Salmokuéra 95 - Biblia en Guaraní - ?anderuete ?e’? Por? 2015

Purahéi omomba’eguasúva Ñanderuete rembiapo, oñemopu’ãmba rire hogaguasu

1Peju, japurahéi vy’apópe Ñanderuetépe, torypápe ñamomba’eguasu pe itaguasu.

2Ñañemboja ijypýpe japurahéi ha ñamomba’eguasu hag̃ua ichupe, ha purahéipe ñamboete ichupe.

3Ñanderuete ituichaiterei, Ha’e yvága Jára Ruvicha voi, opaite ambue jára ári Ha’e oĩ.

4Ipópe oĩmba pe yvy ipypukuvéva; ha umi cérro ijyvatevéva imba’epa avei.

5Imba’e avei pe yguasu, Ha’e ningo ijapohare voi, ha ipokuéra ojapova’ekue ko yvy porãitéva.

6Peju, ñañesũ ha ñañembo’e ichupe, ñamomba’eguasu joaite Ñanderuete, ñande apoharépe.

7Ha’e voi ningo ore Ruete. Ñande, hetãygua ñaĩ iñúme, ha ñande, ijovechakuéra ñaĩ ipópe. Pehendúrõ ko ára kóvape iñe’ẽ,

8ani peñembopy’a hatã, ku Meriba peguaréicha, ku Masa ára peguaréicha pe ñu perõme.

9Upépe pende rukuéra oñemoĩ cherehe, (Ñanderuete rehe), ha’ekuéra ningo chepy’ara’ãva’ekue, ohecha porãmba ramojepe che rembiapokue.

10Ko tetã chembopochyva’ekue 40 áño pukukue, ha Che ha’e: Ko tetã ojavy ipy’apy guive, ha opoi che rapégui.

11Upévarehe pochypópe añe’ẽme’ẽva’ekue: Ndoikemo’ãiha che pytu’uha rendápe.