1 Réyes 18 - Biblia en Guaraní - ?anderuete ?e’? Por? 2015

Elías oho jevy Acab rendápe

1Ha heta ára ohasa rire, pe áño mbohapyhápe, Ñanderuete he’i Elíaspe: Tereho, ejehechauka jevy Acábpe, Che amongy jevýtagui yvy ape ári.

2Ha Elías oho ojehechauka hag̃ua Acábpe. Ha pe ñembyahýi ojopyetereíma Samária retãme.

3Ha Acab ohenói Abdíaspe imba’e ñangarekohára. Abdías katu ojerovia porã Ñanderuete rehe ha okyhyje ichugui.

4Pe Jezabel, Acab rembireko, ojukárõ guare Ñanderuete profetakuérape, Abdías ojapyhy 100 profétape, ha omokañy 50 peteĩ itakuaguasúpe, ha 50 ambue itakuaguasúpe ha upépe omongaru ichupekuéra pan ha y reheve.

5Ha Acab he’i Abdíaspe: Jaha tetãpýre opaite ykua ha yakã oĩha rupi, jahecha ndajajohúipa kapi’i ñamongaru hag̃ua kavaju ha mburikakuéra, anítei japyta ñane renda’ỹre.

6Ha oñomboja’o hikuái Samária retãre: Acab oheka peteĩ tape rupi ha Abdías oheka ambue tape rupi.

7Ha Abdías oñug̃uaitĩ Elías ndive, ha ohechávo ha’eha, oñesũ henondépe ha he’i: Ndépa ndaha’éi che jára Elías.

8Ha Elías he’i: Che ha’e, tereho ha ere nde járape: Elías oúma.

9Abdías katu he’i: Mba’épepa añemoangaipára’e, remoĩ hag̃ua ne rembiguáipe Acab pópe, chejuka hag̃ua.

10Ñanderuete, nde Jára rérape ha’e ndéve nahembýi tetã ni yvy mamópa che jára nanderekaukái hague, ha mayma he’íra’e ichupe: Noĩri ápe; ha opaite hetãyguakuéra ha tetã ambuépe ha’e omoñe’ẽme’ẽ nandejohúi hague.

11Ha ág̃a nde ere: Tereho ere nde járape, Elías ouhahína.

12Ojehúne ág̃a che aha rire Acab rendápe, Ñanderuete ndereraha che aikuaa’ỹháme, ha amombe’úrõ Acábpe ha upéi ha’e nandejohúi ramo, katuete chejukáta, ha ne rembiguái ojerovia Ñanderuete rehe imitãite guive.

13Noñemombe’úi piko ndéve che járape che ajapova’ekue, ko Jezabel ojuka ramoguare Ñanderuete profetakuérape, che amokañy hague 100 Ñanderuete profétape, 50 amokañy peteĩ itakuaguasúpe ha 50 ambue itakuaguasúpe, ha amongaru ichupekuéra pan ha y reheve ko’ág̃a peve.

14Ha ko’ág̃a nde ere: Tereho ha ere nde járape, Elías ouhahína; katuete ha’e chejukáta.

15Ha Elías he’i ichupe: Ñanderuete, yvága atykuéra Jára rérape ha’e ndéve: Ko árape ajehechaukáta ichupe.

16Upémaramo Abdías oho Acab rendápe, ha omba’emombe’u ichupe, ha Acab ou Elías rendápe.

17Acab ohechávo Elíaspe he’i ichupe: Nde piko Israel mbyaihára.

18Ha Elías ombohovái ichupe: Che nambyaíri Israélpe, nde ha nde ru rogaygua katu pembyai Israélpe pepoi haguére Ñanderuetégui, peiko hag̃ua Baalkuéra rapykuéri.

19Emondo ha embyatyuka opaite Israelguápe Carmel cérrope, ha avei umi 450 Baal proféta ha umi 400 Asera profétape, okarúva Jezabel mesápe.

Elías ha Baal profetakuéra

20Upéramo Acab ohenoiuka mayma Israel ñemoñarenguérape, ha ombyatyuka umi proféta Carmel cérrope.

21Ha oñembyatypa rire, Elías he’i hetãyguakuérape: Araka’e pevépa peñembopy’amokõita. Ñanderuete ramo pe Jaratee, peiko hapykuéri; ha oime ramo Baal, tapeho hapykuéri. Ha hetãyguakuéra nde’íri mba’evete.

22Ha Elías he’i jevy hetãyguakuérape: Che añoite cheremby Ñanderuete proféta apytégui, ha Baal profetakuéra katu oĩ 450.

23Toñeme’ẽ oréve mokõi tóro ra’yrusu, ha’ekuéra toiporavo peteĩme, ha toipehe’ã ha tomoĩ hikuái jepe’a ári, tomoĩ’ỹ katu tata iguýpe, ha che ambosako’íta ambue tóro ra’yrusu, ha amoĩta jepe’a ári, ha mba’eveichagua tata namoĩmo’ãi iguýpe.

24Upéi peẽ pehenóita pende járape, ha che ahenóita Ñanderuetépe, ha pe ombohováiva tata rupi, péva ha’éta pe Jára añeteguáva. Ha tetãyguakuéra he’i joa: Iporã pe nde eréva.

25Upémaramo Elías he’i Baal profetakuérape: Peiporavo peteĩ tóro ra’yrusu, ha peẽ raẽ pembosako’íta, pende retavégui, ha pehenói pende járape, napemoĩmo’ãi katu tata iguýpe.

26Ha ha’ekuéra ojapyhy peteĩ tóro ra’yrusu oñeme’ẽva’ekue ichupekuéra ha ombosako’i hikuái, ha ohenói Baálpe pyhareve guive asaje peve, he’ívo hikuái: Baal orembohováina, ha ndaipóri oñe’ẽva, ha ndaipóri ombohováiva, ha upejave ha’ekuéra ojeroky pe ikuave’ẽmby renda jerekuévo.

27Ha ojehu pe asaje pytépe, Elías oñembohory hesekuéra, he’ívo: Pesapukái hatãvéna, ha’e ningo peteĩ jára, oiméne ojepy’amongetahína térã hembiapohína, térã oiméne tape rehe, ikatu oke mba’e ha oñemombayva’erã.

28Ha’ekuéra osapukái hatãve ha oñekytĩ kysépe ha mba’e akuápe, ojepokuaa háicha voi, osyry peve huguy.

29Péicha ohasa pe asaje ha ha’ekuéra osapukái itarovávaicha pe kuave’ẽmby, hóra mbohapy peve, ha ndaipóri avave ombohováiva, ha avave nohendúi mba’eve.

30Upémaramo Elías he’i hetãyguakuérape: Peñemboja che rendápe. Ha opaite tetãyguakuéra oñemboja hese, ha ha’e omyatyrõ Ñanderuete kuave’ẽmby renda oñembyaipamava’ekue.

31Ha Elías omboguapy 12 itaguasu oĩ háicha, Jacóbo ra’ykuéra ha Israel tribukuéra ha oje’eva’ekue Jacóbope Ñanderuete ñe’ẽ rupi, Israel nde rérata.

32Umi itágui Elías omopu’ã peteĩ kuave’ẽmby renda Ñanderuetépe g̃uarã; upéi ojo’o peteĩ yvykua pe kuave’ẽmby renda jerekuévo, ku ija hag̃uáicha ipype 24 lítro mba’e ra’ỹingue.

33Upéi ombosako’i jepe’a, ha ombo’i ha oipehe’ã pe tóro ra’yrusu ha omoĩ pe jepe’a ári.

34Ha he’i pemyenyhẽ irundy kambuchi ýgui, ha peñohẽ pe kuave’ẽmby ojehapyva’erãre ha jepe’a rehe. Ha he’i pejapo jevy; ha ojapo jevy hikuái. Upéi he’i jevy: Pejapo jevy mbohapyha ha ojapo jevy hikuái mbohapyha.

35Péicha osyry pe y kuave’ẽmby rendágui, ha omyenyhẽ avei ýgui pe yvykua.

36Og̃uahẽvo pe kuave’ẽmby hóra pe proféta Elías oñemboja pe kuave’ẽmby renda rehe ha he’i: Abraham, Isaac ha Israel Jára, ejehechauka Ndeha Israel Jarateéva ha cheha ne rembiguái, Nde erégui chéve che ajapo hag̃ua ko’ã mba’e.

37Embohovái chéve Ñanderuete, embohovái, ko’ã tetãyguakuéra oikuaa hag̃ua Ndeha Israel Jarateéva, ha Nde rembojevyseha ndejehe ipy’apykuéra.

38Upevove Ñanderuete rata ho’a yvatégui ha ohapypa pe kuave’ẽmby, pe jepe’a, umi ita ha pe yvy timbo jepe, ha oheréi avei pe y oĩva pe yvykuápe.

39Hetãyguakuéra ohechávo péva oñesũmba ha he’i hikuái: Jahve, Ñandejára, Ñanderuete voi.

40Upémaramo Elías he’i ichupekuéra: Peapresa Baal profetakuérape, anítei okañy avave. Ha ha’ekuéra oapresa ichupekuéra ha Elías ogueraha ichupekuéra Cison yakãme ha upépe ojukapa Baal profetakuérape.

41Upémaramo Elías he’i Acábpe: Ejupi, ekaru ha hey’u; oñehendúma ouha ama ndetuicháva.

42Acab ojupi okaru ha hoy’u hag̃ua. Ha Elías ojupi Carmel cérro ru’ã rehe, ha oñesũ pe yvýpe, ha omoĩ hova henypy’ã pa’ũme.

43Ha he’i hembiguáipe: Ejupi ko’ág̃a ha ema’ẽ yguasu gotýo rehe. Ha ha’e ojupi ha oma’ẽ, ha he’i: Ndaipóri mba’eve. Ha Elía he’i jevy ichupe: Tereho 7 jevy.

44Pe 7-hápe he’i: Che ahecha peteĩ arai michĩetéva, peteĩ kuimba’e popytéicha opu’ãva yguasúgui. Ha Elías he’i: Tereho, ha ere Acábpe: Ejokua nde kavajukuéra cárro rehe ha eguejy, anítei pe ama nderupity.

45Upejave iñypytũ pe ára, arai ha yvytu reheve, ha ou peteĩ ama ndetuicháva. Ha Acab ojupi ha ou Jizreélpe.

46Ha Ñanderuete po omombarete Elíaspe, ha ha’e ojeku’ajokua ha oñani Acab renonderãme og̃uahẽ meve Jizreélpe.