1 Samuel 22 - Biblia en Guaraní - ?anderuete ?e’? Por? 2015

1Upégui David oho ha okañy Adulam itakuaguasúpe; ha ityke’yrakuéra ha itúva rogayguakuéra oikuaávo péva oupa hikuái hendápe.

2Ha oñembyaty hendive opaite kuimba’e ojepy’apýva, umi ndikatúiva opaga icuénta, ha mayma ipy’aróva, ha David oiko huvicha ramo; péicha oiméne 400 kuimba’e oñembyaty hendive.

3Upérõ David osẽ upégui oho hag̃ua Mizpápe, Moab retãme, ha he’i pe tetã ruvichápe: Che ajerurénte che ru ha che sy topyta pende apytépe, aikuaa peve mba’épa che Ruete ojapóta chehegui.

4Ha ogueru ichupekuéra Moab retã ruvicha ypýpe ha oiko hendive hikuái, David oiko aja pukukue pe yvy pehẽngue oñemombarete porãvape tápia ijyvate reheve.

5Ha pe proféta Gad he’i Davídpe: Anivéma reiko ko tetã kóvape; eguata tereho Juda retãme; ha David oho, ha ou Haret ka’aguýpe.

Saul ojuka Nob pa’ikuérape

6Saul ohendu ojekuaamaha David ha iñirũnguéra rapykuere. Upejave Saul oguapyhína Gibéape peteĩ tamarísco yvyra guýpe pe yvy ijyvatevehápe; ha ipópe oĩ ijyvyra puku akua, ha opaite hembiguaikuéra oĩmba joa ijerekuévo.

7Ha Saul he’i hembiguaikuéra ijerekuévo oĩvape: Pehendúke ág̃a, Benjamin ra’yrekuéra. Isai ra’ýpa ome’ẽta avei peẽme yvy ha parralty, ha penemoĩtapa avei 1000 soldádo ruvicha ramo térã 100 soldádo ruvicha ramo.

8Peẽ pepu’ãmba avei cherehe, ha avave nomombe’úi chéve che ra’y ome’ẽha iñe’ẽ Davídpe ha oike hague jekupytýpe Isai ra’y ndive, ha avave pende apytépe ndacheporiahuverekói omombe’u hag̃ua chéve mba’éichapa che ra’y opu’ã cherehe omoirũ hag̃ua che rembiguáipe, chemoñuhã hag̃ua ko’ág̃a ojapo háicha.

9Upévo Doeg, peteĩ Edomgua, oñembo’ýva Saul rembiguaikuéra ykére, he’i: Che ahecha Isai ra’ýpe oĩ ramoguare Nóbpe, Ahimélec, Ahitub ra’y oĩháme.

10Ha ha’e omba’eporandu hese Ñanderuete, ha ome’ẽ ichupe hi’upyrã ha pe kyse puku, Goliat, pe Filisteaygua mba’ekue.

11Ha tetã ruvicha ohenoiuka pa’i Ahimélec, Ahitub ra’ýpe, ha mayma itúva rogaygua ha pa’ikuérape oĩva guive Nóbpe; ha oupaite tetã ruvicha rendápe.

12Ha Saul he’i: Ehendúke Ahitub ra’y. Ha ha’e he’i: Na’ápe aĩ, che jára renondépe.

13Ha Saul he’i ichupe: Mba’érehe piko pepu’ã cherehe, nde ha Isai ra’y, reme’ẽvo ichupe pan ha peteĩ kyse puku, ha remba’eporandu hese Ñanderuetépe, opu’ã hag̃ua cherehe, chemoñuhã ojekuaa porã háicha ko’ág̃a.

14Upémaramo Ahimélec he’i tetã ruvichápe: Mávapa ne rembiguaikuéra apytépe heko joheipyre Davídicha, ha’e avei tetã ruvicha rajy ména, oikóva ne ñe’ẽ poguýpe ha herakuã porã nde rogapýpe.

15Ko ára guivéntepa che amba’eporandu hesehápe Ñanderuetépe. Tamombyry chehegui; anítei tetã ruvicha reity rei ne rembiguái ári ko’ã mba’e, térã che ru rogaygua ári. Ne rembiguái ningo ndoikuaái mba’eve ko’ã mba’égui, taituicha térã taimichĩ.

16Ha tetã ruvicha he’i: Ahimélec katuete nde remanóta, ha mayma nde ru rogaygua nendive.

17Upévo he’i tetã ruvicha iñangarekohakuérape oĩva ijerekuévo: Peju ha pejuka Ñanderuete pa’ikuérape; ha’ekuéra oipytyvõgui Davídpe, oikuaa ramo jepe ha’e okañyha chehegui, ndoikuaaukáiva chéve. Ha umi tetã ruvicha rembiguaikuéra ndoipysoséi ipo ojuka hag̃ua Ñanderuete pa’ikuérape.

18Upémaramo tetã ruvicha he’i Doégpe: Eju nde, ha eikutu pa’ikuérape. Ha Doeg, pe Edomgua, ou ha oikutu pa’ikuérape, ha upe árape ojuka 85 kuimba’épe oñemondéva póncho mbyky inimbo linoguiguápe.

19Ha opaite ambue, pa’ikuéra oikóva guive Nóbpe, ojejuka avei kyse puku rãimbekuépe; taha’e kuimba’e térã kuña, térã mitã okambúva, avei guéi, búrro ha ovecha ombohasapa avei kyse puku rãimbe rupi.

20Ha peteĩ Ahimélec ra’y, Ahitub ra’y, hérava Abiatar, okañy ha oho David rendápe.

21Ha Abiatar omombe’u Davídpe mba’éichapa Saul ojukauka Ñanderuete pa’ikuérape.

22Ha David he’i Abiatárpe: Che aikuaa voi kuri, Doeg, pe Edomgua oĩvo upépe omombe’utaha opaite mba’e Saúlpe. Cherehe omanomba nde ru rogayguakuéra.

23Epyta chendive, ani rekyhyje, pe ohekáva chejuka hag̃ua, ha’e ohekáta avei ndejuka hag̃ua; chendive reiméta kyhyje’ỹre.