Números 8 - Biblia en Guaraní - ?anderuete ?e’? Por? 2015

Aaron omyendy pe tataindyenda

1Ñanderuete oñe’ẽ Moiséspe ha he’i:

2Eñe’ẽ Aarónpe ha ere ichupe omyendy hag̃ua pe tataindyenda, oguerekóva 7 tataindy, ohesape hag̃ua henonderãme.

3Ha Aaron omyendy pe tataindyenda, hataindynguéra ohesape hag̃ua henonderã gotýo, Ñanderuete he’i haguéicha Moiséspe.

4Pe tataindyenda ojejapova’ekue órogui; ipyenda guive ijyvotykuéra peve ojejapo oroitégui martíllo mbotápe; Ñanderuete ohechauka haguéicha Moiséspe, upéicha ojejapo avei pe tataindyenda.

Umi Levigua oñemopotĩ Ñanderuetépe g̃uarã

5Ñanderuete oñe’ẽ Moiséspe ha he’i:

6Emboyke Leviguakuérape Israel ñemoñarenguéra apytégui, ha emopotĩ ichupekuéra.

7Péicha remopotĩta ichupekuéra: Ehypýi hi’arikuéra y pe kuave’ẽmby angaipa reheguágui, ha eikytĩmba hete rague kyse hãimbévape, ha ojoheiva’erã hikuái ijaokuéra, pévare ipotĩta hikuái.

8Upéi ogueruva’erã hikuái peteĩ tóro ra’yrusu ha trígo ku’i porã oñembojehe’apyréva acéite reheve, ha peikuave’ẽmbava’erã ambue tóro ra’yrusu reheve kuave’ẽmby angaipa reheguáva ramo.

9Ha embyatypa umi Leviguápe pe óga jojohuha rokẽ renondépe, ha rembyatyukapaiteva’erã avei Israel ñemoñarenguérape.

10Ha oñombyatypa rire pende Ruete renondépe, Israel ñemoñarenguéra omoĩva’erã ipokuéra Leviguakuéra ári;

11ha Aaron omboykéta Leviguakuérape pende Ruetépe g̃uarã, Israel ñemoñarenguéra kuave’ẽmby myatymõiva ramo, ombokatupyry hag̃ua ichupekuéra oservi hag̃ua pende Ruetépe pe óga jojohuhápe.

12Umi Levigua omoĩ mbareteva’erã ipo umi tóro ra’y akã ári; ha oikuave’ẽva’erã peteĩ kuave’ẽmby hi’angaipa reheguáva ha pe ambue kuave’ẽmby ojehapypáva ramo omboete hag̃ua pende Ruetépe ha Leviguakuéra oñemoĩ porã hag̃ua pende Ruete ndive.

13Uperire emohenda Leviguakuérape Aaron ha ita’yrakuéra renondépe, ha’ekuéra oñemboyke hag̃ua kuave’ẽmby ramo pende Ruetépe g̃uarã.

14Péicha emboyke umi Leviguápe Israel ñemoñarenguéra apytégui, ha’ekuéra oiko hag̃ua che mba’etee ramo (ha cheservi hag̃ua).

15Nde, Moises, emopotĩ ha emboyke rire Leviguakuérape pende Ruetépe g̃uarã, ha’ekuéra oñepyrũkuaa hembiaporã pe óga jojohuhápe.

16Umi Levigua che mba’eteégui, opaite Israel ñemoñarenguéra apytégui, opytáta opaite Israel ra’y ypykue rekovia; Che arecebígui ichupekuéra che mba’erã ramo mayma Israel ñemoñare ra’y ypykue rekovia ramo.

17Che mba’e voi ningo mayma ta’ýra ypykue Israel ñemoñarenguéra apytégui, taha’e kuimba’e térã tymba ra’y, ajukauka ramoguare mayma Egípto ra’y ypykuépe, upeguive amboykéma ichupekuéra che mba’etee ramo.

18Upévare Che aiporavo umi Leviguápe mayma Israel ñemoñarenguéra ra’y ypykue rekovia ramo.

19Ha Che amoĩma umi Leviguápe Aaron ha ita’yrakuéra poguýpe omba’apo hag̃ua Israel ñemoñarenguéra rendaguépe pe óga jojohuhápe, ha’ekuéra omoingo porã jevy hag̃ua Israel ñemoñarenguéra pende Ruete ndive, ani hag̃ua ou mba’asy vai Israel ñemoñarenguérape, ha’ekuéra oñemboja ramo pe óga jojohuha rehe.

20Moises ha Aaron ha mayma Israel ñemoñarenguéra ijatýva guive ojapo opaite mba’e Ñanderuete he’iva’ekue guive Moiséspe Leviguakuéra rehe.

21Upéi Leviguakuéra oñemopotĩ ha ojoheiva’erã ijaokuéra; ha Aaron omboykeva’erã ichupekuéra Ñanderuete renondépe ime’ẽmby ramo, ha Aaron oikuave’ẽ kuave’ẽmby angaipa reheguáva Ñanderuete renondépe omoingo porã ha omopotĩ hag̃ua ichupekuéra.

22Upéi Leviguakuéra ou ojapo hag̃ua hembiapo pe óga jojohuhápe, Aaron ha ita’yrakuéra poguýpe; Ñanderuete he’i haguéicha Moiséspe, peichaite ojejapopa avei hesekuéra.

23Upéi Ñanderuete oñe’ẽ Moiséspe ha he’i:

24Umi Levigua ombotýmava guive 25 áño oikeva’erã pe óga jojohuha rembiapópe,

25ha omboty rire 50 áño natekotevẽi omba’apove pe óga jojohuhápe.

26Oĩ ramo ijapytépe omba’aposevéva gueteri, ombotýma ramo jepe 50 áño, ikatu oipytyvõ ityvyrakuérape oñangareko hag̃ua pe óga jojohuha rehe. Péicha rejapova’erã Leviguakuéra rehe, (he’i Ñanderuete Moiséspe).