1Ha Salomon oñembosako’i omopu’ã hag̃uáicha Ñanderuete rogarã ha hogateerã avei.
2Ha Salomon omoĩ 70.000 kuimba’e oguerojapa hag̃ua umi mba’e oñekotevẽva guive Ñanderuete rogaguasúpe g̃uarã, ha 80.000 kuimba’e ojoka hag̃ua itakuéra cérrope, ha 3.600 kuimba’e oñangareko hag̃ua umía rehe.
3Ha Salomon he’iuka Hiram, Tíro retã ruvichápe: Ejapo chendive rejapo haguéicha che ru David ndive, regueruka ramoguare cédro omopu’ã hag̃ua hóga.
4Péina ápe, che amopu’ãta peteĩ óga ore Ruete rérape g̃uarã, ha ambotuicha hag̃ua ichupe, ojehapy hag̃ua mba’e ryakuã porã henondépe, oñemoĩ hag̃ua tapiaite pan ojehechaukátava henondépe ha kuave’ẽmby ojehapypáva Ñanderuetépe g̃uarã pyhareve ha ka’arugua opaite árape, upéicha avei jepytu’uha ára, jasyra’y ha aretekuérape.
5Ha pe óga amopu’ãtava ituichava’erã; ore Ruete, ore Jára, ituichavégui mayma ambue jarakuéragui.
6Ha mávapa ikatu omopu’ã ichupe hogarã, Ha’e ndaijái ramo yvagakuérape jepe, imichĩetereígui ichupe g̃uarã. Ha máva piko che, amopu’ã hag̃ua ichupe hogarã, henondépe ahapy hag̃ua mba’e ryakuã porãva.
7Emboúna chéve, ko’ág̃a peteĩ kuimba’e ikatupyrýva ha omba’apokuaáva óro rehe, pláta rehe, brónce rehe, hiérro rehe, aorã pytã hũva rehe, aorã pytãva ha aorã hovýva rehe, ha omoha’ãngakuaáva ita, ha’e omba’apo hag̃ua umi kuimba’e katupyrýva che ru oiporavomava’ekue ndive.
8Egueruka avei chéve yvyra Líbano peguare: Cédro, cipres ha sándalo, che aikuaa ne rembiguaikuéra oikytĩkuaaha yvyra Líbanope; ha che rembiguaikuéra ohóta ne rembiguaikuéra ndive.
9Ombosako’i hag̃ua chéve heta yvyra, amopu’ã hag̃ua peteĩ ogaguasuetéva.
10Ha péina ápe, umi ne rembiguái mba’apohárape ha umi yvyra kytĩhakuérape, ame’ẽta 4.400.000 kílo trígo, 4.400.000 kílo cebáda, 440.000 lítro víno ha 440.000 lítro acéite.
11Upéramo Hiram, pe Tíro retã ruvicha, he’i kuatiañe’ẽ rupi Salomónpe: Jahve, Israel Jára ohayhúgui Israel retãme, nemoĩma hetã ruvicha ramo.
12Hiram he’i avei: Toñemomba’eguasu Jahve, Israel Jára yvagakuéra ha yvy apohare, ome’ẽ haguére tetã ruvicha Davídpe peteĩ ta’ýra iñarandúva ha iñapytu’ũ porãva, iñakã porãva ha iñakãguapýva, omopu’ã hag̃ua Jahve rogarã (Ñanderuete rogarã) ha tetã ruvicha rogarã.
13Che amondóta ne rendápe peteĩ kuimba’e ikatupyrýva ha iñapytu’ũ porãva, Hiramabípe.
14Ha’e ningo peteĩ kuña Dan tríbu memby, ha itúva peteĩ Tiroygua; ha péva omba’apokuaa óro rehe, pláta rehe, brónce rehe, hiérro rehe, ita ha yvyra rehe, aorã pytã hũva ha hovýva rehe, aorã linoguigua ha aorã pytãva rehe; ha avei omoha’ãngakuaa opaichagua ta’ãnga, ha omoĩkuaa kuatia rehe opaite mba’e ra’ãnga ojejeruréva guive ichupe. Tomba’apo ha’e ne rembiguaikuéra arandu ndive, ha umi che jára, nde ru David rembiguái iñarandúva ndive.
15Ko’ág̃a, nde, che jára, egueruka ne rembiguaikuérape pe trígo, cebáda, acéite ha víno reheve, ere haguéicha;
16ha ore roikytĩta Líbanope umi yvyra reikotevẽva guive, ha roguerahaukáta ndéve ygapépe (bálsape) yguasu rupi Jope peve ha nde reguerahaukáta upégui Jerusalénpe.
17Ha Salomon oipapauka jevy opaite tetã ambueygua oikóva guive Israel retãme, itúva David oipapa riréma, ha oĩ 153.600 kuimba’e.
18Ha ijapyteguikuéra omoĩ 70.000 mba’e rerojahára ramo, 80.000 ita jokaha ramo cérrore, ha 3.600 mburuvicha ramo, omomba’apouka hag̃ua hapichakuérape.
Who We AreWhat We EelieveWhat We Do
2025 by iamachristian.org,Inc All rights reserved.
