1Tetãnguéra peñemoag̃ui joa, peñembyaty joa pehendu porã hag̃ua; peẽ tetãygua pejapysaka porãke. Pe yvy tuichakue ha oimeraẽ oĩva guive ipype, tohendu mba’e heñóiva guive ipype.
2Ñanderuete ipochyhína opaite tetãnguéra ndive, ha isoldádo atykuéra ndive; ohundipáta ichupekuéra ha ome’ẽta ichupekuéra ojejuka hag̃ua.
3He’õnguekuéra oñemombopa reíta opárupi ha inembáta, cerrokuéra jepe hykuepáta huguykuépe.
4Ha umi mbyja ára pegua opa reíta, ha yvagakuéra oñembyapakuáta ku kuatiáicha; ha ho’apáta jasytata, ku parral rogue okúi háicha, ha hígo rogue ho’a háicha.
5Che pochy henyhẽma ku víno omyenyhẽ háicha oka’úvape, ha che kyse puku oguejýta yvágagui Edom ári ohundi hag̃ua ichupekuéra.
6Ñanderuete kyse puku henyhẽ tuguýgui ha ikyrakue otyky ichugui, ovecha ra’yrusu, kavara ruguykue ha ovecha pitikiri’ĩ kyrakuégui; Bósrape oĩta kuave’ẽmby ha Edómpe jejukaguasu Ñanderuetépe g̃uarã.
7Hendivekuéra ho’áta tóro hesaitéva ha tóro ra’yrusu, pe yvy omokõta huguykuéra, ha ikyrakue opytáta yvy abóno ramo.
8Og̃uahẽma pe ára, Ñanderuete omyengovia hag̃ua pe mba’evai ojejapova’ekue Sion rehe.
9Hi’ysyrýgui oikóta asfálto, ijyvy timbógui oikóta azúfre ha Edom yvy opytáta asfálto rendýicha.
10Ndoguemo’ãi pyhare ni arakuépe, tapiaite opu’ãta hatatĩ; tapia g̃uarã itaperéta, araka’evéma avave ndohasaveiva’erã upérupi.
11Oñemomba’éta hese pe guyra pelícano (guyra itĩ mbukúva oikóva ýre) ha pe kui’ĩguasu, pe urukure’a ha pe yryvu oikova’erã ipype; ha Ñanderuete omyasãi upérupi sarambiguasu ha pe yvy iperõta.
12Imburuvichakuéra ndoiporavomo’ãi hetã ruvichápe ha tetã ruvicha ndojekuaaveiva’erã.
13Hogaguasúpe ha hóga yvate oñemombaretéva jerekuévo opu’ãta ñana, pyno ha ñuatĩndy opyta hag̃ua, oiko hag̃ua jaguarundi ha ñanduguasu ombosako’íta avei upépe haityrã.
14Umi mymba ñarõ desiérto pegua ojejohuva’erã jagua hesaitéva ndive, ha añanguéra ohug̃uaitĩta iñirũme; ha porakuéra upépe opytu’úta hapichakuéra ndive.
15Upépe ojehaitypóta mboikuéra ombo’a hag̃ua, upépe ojáta ita’yrakuéra ha oñangarekóta hesekuéra kuarahy’ãme; upépe oñembyatýta avei umi taguato, peteĩteĩva iñirũ ndive.
16Peheka Ñanderuete kuatiañe’ẽme, ha pehecháta ipype ndaipóri iñirũ’ỹre opytáva; ijuru he’ígui upéicha oiko hag̃ua, ha Ipytu Porãite ombyatypáta ichupekuéra.
17Ha Ha’e oity hese po’a jeporavo, ha ipo omboja’o ja’o ichupekuéra opaite ára peve ha oiko hag̃ua opaite árape hetãtee ha imba’eteépe.
Who We AreWhat We EelieveWhat We Do
2025 by iamachristian.org,Inc All rights reserved.
