1Upéi Elifaz, pe Teman pegua, ombohovái jevy Jóbpe, ha he’i:
2Mba’eichagua ñepytyvõpa yvyarigua oguerukuaa Ñanderuetépe. Mba’eve ndaikatúi ogueru, yvyariguakuéra iñarandu ramojepe ndaikatúi oipytyvõ Ñanderuetépe.
3Nde reko potĩ rupi piko reipytyvõkuaa Ñanderuetépe, térãpa regueru ichupe mba’eporã reguata haguére hekoitépe hape rupi.
4Job, nde piko reimo’ã Ha’e ndehaviráma nde reko ipotĩ haguére, térãpa upévare Ha’e nembojovakéma.
5Añetehápe tuicha ningo nde reko vai ha ne rembiapo vai hetaiterei.
6Umi omba’apova’ekuépe nendive nereme’ẽmbái hembiaporepy ha imboriahúvagui reipe’a ijaokuéra.
7Neremboy’úi pe ijy’uhéivape, ha neremongarúi pe iñembyahýivape.
8Nde reiporu vai nde pu’aka, reipytyvõ rãngue imboriahúvape nde reipytyvõve umi mba’e heta oguerekóvape.
9Umi imenave’ỹvape remosẽ reme’ẽ’ỹre mba’eve, ha umi ityre’ỹvagui reipe’apa hembýva guive gueteri ichupe.
10Upévare oĩ heta ñuhã nde jerekuévo, ha ñemondýi reha’ãrõ’ỹva nembopy’a tarova,
11ha iñypytũmbáma ndéve g̃uarã, ani hag̃ua rehecha yeta neñuãtava.
12Ñanderuete oĩ pe yvága ijyvatehápe. Ema’ẽna mbyjakuéra rehe, mombyryete oĩ ndehegui.
13Ha mba’éicha piko nde ere: Mba’e piko Ñanderuete oikuaa. Mba’eichaitépa oporombojovake porãkuaa arai pytũ rupi.
14Umi arai ojerepa hese, ha upévare ndohechái, ha ára rapérente Ha’e oguata.
15Reguatase piko pe tape ymaguare rehe, umi kuimba’e iñañáva yma oguata haguéicha.
16Ha’e ohundiva’ekue umívape og̃uahẽ mboyve hi’ára, pe yguasu oguerahava’ekuégui ichupekuéra.
17He’i hikuái Ñanderuetépe: Tereho orehegui. Ha mba’e piko Ñanderuete ojapóra’e hesekuéra.
18Omyenyhẽ hogakuéra ijehovaságui. Ha’ekuéra katu ndoikuaaséi Ñanderuete rekombo’e.
19Umi heko porãva ohechapáta ha hory joáta, ha umi heko potĩva oñembohoryva’erã hesekuéra, ha he’iva’erã:
20Añetehápe omanombáma umi opu’ãva’ekue orerehe, ha umi mba’e hembýva ichuguikuéra pe tata ombokusuguepáma.
21Eñembyasy reja’yvere haguére Ñanderuete renondépe ha emombe’u ne rembiapo vai ha ndepy’aguapy jevýta.
22Ejapyhy tekombo’e ijurúgui osẽva, ha emoinge iñe’ẽ nde py’apýpe.
23Rejevýrõ Ñanderuete rendápe, oho porãmba jevýta ndéve, emboyke nde rógagui opaichagua tembiapo vai,
24emombo yvy timbópe nde óro ha eity nde óro Ofir peguare ysyrýpe, itakuéra pa’ũme.
25Ha Ñanderuete ha’éta ndéve g̃uarã óro ha pláta.
26Upéi Ñanderuete nembovy’a jevýta ha remopu’ã jevýta nde rova rema’ẽ hag̃ua hese.
27Reñembo’éta ichupe g̃uarã, ha Ha’e nerendúta, ha nde rejapopáta opaite mba’e reprometeva’ekue Ñanderuetépe.
28Rejaposéva guive osẽ porãmbáta ndéve g̃uarã, ha hesape ojajáita nde rapére.
29Ñanderuete omomirĩ umi oñembotuichávape, ha omopu’ã umi oñemomirĩvape.
30Ñanderuete osalva jepe pe oja’yverévape, ne ñembo’e ha nde reko potĩ rupi reipytyvõ ichupe.
Who We AreWhat We EelieveWhat We Do
2025 by iamachristian.org,Inc All rights reserved.
