1 Samuel 13 - Biblia en Guaraní - ?anderuete ?e’? Por? 2015

Pe ñorãirõ Filisteayguakuéra ndive

1Saul ombotýma ramo (30) áño, oñepyrũ oisãmbyhy Israel retã ruvicha ramo, ha oisãmbyhy rire mokõi áño,

2Saul oiporavo Israelgua kuimba’ekuéra apytégui 3.000, oiko hag̃ua 2.000 kuimba’e hendive Micmáspe, Bet-el cérrope ha 1000 kuimba’e oiko hag̃ua Jonatan ndive Gibéape, Benjamin reheguápe; ha umi tetãygua hembývape omondo hógape.

3Jonatan ojeity Filisteayguakuéra guárdia ári oĩvahína cérro rembe’ýpe, ha péva ohendu ambue Filisteayguakuéra. Upévare Saul ombopu’uka turu Israel retã rehe, he’ívo: Pehendúke Israelguakuéra.

4Ha Israelguakuéra ohendúvo: Saul ojeity hague Filisteaygua guárdia ári; ha Israel omotĩ hague Filisteayguakuérape, upévare ha’ekuéra oñembyaty Saul ndive Gilgálpe.

5Filisteayguakuéra oñembyaty avei ojeity hag̃ua Israel ári, 3000 ñorãirõ cárro, 6.000 kuimba’e kavaju arigua, ha heta ñorãirõhára ndive, ku yvyku’i yguasu rembe’y peguáicha; ha ojupi ha oñembyaty hikuái Micmáspe, Bet-avénguio kuarahyresẽ gotýo.

6Israel kuimba’ekuéra ojehechávo jejopýpe okañy hikuái itakuápe, yvykuápe, itaguasu ári ha pozokuépe.

7Ha oĩ avei Israelguakuéra apytépe ohasáva hikuái Jordan mboypýri, Gat ha Galaad retãme, Saul katu opyta gueteri Gilgálpe, ha mayma hetãyguakuéra oiko ryryipópe hendive.

8Saul oha’ãrõ 7 ára, Samuel he’i haguéicha ichupe, ha Samuel ndoúi ramo Gilgálpe, Israelguakuéra okañyve ohóvo Saul ypýgui.

9Upémaramo Saul he’i: Peru chéve kuave’ẽmby ojehapypáva ha py’aguapy reheguáva. Ha Saul oikuave’ẽ pe kuave’ẽmby ojehapypáva.

10Ha oikuave’ẽmbávo pe kuave’ẽmby ojehapypáva Samuel og̃uahẽ oúvo; ha Saul osẽ omomaitei hag̃ua ichupe.

11Upéramo Samuel he’i: Mba’éiko rejapóra’e, ha Saul he’i ichupe: Ahechávo tetãyguakuéra okañyve ohóvo chehegui, ha nde nderejúi, ere hague árape, ha Filisteayguakuéra oñembyaty hikuái Micmáspe,

12che ha’e chejupe: Filisteayguakuéra oúta che ári Gilgálpe, ha ndajeruréi gueteri Ñanderuetépe ñepytyvõ rehe. Upévare añeha’ã ha aikuave’ẽ kuave’ẽmby ojehapypáva.

13Upéramo Samuel he’i Saúlpe: Ndetarova, neñe’ẽrendu rire Ñanderuete rembiapoukapy oje’e haguéicha ndéve, Ñanderuete nemoĩ hatãva’erãmo’ã tetã ruvicha ramo opaite árape.

14Ko’ág̃a nande’aremo’ãi tetã ruvicha ramo, Ñanderuete ohekáma ambue kuimba’e oñembopy’apetẽiva hendive ha upéva Ñanderuete oiporavóma avei Israel retã ruvicharã ramo nde remboykégui Ñanderuete ñe’ẽ, Ha’e he’imava’ekue ndéve.

15Upéi Samuel opu’ã ha oho Gilgálgui Gibéape, Benjamin yvýpe. Saul oipapa umi kuimba’e hembýva gueteri hendive, ha opytánte 600 kuimba’e rupi.

16Saul, ita’ýra Jonatan ha hetãyguakuéra oĩva hendive opyta Gibéape, Benjamin yvýpe; ha Filisteayguakuéra opyta Micmáspe.

17Ha umi Filisteaygua atyguasúgui osẽ mbohapy aty omonda hag̃uáicha; peteĩ aty oho Ofra rape rehe, Saul oikoha gotýo;

18ha ambue atyguasu oho Bet-horon gotýo; ha pe mbohapyha oho Zeboim cérro pa’ũ rehe, desiérto gotýo.

19Ha Israel retãme ndojejohúi kuimba’e omba’apokuaáva hiérro rehe; Filisteayguakuéra he’ígui Israelguakuéra ani hag̃ua ojapótei kyse puku ni yvyra puku akua.

20Upévare Israelgua ohomanteva’erã Filisteayguakuéra rendápe ohãimbe’euka hag̃ua ikokue rembiporukuéra: Yvy mbovoha (arádo), ika’apihakuéra (azáda), hachakuéra, térã kyse ty’ãi (guardáña) omono’õ hag̃ua pe trígo.

21Ha Israelguakuéra opagava’erã 7,5 grámo pláta (óro morotĩ) ohãimbe’euka hag̃ua peteĩ arádo ha peteĩ azáda tuicha, ha 3,75 grámo pláta ohãimbe’e hag̃ua peteĩ hácha térã omyatyrõ jevy hag̃ua peteĩ horquílla hierroguiguáva.

22Upéicha rupi pe ñorãirõha árape ndojejohúi kyse puku ni yvyra puku akua Israelguakuéra pópe oĩva Saul ha Jonatan ndive, Saul ha Jonatan añoiténte oguereko ko’ã mba’e ko’ãva.

23Ha Filisteaygua soldadokuéra oñemboja Micmas, oĩháme peteĩ páso.