1Ñanderuete ñe’ẽ oprofetiza Moab rehe. Pyharekuépe oñehundíma Ar, ha Moab oñembotapere. Añetehápe, pyharekuépe oñehundi, Kir, ha Moab oñembotapere avei.
2Umi Dibongua oho ojahe’o hag̃ua yvy ijyvatehápe ha itupã rógape; Moabguakuéra hasẽ Nebo ha Medéba rehe; omoperõmba hikuái iñakã, ha hendyva oñekytĩmba joa hikuái.
3Itáva ryepýpe oñemonde ao vosakuépe; hóga apére ha iplázape ojahe’o puku joa ha hasẽ soro hikuái.
4Hesbon ha Eleale osapukái, ha iñe’ẽ oñehendu Jahaz peve; umi Moab soldadokuéra osapukái ojepy’apyetereígui hikuái.
5Che ajepy’apyete Moab rehe, hetãyguakuéra okañýva og̃uahẽma Zoar ha Eglat Celícia peve. Oho hikuái hasẽháme Luhit rape rehe ha jahe’ohápe osapukái Horonaim rape rehe, hetã oñembyai haguére.
6Umi Nimrim pegua ykua oñembyaíta, ha pe kapi’i ipirupáma, yvyra rogue havirupáma, ndopytái peteĩ yvyra rogue hovyũva jepe.
7Upévagui ogueraha imba’erepyeta hembýva gueteri ha ikatúva oñongatu, pe sáuce yvyraty ysyry mboypýri.
8Moab retãyguakuéra osapukái hatã Eglaim peve, oñehendu ijahe’o Beer-elim peve.
9Ha umi Dimon pegua ykua henyhẽ tuguýgui, Che katu agueruvéta mba’e ivaietéva Dimon ári, ha umi leõ omuñáta umi okañývape.
Who We AreWhat We EelieveWhat We Do
2025 by iamachristian.org,Inc All rights reserved.
