Job 9 - Biblia en Guaraní - ?anderuete ?e’? Por? 2015

Job ndaikatúi ombohovái porã Ñanderuetépe

1Job oñe’ẽ jevy, ha he’i:

2Añete ningo, che voi aikuaa porã peichaha; ha mba’eichagua yvyarigua piko oñemoĩ porãkuaa Ñanderuete renondépe, he’ívo ichupe che reko iporãha.

3Oñe’ẽ apisérõ Ñanderuete ndive, ndaikatumo’ãi ombohovái ichupe peteĩ porandu 1.000 apytégui.

4Ha’e ningo iñaranduete ha peteĩ imbaretéva piko osẽ porãnepa oñemoĩvo hese.

5Ipochy rupi oity cérro hendágui, avave oñandu’ỹre.

6Ha’e ningo oguerova pe yvy hendágui ha omboryrýi umi yvy py renda.

7Ha’e he’i kuarahýpe anítei osẽ, ha ha’e nosẽi; ha ndohesapeukái mbyjakuéra.

8Ha’e año oipyso yvagakuéra, ha Ha’e oguata yguasu ape oñemomýiva ári.

9Ha’e ningo ojapo umi mbyja aty: Osa, Orion ha Pléyades; ha ojapo avei umi mbyja aty, pe ñanduguasu, opytáva súrpe.

10Ha’e ojapo mba’eguasuete ndaikatúiva ojekuaa ha imilagrokuéra ojepapakuaa’ỹva.

11Ema’ẽ porãke, Ha’e ohasakuaa che renonderãme, ha che ndahechamo’ãi ichupe, ohasa ramojepe che ypy rupi nañandumo’ãi ichupe.

12Nemandu’a porãke, Ha’e ohekýi ramo peteĩme, mávapa ojokokuaa ichupe. Máva piko he’ikuaa ichupe: Mba’éiko rejaporeína.

13Ñanderuete ndojokomo’ãi ipochy, umi Rahábpe oipytyvõva’ekue Egíptope oñemomirĩva’erã avei ipoguýpe.

14Ha mba’éichapa ambohovaikuaáne ichupe, aiporavo porã ramojepe che ñe’ẽ.

15Chereko porã ramojepe, nambohovaikuaái ichupe, ajeruréta uvei cheporiahuvereko hag̃ua.

16Ahenói ramo ichupe ñembojovake rendápe, ha Ha’e cherendu ramojepe, ndagueroviaichéne ohendutaha che ñe’ẽ.

17Yvytu ratãme Ha’e chemongu’i ha ombohetave hetave che rete aikuéra.

18Ndohejái che apytu’u, chemyenyhẽ uvei angekõi vaietégui.

19Ñañe’ẽ ramo pu’aka rehe, mávapa imbareteve ichugui ha ñañe’ẽ ramo teko porã reheve, máva piko heko porãve ichugui.

20Che añemoĩ porãse ramojepe, che juru voi chemoĩ vaiva’erã, ha ha’e ramo che reko iporãha, ko’ã che ñe’ẽ voi chemoĩ vaipa jevyva’erã hendive.

21Che reko potĩ ramo, ndajepy’apymo’ãi chejehe, namomba’emo’ãi che rekove.

22Peteĩ mba’e hemby gueteri che ha’e hag̃ua: Ñanderuete ohundi heko porãva ha heko vaívape.

23Pe heko potĩva omano ramo jehasa asyguasúpe Ñanderuete oñembohory hese.

24Peteĩ tetã oñemoĩ ramo heko vaíva pópe, Ha’e omo’ã umi oporombojovakéva resakuéra, ha ndaha’éi ramo Ha’e, mávatapa hína aipórõ.

25Che rekove arakuéra ohasa pya’eve marandu rerahahágui, okañymba ha ndohechái mba’eporã.

26Ohasapa ku ygaguasu (canoaguasu) ipya’etévaicha, ku ñapykani, ojepoi háicha hembi’urã ári.

27Ha che añeha’ãmba ramojepe ha ha’e ramo: Cheresaráita che pyahẽ asýgui ha amoambuéta che rova ñembyasy tory rehe.

28Umi mba’e hasýva katu chemyangekõi, aikuaa porã voi ningo Ha’e ndacheguerekomo’ãiha heko potĩva ramo.

29Hesápe che aiko ramo mba’evai apohára ramo, mba’upépa añeha’ã reivéta aiko hag̃ua heko potĩva ramo henondépe.

30Añemopotĩ rire ama rayvi rypy’ápe, térã ajekyty rire havõme,

31upéicha ramojepe chereityva’erãmo’ã yvykua tuju oĩháme, ha che aokuéra jepe ojeguarúta chehegui.

32Ñanderuete ningo ndaha’éi yvyarigua cheichagua, ambohovái hag̃ua ichupe; ha ore rohova’erã oñondive mbojovakehára rendápe.

33Ndaipóri ore pa’ũme mbojovakehára ombojovakekuaáva hekoitépe.

34Ñanderuete tojoko itukumbo, anive hag̃ua chenupã ha che añemondyive.

35Upéramo añe’ẽkuaa, akyhyje’ỹre ichugui, che aikuaa porã katu nda’upeichaitaha.