1 Crónicas 16 - Biblia en Guaraní - ?anderuete ?e’? Por? 2015

1Péicha ojegueru Ñanderuete karameg̃ua, ha omoĩ hikuái pe óga mbytépe, David omopu’ãva’ekue; ha oikuave’ẽ hikuái kuave’ẽmby ojehapypáva ha kuave’ẽmby py’aguapy reheguáva Ñanderuete renondépe.

2Ha David oikuave’ẽmba rire kuave’ẽmby, ojehapypáva ha kuave’ẽmby py’aguapy reheguáva, ohovasa hetãyguakuérape Ñanderuete rérape.

3Ha ome’ẽ opaite Israelguápe, kuimba’e ha kuñakuérape, peteĩteĩvape peteĩ pan he’ẽva, peteĩ so’o pehẽngue, ha pan he’ẽ ojejapova’ekue parral’a oñemokãpyrévagui.

4Ha David oiporavo Leviguakuéra apytégui umi ohótava Ñanderuete karameg̃ua renondépe omboete, oagradece ha omomba’eguasu hag̃ua Ñanderuete, Israel Járape:

5Asaf pe peteĩha; ha’e rire Zacarías, pe mokõiha; upéi: Jeiel, Semiramot, Jehiel, Matitías, Eliab, Benaía, Obed-edom ha Jeiélpe, hi’árpa ha imbarakakuéra reheve; Asaf katu pe platíllo mbopuhára.

6Ha pa’ikuéra Benaía ha Jahaziel ombopu trompéta tapiaite Ñanderuete karameg̃ua renondépe.

David ñemomba’eguasu purahéi

7Pe ára pévape, David oñepyrũ omomba’eguasuka Ñanderuetépe Asaf ha iñirũnguéra purahéi ha ñembopu rupi péicha:

8Pemomba’eguasu Ñanderuetépe, pehenói héra ha pemoherakuã hembiapo porã tetãnguéra apytépe.

9Pepurahéike ichupe g̃uarã, pemombe’u hembiapo techapyrãnguéra (milagrokuéra).

10Pemomba’eguasu héra porãite ha tahory umi py’a ohekáva Ñanderuetépe.

11Peheka Ñanderuetépe ha ipu’aka; peheka py’ỹiete hova.

12Peñemomandu’a hembiapo techapyrã Ha’e ojapova’ekue rehe, ha avei techapyrãguasu rehe, ha umi ñe’ẽ ijuru he’iva’ekue rehe.

13Peẽ hembiguái, Israel ñemoñaréva, Jacóbo ra’yrekuéra, peẽ ningo hembiporavopyréva.

14Ñanderuete, Ñandejaratee, opaite yvy ape rehe Ha’e ombojovakehína.

15Ha’e imandu’a iñe’ẽ ome’ẽva’ekue rehe opaite ára, ha iñe’ẽ he’iva’ekue mil ñemoñarenguérape g̃uarã (generaciones).

16Ha’e oñembopy’apeteĩ Abraham ndive, ha ome’ẽ iñe’ẽ Isaácpe;

17ha péva omoañete Jacóbope, iñe’ẽ ha hembiapoukapy rupi, ha Israel ndive oñembopy’apeteĩ tapia g̃uarã,

18he’ívo: Ndéve ame’ẽta Canaan yvy, ne mba’erã ramo.

19Jepevémo ha’ekuéra ndahetái ramo gueteri, okarayguáicha oiko ipype,

20ha oguata peteĩ yvyarigua atyguasúgui ambuépe, ha peteĩ tetãgui ambue tetãme,

21Ñanderuete ndohejái avave ojopyete ichupekuéra, Ha’e ohayhúgui ichupekuéra oinupã umi tetã ambueygua ruvichakuérape.

22Ani hag̃ua ha’ekuéra opoko hembiporavo rehe, ha ani hag̃ua ojapo ivaíva iprofetakuéra rehe.

23Tetãyguakuéra pepurahéi joáke Ñanderuetépe, ko’ẽ ko’ẽ rehe pemoherakuã isalvación.

24Pegueropurahéi tapichakuéra apyte rupi heko jajaipa, ha opaite tetãnguéra rupi hembiapo techapyrãva.

25Mba’eguasuete Ñanderuete, ha hekoitépe oñemomba’eguasuva’erã ichupe ha ichuguínte ojekyhyjeveva’erã opaite ambue jarakuéragui.

26Opaite ambue jarakuéra ta’ãngánte voi, Ñanderuete katu yvagakuéra apohare.

27Ñemomba’eguasu ha teko jajaipa oĩ henonderãme, pu’aka ha tory oĩ hekohápe.

28Upévare tetã ñemoñarenguéra, pemomba’eguasúke ha pemboetéke Ñanderuetépe.

29Pembotuicha hekoitépe, Ñanderuete réra peikuave’ẽ pene me’ẽmby ichupete, ha peju henondépe, peñesũ Ñanderuete heko porãva renondépe.

30Opaite tetãyguakuéra toryrýi henondépe; Ñanderuete omohenda porã ko yvy kóva ani hag̃ua oku’e.

31Upévare pe yvága ha yvy tovy’a ha tetãnguéra te’i: Ñanderuete oisãmbyhy porãmba opaite mba’e.

32Yguasu tahyapu ipypegua oikóva reheve; ñunguéra tahory, ha ipype okakuaáva guive.

33Upérõ yvyrakuéra ka’aguýpe oĩva opurahéita Ñanderuete renondépe, Ha’e ou vove ombojovake hag̃ua ko yvy kóvape.

34Pemomba’eguasu Ñanderuetépe, Ha’e heko porãgui; Ha’e ipy’a porãgui ha iporiahuvereko oĩ tapia g̃uarã.

35Ha peje: Oresalva, ore Ruete oresalvána; orembyaty ndejehe, ha oresalvána tetãnguéragui, romomba’eguasu hag̃ua nde réra porãite, ha rovy’a romomba’eguasúvo.

36Toñemomba’eguasu Ñanderuete, Israel Jára, ára atyguasu guive ára atyguasurã meve. Ha opaite tetãnguéra te’i: Taupéicha, toñemomba’eguasu Ñanderuetépe.

Leviguakuéra oñangareko Ñanderuete karameg̃ua rehe

37Ha David oheja Asaf ha ipehẽnguekuérape Ñanderuete karameg̃ua renondépe, ojapo hag̃ua tapiaite pe karameg̃ua rembiapo hi’araitépe.

38Ha Obed-edom, 68 ipehẽnguekuéra ndive, ha avei Hosa opyta okẽ ñangarekohára ramo.

39Upéicha David omohenda avei pa’i Sadoc ha ipehẽnguekuéra pa’i ramo, Ñanderuete róga jojohuha renondépe yvy yvatépe Gabaónpe,

40oikuave’ẽ hag̃ua upépe tapiaite, pe kuave’ẽmby pyharevegua ha ka’arugua ojehapypáva Ñanderuetépe g̃uarã ikuave’ẽmby renda ári, Ñanderuete rembiapoukapýpe ojehai haichaite, Ha’e ojapoukava’ekue Israelguakuérape.

41Ha hendivekuéra oĩ Heman, Jedutun ha ambue ojeporavo ha oñehenoiva’ekue héra rupi omomba’eguasu hag̃ua Ñanderuetépe, ko purahéi kóva rupi: Ñanderuete py’aporã ndopamo’ãi.

42Ha hendivekuéra oĩ avei Heman ha Jedutun, ombopúva trompéta ha platíllo, ha ambue mba’epu omoirũ hag̃ua avei pe purahéi Ñanderuetépe g̃uarã; ha Jedutun ra’ykuéra oñangareko umi okẽguasu rehe.

43Ko’ã mba’e rire opaite tetãyguakuéra ojevy hógape ha David oho avei omomaitei hag̃ua hogayguakuérape.