1 Corintoyguakuérape 6 - Biblia en Guaraní - ?anderuete ?e’? Por? 2015

Mba’éichapa oñembojovake

1Oime ramo pende apytépe ojuavýva hapicha ndive, mba’érehe piko ha’e oho mbojovakehára pende rehegua’ỹva rendápe, oho rãngue iglesiayguakuéra rendápe.

2Térã piko ndapeikuaái Hesu Crísto reheguáva ombojovaketaha ko múndope. Ha peẽ pembojovakéta ramo ko múndope, mba’éicha rupípa peẽ ndaikatúi pembojovake hekópe omoĩ porã jevy hag̃ua umi ojuavýva oñondive mba’e michĩetévape.

3Ndapeikuaái piko ñande voi ñambojovaketaha angelkuérape jepe. Ha mba’eicharupípa upéicharamo peẽ ndaikatúi pembojovake hekópe ko’ã mba’e yvy arigua michĩva.

4Oime ramo ojuavýva pende apytépe umi mba’e yvy arigua michĩva rehe, mba’érehe piko peiporavo peteĩ mbojovakehára oka peguávape, nomomba’éiva (ndorespetáiva) iglésiape, ombojovake hag̃ua Hesu Crísto reheguávape.

5Pomotĩ hag̃ua ningo che ha’e ko mba’e kóva. E’a, ndaipóri piko pende apytépe peteĩnte jepe iñarandúva, ombojovakekuaátava umi oiko vaívape pende apytépe.

6Tekotevẽ piko iglésia reheguáva oñorãirõ peteĩ mbojovakehára ojerovia’ỹva renondépe.

7Mba’evaietéma ningo peẽ pejuavyha oñondive. Mba’érehe piko ndapeguerokirirĩri uvei heko pegua’ỹva ramo. Mba’érehe piko ndapehejáinte ojepe’a rei pene mba’e.

8Peẽ peiko heko pegua’ỹva ramo, ha peẽ peipe’a rei, ha opaite ko’ã mba’e ojehu hermanokuéra apytépe.

9Ndapeikuaái piko peẽ, umi heko vaíva ndoikemo’ãiha Ñanderuete retãguasúpe. Ani peñembotavy pendejupe, umi heko vaíva ndoikeiva’erã Ñanderuete retãguasúpe, ko’ãichagua ha’e: Umi oikóva ijyvyarigua rete rembipota vai poguýpe, umi ta’ãnga omomba’eguasúva, umi omenda ramojepe oikóva avei ambue kuña ndive, umi heko ky’áva, umi kuimba’e oikóva hapicha kuimba’e ndive,

10umi omondáva, umi ha’enteséva, umi ika’úva, umi ombyaise reíva hapicha rekove iñe’ẽvai rupi,.

11Koichaguaréva oiko pende apytépe, ko’ág̃a katu oñemopotĩma Hesu Crísto réra rupi, ha Ñanderuete Pytu Porãite pu’aka rupi oñemopotĩ porãma.

Ñande rete Ñanderuete mba’e

12Opaite mba’e ningo ikatu ajapo, ndaopaitemba’éi katu iporã chéve g̃uarã. Opaite mba’e ija chéve ajapo hag̃ua, upéicha ramojepe ndahejái mba’eve ipu’aka cherehe.

13Pe tembi’u ningo ñande py’ápe g̃uarã, ha ñande py’a ñane rembi’úpe g̃uarã, opáichavo Ñanderuete ombyaíta mokõivévape. Ñande rete katu ndaha’éi teko ky’ápe g̃uarã, Ijapoharépe g̃uarãnte uvei.

14Ñanderuete omoingove jevýgui Hesu Crístope, Ha’e ñanemoingove jevyva’erã avei ipu’aka rupi.

15Ndapeikuaái piko pende rete Hesu Crísto rete reheguaha. Aipe’áne piko Hesu Crísto rete rehegua, ajapo hag̃ua ichugui kuña reko vai rete reheguáva, mba’evéicharamo.

16Térã piko ndapeikuaái upe oikóva kuña reko vai ndive, mokõive tetégui oikomaha peteĩ teténte. Ñanderuete kuatiañe’ẽme he’i voi: Mokõivévagui oiko peteĩ tete año, (Génesis 2,24).

17Pe oñemoirũva Hesu Crísto ndive katu oiko hendive peteĩ pytu porã año ramo.

18Pekañy teko ky’águi. Opaichagua tembiapo vai pe yvyarigua ojapóva ningo oiko hete oka gotýo, pe teko ky’a (oikóva ambue kuña ndive) katu hetetee rehe oñemohembiapo vai.

19Ndapeikuaái piko pende rete Pytu Porãmbáva rogaha, ha pe Pytu Porãmbava oĩ pendepype, ha peẽ napenemba’eveimaha.

20Hepyete Ñanderuete pendejoguava’ekue, upévare pemomba’eguasu avei ichupe pende retepype.