Salmokuéra 17 - Biblia en Guaraní - ?anderuete ?e’? Por? 2015

Ñembo’e ojeruréva ñepytyvõ umi oporojopy asývagui -David ñembo’e

1Ehendumína, Nde, che Ruete, ko’ã mba’e heko peguáva, ejapysakamína che mba’ejerure asy rehe. Ejapysakamína che ñembo’e osẽva che juru ijapu’ỹvagui.

2Ne renondépe che añembojovakéta hekoitépe, nde resa ohechapágui.

3Nde rembojovake che py’apy ha Nde cheandu pyharekuépe; Nde chera’ã ramojepe nderejohúi mba’eve, che añeha’ãmba voi ani hag̃ua osẽ che jurúgui mba’eve heko pegua’ỹva.

4Ne ñe’ẽ rupi che ajejoko anítei hag̃ua che ajapo avei yvyarigua rembiapo vai térã aguata jukahára rape rupi.

5Chejokomína Nde, che aguata porã hag̃ua nde rape po’i rupi, ani hag̃ua chepysyrýi ha ha’a.

6Nde, che Ruete, che rohenói cherendu hag̃ua, ejapysakamína ha ehendumi che ñe’ẽ.

7Ehechaukamína nde poriahuvereko porãitéva, Nde ha’égui umi ojejopýva pytyvõhára, ojeroviáva guive nderehe, ha upévagui ehechaukamína chéve nde pu’aka umi nderehe ija’e’ỹvape.

8Eñangarekomína cherehe ku nde resa ra’ỹicha, cheñomi nde pepo guýpe,

9umi iñañáva chejopy asy, umi cherehe ija’e’ỹva chemongora chejuka hag̃ua.

10Oñemboha’éntese, ha hi’ári oñembotuicha ijuru rupi.

11Ko’ág̃a oremuña hikuái, ojesareko hikuái orereity hag̃ua yvýre.

12Ojoguaite hikuái ku leõ ojapyhysévaicha hembi’urãme, ha leõ ra’yrusu omangeáva ñemiháme ojeity hag̃ua hembi’urã rehe.

13Epu’ãmína, Nde, che Ruete, esẽ haperãme, emoñesũ ichupekuéra, ha eñemoĩ iñañáva rehe ha cheguenohẽ, nde kyse puku rupi, iñañáva poguýgui.

14Nde, che Ruete, nde po cheguenohẽ ko’ãichagua tekove ñaña poguýgui, umía oguerekopáma voi ko tekove kóvape g̃uarã, ha omyenyhẽ hikuái hyépe ne mba’e porãgui. Ha omohyg̃uatã porã hikuái ita’yrakuérape ha hemby jevy ita’ýra ra’yrépe g̃uarã.

15Che katu avy’a ahecha guive nde rova, ha apáy vove ama’ẽ nde reko heko pegua rehe, chemohyg̃uatãva ha chembopy’aguapýva.