Provérbios 5 - Biblia en Guaraní - ?anderuete ?e’? Por? 2015

Eñemomombyry kuña heko vaívagui

1Che ra’y, ejapysaka porãke che arandu rehe, ha che akãguapy rehe emoĩ ne apytu’ũme,

2rejepy’amongeta porã hag̃ua, ha ne rembekuéra toñongatu arandu añeteguáva.

3Pe kuña ojekuaa’ỹva rembe omondyky eíraicha, ha ijuru isỹive acéitegui,

4ha amo ipahakuévo katu iro ajenjóicha (ahenhóicha), hakua ku kyse puku hãimbe jováivaicha,

5ipykuéra ojepoi ñemano rape gotýo, iguata oho aña retã gotýo.

6Ha’e nombohapemo’ãi pe tekove rape ha ha’e voi ndoikuaái iguataha rupi, oiko reígui.

7Ko’ág̃akena, che ra’y, cherendu, ha ani reñemboykétei che ñe’ẽgui.

8Eñemomombyry pe kuña heko vaívagui, ha ani reñembojátei hóga rokẽ rehe,

9ani hag̃ua reme’ẽ umi ojeikuaa’ỹvape ne rerakuã porã, ni nde rekove arakuéra ipy’aróvape.

10Ani hag̃ua upe nde reikuaa’ỹva oñemohyg̃uatã nde pirapirégui, ha ani hag̃ua ne rembiapo repykue opyta nde reikuaa’ỹva rógape.

11Ha ne pyahẽ asy amo ipahápe, ikusuguévo nde ro’o ha nde rete,

12ha ere: Chevyroite amboyke haguére che ru rekombo’epy, ha che py’apy ndohayhúi haguére che ru rekombo’e.

13Nahendúikuri umi chemoaranduséva ñe’ẽ, ha namoĩri che apysa umi chembo’éva gotýo.

14Haimetéko ha’apa opaichagua mba’e ivaívape ha mbojovakehára pope, atĩ hag̃ua che rapichakuéra renondépe.

15Hey’u pe y nde ykuateégui ha pe y osyrýva nde yvuteégui.

16Nde yvu toñohẽ hi’y nde kógape ha nde y tosyry nde kokuépe.

17Tanemba’erã añoite ha anítei remboja’o umi reikuaa’ỹva ndive.

18Tojehovasa nde yvu, ha evy’aite ne rembireko teéva ndive, reikuaáva nde karia’y ára guive.

19Ne rembirekoteéva ku guasu kuña ojehayhuetévaicha, ha guasuvira jukyetéicha, ikunu’ũ tanembohory opaite ára, ha imborayhúpe tandepy’a rory tapiaite.

20Ha mba’érehepa nde, che ra’y, neakã rakúta ambue kuña rehe ha reñañuãta upe reikuaa’ỹva rete.

21Yvyarigua rapekuéra oĩmba Ñanderuete resa renondépe, Ha’e oma’ẽ hape po’ikuéra rehe.

22Pe tekove ñaña ho’áta katuete iñaña reko rupi ha hembiapo vaikuéra ojokuáta ichupe isãme.

23Ha’e omanova’erã ndojeheko mbo’éigui, ha heko tarova tuichakue javeve oñehundíta katuete.