Deuteronómio 19 - Biblia en Guaraní - ?anderuete ?e’? Por? 2015

Táva oñekañyháme

1Ñanderuete, pende Jára, ohundi ramo pene renondépe umi tetã oikóva Canaánpe, ha ome’ẽ ramo peẽme ijyvy peẽ peiko hag̃ua itáva ha hogakuérape,

2peẽ pemboykéta mbohapy táva, Canaan tavakuéra apytégui, Ñanderuete ome’ẽtava peẽme pene mba’erã ramo.

3Pemyatyrõ hapekuéra ha pemboja’o Canaan yvy mbohapy hendápe, okañy hag̃ua upépe mayma oporojukava’ekue ojukase’ỹre.

4Upépe ojesalváta pe oporojukáva, ojukava’ekue hapichápe ojapose’ỹre, ha ndojuavýi ramo hendive ko kueheve ára.

5Sapy’a rei mokõi kuimba’e oho ramo ka’aguýpe jepe’a kytĩvo, ha oikytĩvo jepe’a ihácha akã ojei hi’ývagui, ha ojuka hapicháre, ha upéva okañykuaa peteĩ ko’ã mbohapy távape ojesalva hag̃ua;

6ani hag̃ua pe omanova’ekue pehẽngue ipochyetereígui omuña pe oporojukávape pe tape pukuetereíre ha ojohúvo oikutu ichupe ha ha’e omano; pe oporojukáva nomanoiva’erã, ndoiko vaírigui pe omanomava’ekue ndive.

7Upévagui Ñanderuete he’i peẽme: Pemboykeva’erãha umi mbohapy táva.

8Ñanderuete, pende Jára, ombotuichave ramo pene retã, ha ome’ẽ rire peẽme opaite yvy Ha’e he’i haguéicha pende rukuérape,

9upéicharamo pejapova’erã hekoitépe mayma tembiapoukapy Ñanderuete he’iukáva peẽme ko árape: Pehayhu Ñanderuete, Ñandejárape, ha peguata tapia hape rehe; ha péva ojehu ramo pemboykeve ambue mbohapy táva.

10Ani hag̃ua oñeñohẽ rei ipotĩva ruguy pe yvy Ñanderuete, Ñandejára, ome’ẽtava peẽme pene mba’erã ramo, ha ani hag̃ua oja tuguy, oñeñohẽ reiva’ekue ko yvy kóvare.

11Ha peteĩ kuimba’e ipochýrõ hapicha ndive ha omangea hese ojuka hag̃ua ichupe ha ojuka rire okañýrõ peteĩ ko’ã táva mo’ãháme ojesalva hag̃ua,

12upéicharamo pe táva ruvicha ome’ẽva’erã ichupe itáva ruvichateépe ha ha’e ombohasava’erã pe oporojukava’ekuépe pe omanova’ekue pehẽngue pópe, ha’e ojuka hag̃ua avei ichupe.

13Ndapeiporiahuverekoiva’erã, peipe’ava’erã uvei Israel ryepýgui upe oñohẽ reíva ipotĩva ruguy, oho porãmba hag̃ua peẽme.

14Pe yvy Ñanderuete, pende Jára ome’ẽtava peẽme katuete peheja Ha’e omoĩuka haguéicha, ani pemomichĩve pende rapicha yvy rembe’y.

Tembiapoukapy techahare reheguáva

15Ndapejapyhymo’ãi añetegua ramo peteĩ techahare ñe’ẽ rupínte, oimeraẽ tembiapo vai térã angaipa térã jejuka oikotevẽ mokõi térã mbohapy techahare rehe pembojovake hag̃ua.

16Opu’ã ramo peteĩ techahare gua’u ijapúva, oñe’ẽvai rei hag̃ua hapicha rehe,

17upéicha ramo mokõivéva ojeguerahava’erã Ñanderuete róga jojohuhápe, pa’ikuéra ha mbojovakehára rendápe, omba’apóva pe ára pévape;

18ha umi mbojovakehára oporandu porãva’erã, ha upe techahare ijapúrõ, ha oñe’ẽvai rei hapicha rehe,

19upéicharamo pejapóta hese ha’e ojapose haguéicha hapicha rehe; upéicharõmante peipe’áta mba’evai pende apytégui.

20Ha umi ambue ohendúva ko ñembojovake tokyhyje, oñemboyke hag̃ua peichagua tekove ñaña rekógui.

21Ha ndereiporiahuverekomo’ãi: Tekove, tekove rehe; tesa, tesa rehe; tãi, tãi rehe; po, po rehe; py, py rehe.