Isaías 14 - Biblia en Guaraní - ?anderuete ?e’? Por? 2015

Ñembohory Babilónia retã ruvicha rehe

1Ñanderuete oiporiahuverekóta Jacóbope ha oiporavo jevýta Israélpe imba’e ramo, ha omombytu’úta ichupe ijyvyteépe; ha umi tetã ambueygua oñembojáta hesekuéra, ha oikóta hikuái Jacóbo ñemoñarenguéra apytépe.

2Ha umi tetã ojapyhýta ichupekuéra ha oguerúta ichupekuéra ijyvyteépe; ha Israel rogayguakuéra ojapyhýta ichupekuéra hembiguairã ramo Ñanderuete retãme, Israel yvýpe; ha pe tetã oikova’ekue mburuvicha ramo upéi oikóta tembiguái ramo, umi oisãmbyhyva’ekue Israelguápe upéi iñe’ẽrenduva’erã ha ojapóta Israelgua rembipota.

3Ha Ñanderuete nemombytu’úta ne rembiapo pohyikuégui, nde jehasa asy ha nde jepy’apýgui.

4Remoñe’ẽta ko ñe’ẽ ñembohory kóva Babilónia retã ruvicha rehe ha eréta: Mba’éichapa opa rei pe oporojopýva, opa ningo pe táva oporombohasa asýva.

5Ñanderuete omopẽ umi tekove ñaña yvyra po’i, ha ombyai mburuvicha pu’aka.

6Ha’e voi oinupã umi tetã ipochy reheve ha oity ichupekuéra yvýre oiko hag̃ua ambue tetã rembiguái ramo.

7Tetãyguakuéra oiko hag̃ua pytu’u ha py’aguapýpe pe yvy tuichakuépe; opurahéi joa hag̃ua vy’apópe Ñanderuetépe.

8Umi yvyra cipres ha avei umi cédro Líbano pegua jepe he’i joa vy’apópe: Re’a guive, avave ndouvéi orekytĩ hag̃ua.

9Umi omanóva retãygua oñemondýi ndehegui rejúrõ g̃uarã, nde remopu’ã iguapyhaguasúgui mayma mburuvichakue ha tetã ruvichakuépe.

10Ha’ekuéra osapukái joáta ha he’íta ichupe: Nde piko rejúra’e avei nekangy hag̃ua oréicha, ha ojehu avei ndéve pe ojehumava’ekue oréve.

11Ne retã ruvicha reko ojeitýma omanóva retãme, ha nde árpa pu opa rei avei. Ysoita nde rupa ha hasoita neñu’ãma.

12Mba’eichaite piko re’a áragui nde, mbyja ko’ẽ megua, nde. Rejeity yvyete rehe, nde remokangypava’ekue ambue tetãnguérape.

13Nde eremíva nde py’apýpe: Yvágape ajupíta, yvága Jára mbyjakuéra ári amopu’ãta che mburuvicha guapyha, ha jarakuéra oñembyatyhápe pe cérro guapyhápe opytáva nórtepe upépe aguapýta che,

14arai ijyvatetéva ári ajupíta che, ha aikóta pe jára Ijyvatetévaicha.

15Ko’ág̃a katu rejeity omanómava retãme, pe hugua mombyryvehápe.

16Ha upe nderecháva guive ijurujái ha oma’ẽ porã jave nderehe he’íta: Ko kuimba’e kóva omboryryiva’ekue pe yvy ha omyangekõiva’ekue tetãnguérape;

17ohejava’ekue pe yvy ape ku yvy perõváicha, ombyaíva itavakuéra, ha umi oñemosãva’ekuépe araka’eve ndopoiriva’ekue.

18Opaite tetã ruvicha oĩ joa isepultúra ojeguapávape, opytu’u hag̃ua.

19Nde katu reñemombo mombyry nde tyvýgui, ku yvyra roky vaietéicha, ku kyse pukúpe ojejukava’ekuéicha ha ojepoiva’ekue pe tyvy ruguápe; ku te’õnguéicha oñepyrũmbava’ekue ha itápe ojejatypávaicha.

20Nereñeñotỹmo’ãi hendivekuéra, tetã ruvicháicha, rehundi ha rejuka haguére ne retãyguakuérape. Araka’eve noñemomandu’amo’ãvéi tetã ruvicha ñaña ni iñemoñare rehe.

21Pembosako’i ita’yrakuéra ojejuka hag̃ua, ituvakuéra ñañangue rehe, anive opu’ã ha ani oñemomba’étei yvy rehe ha anive ombotapere jevy tavakuéra yvy apére.

22Che apu’ãta hesekuéra, he’i pende Ruete, yvága atykuéra Jára, ahapo’o hag̃ua Babilónia réra ha umi hembymíva gueteri ichugui: Ita’ýra ha heminenonguéra (inietokuéra).

23Ha ajapóta ichugui kui’ĩ raity ha karugua (estéro vaiete); aitypeíta hese typycha ñehundívape, he’i pende Ruete, yvága atykuéra Jára.

Asíria oñehundíta.

24Pende Ruete, yvága atykuéra Jára, ome’ẽ iñe’ẽ ha he’i: Katuete oikóta Che ajepy’amongeta haguéicha, ha ojehupáta Che ha’e hagueichaite;

25ahundíta Asiriayguakuérape che retã yvýpe, ha apyrũta hesekuéra che cerrokuéra oĩháme; icangálla oñemboykéta ichuguikuéra, ha imba’e pohýi (icárga) ojepe’áta ijati’ýgui.

26Ko ñe’ẽ kóva oikóta katuete ko yvy tuichakuére, ha che po ojepysóma tetãnguérare.

27Pende Ruete, yvága atykuéra Jára, he’íva guive oikóta katuete, ha máva piko ikatu ojoko ichupe. Ipo ojepysóma, máva piko omboguevikuaa jevy ipochykue.

Profecía

Filisteayguakuéra rehe

28Pe tetã ruvicha Acaz omanoha áñope, ko profecía kóva oikova’ekue:

29Nde, Filisteaygua retã, ani nderory opẽ haguére ne mbyepotihára yvyra po’i; pe mbói rapógui osẽta ambue mbói ha péva omoheñóita tejujagua.

30Ha’e oñangarekóta umi imboriahuetéva (Israel) rehe, ha umi ohasa asymava’ekue opytu’úta kyhyje’ỹme; ñembyahýi rupi Che ajukáta nde rapo (Filistéa), ha ahundíta ne retãyguakuéra hembyva’ekuépe.

31Ejahe’o nde, táva rokẽme; esapukái nde, táva; nde Filistéa eryryipa; yvatéguio opu’ã ha ouhína tatatĩ (ñehundi), ha avave nokañymo’ãi iñorãirõhára atyguasuetégui.

32Ha mba’épa oje’éta upe tetã remimboúpe. Oje’éta ichupe Ñanderuete omopu’ã jevytaha Jerusalen ha upépe oñembyatytaha umi ohasa asymava’ekue.