Filipoyguakuérape 2 - Biblia en Guaraní - ?anderuete ?e’? Por? 2015

Peñembopy’apeteĩke ha pehasa asykuaa avei

1Pende apytépe oime ramo oikotevẽva tekombo’e rehe, toñeme’ẽ ichupe Hesu Crísto oipota háicha, oñemokyre’ỹ jevy hag̃uáicha, oñekotevẽ ramo ñemoangapyhy rehe, toñeme’ẽ mborayhu reheve, péichamante pe ñembopy’apeteĩ, pe mborayhu ha pe poriahuvereko okakuaa porãvéta pende apytépe.

2Pemyenyhẽ vy’águi che rekove, peikórõ peteĩ ñe’ẽme, peteĩ pensamiéntope ha peteĩ mborayhúpe.

3Anítei pejapo mba’eve peñembotuichase térã peñorãirõségui, peteĩteĩ toñemomirĩ uvei, ha peguereko ambuekuérape mba’eguasuvérõ pendehegui.

4Anítei peheka mba’e iporãva peẽme g̃uarãnte, peheka avei mba’e iporãva pende rapichápe g̃uarã.

5Peiko oñondive, peiko háicha Hesu Crísto ndive.

6Hesu Crísto oguereko ramojepe Ñanderuete reko, Ha’e nahakate’ỹi heko rehe,

7opoi uvei hekoteégui, oiko hag̃ua tembiguái ramo, ha hete ojogua voi kuimba’e retépe.

8Ha’e voi oñemomirĩ, ha iñe’ẽrendu omano meve, omano ramojepe kurusúre.

9Upévare Ñanderuete ombotuichaiteve ichupe opavavetégui, ha ome’ẽ ichupe (Hesu Crísto) pe téra ituichaitevéva opaite ambue téragui.

10Hesu réra renondépe oñesũmbava’erã opavave oĩva guive yvágape, yvy apére ha yvy guýpe.

11Ha opaite juru he’iva’erã Hesu Crísto ha’eha Ñandejára ha upéicha omomba’eguasu hikuái Ñanderuetépe, pe Túva Añeteguávape.

Peneñe’ẽrendúke

12Upévarehe che hermanokuéra ahayhuetéva, peẽ peneñe’ẽrenduva’erã aimerõguáicha pende apytépe, ko’ág̃a che aĩ ramojepe mombyry pende rekohágui peneñe’ẽrendúke avei, ha peñeha’ãmba pehupity ryrýi ha kyhyjepópe pene salvacion.

13Ñanderuete voi ningo omoheñoihína pendepype hembipota porã ha Ha’e omongakuaa hembipota pende rekovépe pejapopa peve Ha’e oipotáva guive.

14Pejapo opaite mba’e peñe’ẽngururu’ỹre ha pejepy’apy’ỹre,

15peiko hag̃ua Ñanderuete ra’y ha itajýra añeteguáva ramo ha avave anítei ojohu mba’evai pende rekovépe, oñe’ẽvai hag̃ua penderehe, peiko uvei heko potĩva ramo peikove ramojepe tekove vai ha iñañáva apytépe, pemimbi ha pehesape hag̃ua ko yvy apére ku jasytata omimbi háicha ára rehe.

16Pejejokókena Ñanderuete ñe’ẽ oporomoingovéva rehe, ani hag̃ua ojehecha Hesu Crísto árape añani ha amba’apo rei hague pende apytépe, che avy’aite uvei penderehe.

17Oñekuave’ẽ ramojepe che rete ha amano ramojepe Hesu Crísto rembiapópe, avy’a ha arohory penendive (pejerovia porãháre).

18Upéicha avei pevy’a ha penderory chendive.

Timotéo ha Epafrodíto

19Aha’ãrõ ningo, Hesu Crísto oipota ramo, amondo hag̃ua Timotéope pene rendápe, che py’arory hag̃ua aikuaávo mba’éichapa peikopeína.

20Ambue hermáno ha’eichagua ningo ndarekói, ipy’apeteĩva chendive ha ojepy’apýva añetehápe penderehe, py’a potĩme.

21Opavave ningo oheka imba’erãnte, noñeha’ãi ojapo hag̃ua Hesu Crísto rembipota.

22Peẽ peikuaa voi Timotéo heko porãha, ha’e chemoirũ che ra’y ramoguáicha, omyasãi hag̃ua Ñanderuete ñe’ẽ porãite.

23Aha’ãrõ ningo amondo pya’e ichupe pene rendápe, aikuaa rire mba’épa oikóta chehegui.

24Ajerovia ningo Hesu Crísto rehe, che voi ikatu aha pene rendápe.

25Hi’ã ningo chéve amondo jevyva’erãha che hermáno Epafrodíto pene rendápe, ha’e che pytyvõhára ha che ñorãirõ irũ porãva, peẽ voi pembou ichupe che rendápe che remikotevẽrã reheve.

26Ha’e voi ningo penderecha nga’u, ha ojepy’apyeterei peẽ pehendu haguére ha’e hasy hague.

27Añetehápe ha’e hasyete kuri omano hag̃uáicha; Ñanderuete katu oiporiahuvereko ichupe, ha ndaichupe añói, chéve avei, ani hag̃ua ojo’ave chéve mba’e mbyasy.

28Upévarehe amondo pya’eve ichupe pene rendápe, peẽ pevy’a hag̃ua pehecha jevývo ichupe, ha che chepy’aguapyve hag̃ua avei.

29Pemog̃uahẽke ichupe vy’apópe, Ñanderuete rérape, ha pemomba’e opaite hermanokuérape, oikóva guive ha’e oiko háicha.

30Hesu Crísto rembiapo rehehápe ningo ha’e haimete omano, nahakate’ỹi hekove rehe chepytyvõ porã hag̃ua pene rendaguépe.