1Pegueropurahéi vy’apópe Ñanderuetépe, Ha’e ñanemombaretéva, pepurahéi torypópe Jacóbo Járape.
2Pepurahéi joa, ha pembopu mba’epu pararã, mbaraka ha árpa pu he’ẽ asýva.
3Turu pembopu joáke jasyra’y ha jasy renyhẽ jave, ñande areteguasuha árape.
4Kóva ningo Ñanderuete ñe’ẽ Israélpe g̃uarã ha Jacóbo Jára rembiapoukapy ichupekuéra g̃uarã.
5Ko tembiapoukapy kóva Ha’e ome’ẽ Josépe osẽrõ guare Egípto retãgui. Ahendu peteĩ oñe’ẽva ha ndaikuaái mba’épa he’ise,
6uperire ae ojekuaauka chéve iñe’ẽ: Che aipe’áma pe mba’e pohýi ijati’ýgui ha ajakakuéra ipógui.
7Rehasa asyete jave remba’ejerure asýra’e, ha Che roipe’ava’ekue nde jejopy vaígui, Che rombohovái arai arasunu apytégui, roipy’ara’ã hag̃ua (Israélpe) Meriba y peguápe. Selah
8Ejapysakákena, nde, che retã Israel, Che romomarandu, cherendu hag̃ua.
9Ani reguereko nde apytépe ambue jára, ha ani reñesũ ambue jára reikuaa’ỹva renondépe.
10Che ha’égui nde Ruete, nde Jára, rogueruva’ekue Egípto retãgui. Ejejurupe’a Che romohyg̃uatã porã hag̃ua.
11Che retã katu nohenduséi che ñe’ẽ, ha Israel ndachepotái.
12Upémaramo aheja ichupekuéra, ipy’apy oñemohatãva poguýpe, ha toiko hikuái ha’ekuéra ojehekombo’e háicha.
13Che retã Israel ojapysaka rire che ñe’ẽ rehe, ha oiko rire che rape rehe,
14peteĩ sapy’aitépe aitypava’erãmo’ã umi hese ija’e’ỹvape, ha ahupiva’erãmo’ã che po umi hese oñemoĩva rehe,
15umi ohayhu’ỹva pende Ruetépe oñemomirĩva’erãmo’ã ha oikova’erãmo’ã hikuái opaite árape,
16ha pende Ruete omongaruva’erãmo’ã ichupekuéra trígo iporãvéva ha eíra reheve, oguenohẽva’erãmo’ã ichupekuéra g̃uarã itakuaguasúgui.
Who We AreWhat We EelieveWhat We Do
2025 by iamachristian.org,Inc All rights reserved.
