañe’ẽ he’íva oimeraẽva ne retãygua omba’ejeruréva ijárape térã ambue hapichápe ndaha’éi ramo ndéve, ojeitytaha leõ kuárape. Ha pe tetã ruvicha he’i: Añete ningo umi mba’e pejéva Média ha Persiaygua rembiapoukapy ndaikatúi ojeheja reívo.

13Upéramo he’i hikuái tetã ruvicha renondépe: Daniel, ojegueruva’ekue pokuapyhápe Juda retãgui, nanemomba’éi ndéve, ha ndojapói pe tetã ruvicha kuatiañe’ẽme he’i háicha, omba’ejerure Ijárape mbohapy jevy meme árape.

14Ha ohendúvo ko’ã mba’e pe tetã ruvicha oñembyasyeterei ha oñeha’ãmbaite osalva hag̃ua Daniélpe kuarahy oike peve.

15Ha umi kuimba’e katu ojerepa tetã ruvicha rehe ha he’i ichupe: Eikuaákena, tetã ruvicha, mba’eveichagua Média ha Pérsia pegua rembiapoukapy ha kuatiañe’ẽ, tetã ruvicha omoañeteva’ekue guive, ndaikatuiha ojeheja reívo.

16Upémaramo tetã ruvicha ogueruka Daniélpe, ha oñemombo ichupe leõ kuárape. Ha pe tetã ruvicha he’i Daniélpe: Nde Jára, máva nde reservívape tapiaite, tandesalva.

17Ha ojegueru peteĩ itaguasu ha oñemoĩ pe yvykua juru ári ha uperire omota’ãnga (osella) pe tetã ruvicha kuãirũme ha mburuvichakuéra kuãirũme, ani hag̃ua avave omoambue iñe’ẽngue.

18Upéi pe tetã ruvicha oho hogaguasúpe, oñeno okaru’ỹre; ha ndoipotái ojegueru ikuña peteĩva jepe, ha ndaikatúi oke.

19Pyharevete pe tetã ruvicha oho pya’e umi leõ oĩháme.

20Ha oñembojávo pe yvykua ypýpe ohenói Daniélpe ha ñe’ẽ ñembyasypópe he’i: Daniel, Yvága Jára oikovéva rembiguái, nde Jára piko, ikatúra’e ndesalva umi leõgui.

21Upévo Daniel ombohovái tetã ruvichápe: Tetã ruvicha, tereikove tapiaite,

22che Jára ombou ijyvága rembiguái (hi’ángel) omboty hag̃ua umi leõ juru, ani hag̃ua ojapo ivaíva cherehe, ndajayveréigui ne renondépe, ni Ñanderuete renondépe.

23Upévo tetã ruvicha ovy’aiterei ha oguenohẽuka Daniélpe pe yvykuágui; ha pya’e oñeguenohẽ Daniélpe pe yvykuágui, ha ndojohúi mba’evete ivaíva hese, ojeroviágui Ñanderuete rehe.

24Upéramo tetã ruvicha ogueruka umi kuimba’e omoĩ vaiva’ekue Daniélpe oitypa hag̃ua leõ kuárape, ita’yrakuéra ha hembirekokuéra jepe. Ha og̃uahẽ porã mboyve pe yvykua ruguápe, umi leõ ipojáima hesekuéra ha oipehẽ’ãmba ichupekuéra.

25Upéramo tetã ruvicha Darío ohai kuatiañe’ẽ tetãnguéra maymávape oikóva guive hetãguasu poguýpe ha he’i: Py’aguapy toñemboheta hetave peẽme,

26chete voi amoĩ ko tembiapoukapyrã kóva: Ko tetãguasúpe, oĩva che poguýpe aipota opavave okyhyje ha oryrýi Daniel Jára renondépe, Ha’eguihína Jára oikovéva ha oikóva apyre’ỹ meve g̃uarã, ha hetãguasuetéva araka’eve noñehundiriva’erã, Ha’e ipu’akapava’erã tapia guarã.

27Ha’e voi osalva ha operdona, ojapo tembiapo techapyrãva yvy ha yvágape, Ha’e osalva avei Daniélpe leõ jurúgui.

28Darío ha Círo, Persiaygua retã ruvichakuéra, oisãmbyhy aja, Daniel tuicha oñakãrapu’ã.