Matéo 25 - Biblia en Guaraní - ?anderuete ?e’? Por? 2015

Umi 10 kuñataĩ

1Ñanderuete retãguasu ojoguaite 10 kuñataĩme, ojapyhýva hataindynguéra ha osẽva ojohu hag̃ua pe menarãme.

2Umi kuñataĩ apytépe oĩ 5 oñembotavýva, ha 5 iñakãguapy porãva.

3Umi oñembotavýva ogueru hataindynguéra, ndoguerúi katu acéite.

4Ha umi iñakãguapy porãva katu, ogueru avei acéite hataindynguérape g̃uarã.

5Ha hi’arégui ou hag̃ua pe menarã hopehyipa ha okepa joa hikuái.

6Pyhare mbyte rupi katu ohendu hikuái peteĩ osapukáiva: Péina ápe, oúma pe menarã, pesẽmbáke pemoirũ hag̃ua ichupe.

7Upévo opu’ãmba joa umi kuñataĩ ha ombosako’i hataindynguéra.

8Ha umi oñembotavýva he’i umi heko iñakãguapy porãvape: Peme’ẽmína oréve pende aceitemi, ore rataindy ningo oguepotahína.

9Umi iñakãguapy porãva katu he’i: Nahániri, ani hag̃ua ropyta hese’ỹ ore ha peẽ avei, tapeho ha pejogua pe ñemuha rógagui.

10Ha osẽvo hikuái oho hag̃ua ojogua, og̃uahẽ pe menarã, ha umi oñembosako’i porãva’ekue oike hendive pe mendahápe, ha oñemboty pe okẽ.

11Upéi og̃uahẽ avei umi ambue kuñataĩkuéra, ha he’i: Karai, Karai, eipe’amína oréve pe okẽ.

12Ha’e katu ombohovái ichupekuéra: Añetehápe ha’e peẽme, che ndapoikuaái.

13Cháke, peñembosako’íke ndapeikuaáigui mba’e árapepa, ni mba’e hórapepa oúta yvyarigua Ra’y, (Hesu Crísto).

Tembiguái ikatupyrýva ha inãte’ỹva

14Ñanderuete retãguasu ningo ojoguaite peteĩ kuimba’e mombyry ohosévape, ha oho mboyve katu ohenói hembiguaikuérape ha oheja ipoguypekuéra imba’erepyeta.

15Peteĩme, ome’ẽ 100.000.000 guarani rupi, ambuépe 40.000.000 ha ambuevépe 20.000.000 guarani rupi, peteĩteĩvape ome’ẽ ikatu háicha ipu’aka, ha upéi oho.

16Upe 100.000.000 guarani oñeme’ẽva’ekuépe, osẽ omomba’apo pe pláta ha ohupity ambue 100.000.000 guarani.

17Ha upéicha avei pe 40.000.000 oñeme’ẽva’ekuépe, ohupity avei ambue 40.000.000 guarani.

18Ha upe 20.000.000 oñeme’ẽva’ekuépe katu osẽ oho ojo’o peteĩ yvykua ha oñotỹ ijára pirapire.

19Heta ára ohasa rire, ou jevy umi tembiguái jára, ha oporandu peteĩteĩme hembiapokue rehe.

20Ha oñemboja hendápe pe 100.000.000 guarani oñeme’ẽva’ekuépe, ha ogueruve ambue 100.000.000 guarani, ha he’i: Karai, na’ápe nde 100.000.000 guarani remoĩva’ekue che pópe, ha ápe oĩ ambue 100.000.000 guarani, (ahupityva’ekue nde pirapire rupi).

21Ha ijára he’i ichupe: Iporãite, nde ningo che rembiguái mba’eporã ha heko peguáva; nde remba’apo porã haguére sa’i reheve, hetave amoĩta nde poguýpe; eike nde jára vy’ahápe.

22Ha oñemboja avei hendápe pe 40.000.000 guarani oñeme’ẽva’ekuépe, ha he’i: Karai, na’ápe nde 40.000.000 guarani remoĩva’ekue che pópe, ha péina ápe ambue 40.000.000 guarani.

23Ha ijára he’i ichupe: Iporãite che rembiguái mba’eporã ha jeroviahára (fiel), remba’apo porã haguére sa’i reheve, hetave amoĩta nde poguýpe; eike nde jára vy’ahápe.

24Ha ipahápe oñemboja hendápe avei pe 20.000.000 guarani oñeme’ẽva’ekuépe ha he’i: Karai, aikuaa ningo nde ha’eha kuimba’e ipy’a hatãva, ha remono’õva reñemitỹ’ỹ haguérupi, ha rembyatýva remosarambi’ỹ haguérupi,

25akyhyjégui ndehegui añomi yvy guýpe nde pirapire, péina ápe opaite ne mba’e.

26Ha ijára he’i ichupe: Nde, tembiguái ñaña ha iñate’ỹva; mba’éichapa reikuaa amono’õha añemitỹ’ỹ haguégui, ha ambyatyha amosarambi’ỹ haguégui;

27reiporukava’erãmo’ã che pirapire umi mba’erepy omomba’apóva pópe (báncope), ha che aju jevývo aguenohẽva’erãmo’ã che mba’e hi’ariguave mba’e reheve (interes reheve).

28Peipe’a ichugui pe 20.000.000 guarani, ha peme’ẽ pe 100.000.000 oñeme’ẽmava’ekuépe.

29Upe oguerekóvape oñeme’ẽveva’erã oguereko hetave hag̃ua; ha pe oguereko’ỹvagui ojepe’áta oguerekomimíva jepeve.

30Ha pe tembiguái iñate’ỹvape pemombo okápe, pytũháme, ha upépe oiko hag̃ua tasẽ ha tãi pururũme.

Tetãnguéra oñembojovakeha ára

31Pe yvyarigua Ra’y ou vove heko jajaipa reheve, ha yvága rembiguaikuéra hendive, upe árape Ha’e oguapýta iguapyha omimbipávape.

32Ha opaite tetãyguakuéra oñembyatypáta henondépe, ha Ha’e oipe’áta ojoapytégui ku ovecha rerekua oipe’a háicha umi kavara ijovechakuéra apytégui.

33Ha Ha’e omoĩta umi ovecha ijakatúa gotýo, ha kavarakuéra ijasu gotýo.

34Upéramo pe tetã ruvicha he’íta umi ijakatúa gotyoguápe: Peju peẽ che Ruete jehovasápe ha peñemomba’e pe tetãre oñembosako’imava’ekue peẽme g̃uarã ko múndo ñepyrũmby guive.

35Cheñembyahýi ramoguare, peẽ chemongaru; chey’uhéi ramoguare, peẽ chemboy’u; ndacherógai ramoguare peẽ chemog̃uahẽ pende rógape.

36Cheopívo ramoguare, peẽ chemonde; cherasy ramoguare, peẽ che’andu; aĩ ramoguare cárcelpe peho che rendápe che’andúvo.

37Ha umi heko potĩva oporandúta: Karai, araka’épa ore rohecha neñembyahýi ramo ha ore romongaruraka’e, térã ndey’uhéi ramo ha ore romboy’uraka’e.

38Ha araka’épa rohecha oga’ỹre ha romog̃uahẽ ore rógape, térã ndeopívo ramo ha romonde.

39Ha araka’épa rohecha nderasy ramo térã nde reime ramo cárcelpe ha roho ne rendápe.

40Ha pe Tetã Ruvicha he’íta: Añetehápe Che ha’e peẽme, pejapógui péicha peteĩva che hermáno michĩva rehe jepe, cherehe pejapókuri.

41Upéi pe Tetã Ruvicha he’íta umi ijasu gotyoguápe: Pejei che ypýgui peẽ tekove ñañaita ha tapeho pe tata rendy apyre’ỹme oñembosako’imava’ekue pe aña ha umi aña retã rembiguaikuérape g̃uarã.

42Cheñembyahýi ramoguare, peẽ nachemongarúi; chey’uhéi ramoguare, peẽ napechemboy’úi;

43ndacherógai ramoguare, peẽ nachemog̃uahẽi pende rógape; cheopívo ramoguare, peẽ napechemondéi, cherasy ha aĩ ramoguare cárcelpe ndapehói che’andúvo.

44Ha ha’ekuéra he’íta: Karai, araka’épa rohecha neñembyahýi, ndey’uhéi, nanderógai, ndeopívo, nderasy térã nde reime ramoguare cárcelpe, ha noroipytyvõiraka’e.

45Ha Ha’e he’íta ichupekuéra: Añetehápe Che ha’e peẽme, péicha ndapejapói haguére ko’ã che hermáno michĩva rehe, cherehe ndapejapói avei.

46Ha ãva ohóta pe jehavira (castígo) ijapyra’ỹvape, ha umi heko potĩva katu pe tekove ijapyra’ỹvape (Daniel 12,2).