1Cháke, nde reporohundíva, reñeñandu porã ramojepe gueteri, ha nde reporomondáva, rehasa porã ramojepe gueteri, katuete og̃uahẽta pe ára upe oporohundipa rire ha’e voi oñehundíta avei, ha upe oporomondapa rire oñemonda jevýta avei.
2Ore Ruete, oreporiahuvereko, nderehe rojerovia; Nde voi ningo ore jyva mbarete meme pyhareve, upévare oreguenohẽ ore jepy’apy vaígui og̃uahẽ vove.
3Umi tetã oremondýiva okañymbáta Nde repu’ã ramo ha ohendu guive pe arasunu ryapu.
4Upérõ peẽ pembyatýta pene mba’erepyrã, oñembyaty háicha pe tuku aty ha Asiriayguakuéra opoipáta imba’erepýgui ha peẽ pejeitykuaa hi’ári umi tuku ojeity háicha hembi’urã rehe.
5Ñanderuete ituichaite, Ha’e oiko yvágape, Ha’e omyenyhẽ Sion justícia ha iñembojovake porãgui.
6Ha umi árape oĩta arandu ha py’aguapy, ha pe kyhyje oguerekóva Ñanderuetégui Sion mba’erepy.
7Pema’ẽ porãke, ipy’aguasúva ipytuhẽ itáva ryepýpe ha pe ñe’ẽ ogueraháva ojahe’óta ha ojerure asýta py’aguapy rehe.
8Umi tape ojeguataha rupi oñembyaipa, ndaiporivéima avave oguatáva ipype; oñepyrũmba iñe’ẽme’ẽ rehe, ha ojopy’asyete itavayguakuérape.
9Iperõ pe yvy, oñembyasýta pe tetã, pe Líbano ka’aguy otĩta ha ipirúta; Saron ñu opytáta ku yvy perõváicha, Basan ha Carmélpe ojetyvyropáta.
10Ko’ág̃a apu’ãta, he’i pende Ruete; ko’ág̃a añembo’ýta.
11Peẽ penderyeguasúta kapi’i piru reheve, ha ñana pirueta penemembýta, pene pytuhẽ tatarendýcha, ha kóva penembokusuguéta.
12Ha umi tetã oikóta ku cal ojehapývaicha; ku ñuatĩndy oñekytĩmbyre ojehapývaicha tatápe.
13Pehendúke, peẽ mombyryguáva, Che ajapomava’ekue; ha peẽ ag̃uiguáva peikuaáke chepu’akapa reheve ajapova’ekue.
14Umi iñañáva oryryipa Siónpe, ñemondýi oha’ãrõ’ỹre ou sapy’a umi ojeroviase’ỹva rendápe. Mávapa ñande reheguáva ikatúne oiko pe tata tapia g̃uarãvape. Mávapa ñande reheguáva ikatúne oiko pe tatarendy ogue’ỹvape araka’eve:
15Pe oikóva justícia ha oñe’ẽva hekoite peguáva rehe, pe ojapyhy’ỹva pirapire ojapo hag̃ua mba’evai, pe oityvyróva ipokuéra ani hag̃ua ipojái pirapire ñemiha megua rehe, pe ombotýva ijapysa ani hag̃ua ohendu jukahára rembiapo vai, pe ombotýva hesakuéra ani hag̃ua ohecha mba’evai;
16ko’ãva oikóta umi yvy ijyvatehápe ha hogakuéra ojejapóta itaguasúgui, hembi’u ha hi’y ndopamo’ãi araka’eve.
17Hesakuéra ohecháta Tetã Ruvicha Jajaipávape ha hetã rembe’y ojepyso mombyryetevéta.
18Rejepy’amongeta ñemondyiguasu rehe ha eréta: Moõ piko opyta umi oipapáva ipirapire, moõ piko opyta pe oha’ãva ipirapire balánzape, moõ piko opyta umi oipapáva umi óga yvate oĩva táva tápiape.
19Nderehechamo’ãi umi tetãygua oñembotuichava’ekuépe ha nde nerehendumo’ãvéi iñe’ẽ hasyetéva oñentende hag̃ua.
20Ema’ẽ Sion rehe, ñande areteguasu oĩháme, nde resa ohecháta Jerusalen pytu’u renda porã ramo ha hóga hymbapirekueguiguáva ndojeitymo’ãi, ijyvyra mbyky hakuakuéra (poste’i) ndojepe’amo’ãi ha isãnguéra ndosomo’ãi.
21Añetehápe upépe Ñanderuete ohechaukáta ñandéve heko jajaipa, upépe oĩ ysyry michĩ ha tuicháva, upérupi ndoikoiva’erã canoaty ni ndohasamo’ãi barcoguasu (ygarusu).
22Ñanderuete voi ñane mbojovakehára, Ha’e ñane sãmbyhyhára, Ha’e ñane Retã Ruvicha, Ha’e ñandesalváta.
23Ne sãnguéra ojokóva pe yvyra puku barcoguasu pegua ha oñapytĩva ijao veve (véla) ojerapa. Uperire katuete og̃uahẽta pe ára ñanderehe ija’e’ỹvagui jaipe’áta imba’erepy, ikarẽva jepe ogueraháta imba’erã.
24Ha umi upépe oikóva nde’imo’ãvéima: Cherasy, umi tetãygua rembiapo vaikue oñeperdonámagui.
Who We AreWhat We EelieveWhat We Do
2025 by iamachristian.org,Inc All rights reserved.
