Matéo 24 - Biblia en Guaraní - ?anderuete ?e’? Por? 2015

1Hesu osẽ rire Ñanderuete rogaguasúgui, oñemboja hendápe hemimbo’ekuéra ohechauka hag̃ua ichupe Ñanderuete rogaguasu porãngue.

2Hesu katu he’i ichupekuéra: Pehechápa ko’ã mba’e. Añetehápe Che ha’e peẽme ndopytamo’ãiha ita ojo’ári ojeitypa’ỹre.

3Hesu oguapy jave hína pe olívo cérrope, hemimbo’ekuéra oñemboja hendápe, ha’eñoháme, ha oporandu ichupe: Eréna oréve araka’épa ojehúta ko’ã mba’e ha mba’eichagua techaukahápa oĩta nde reju jevy vove ha araka’etépa opáta ko múndo kóva, (ko yvy kóva).

4Ha Hesu he’i ichupekuéra: Pema’ẽ porãke ani hag̃ua avave penembotavy.

5Heta oĩ oútava gueteri che rérape ha he’ítava: Che ha’e pe Crísto ha ombotavýta hetápe.

6Ha pehendu ramo oikoha ñorãirõguasu ha ñorãirõguasurã rerakuã, pema’ẽke, ani peñemondýi, ojehupava’erã ko’ã mba’e; ndaha’emo’ãi gueteri katu pe ára paha.

7Tetãnguéra opu’ãmbáta ojuehe, ha tetã ruvichakuéra ojuehe, ha oúta ñembyahýi ha heta henda rupi oikóta yvy ryrýi.

8Ha ko’ã mba’e ningo pe jehasa asyguasu ñepyrũmbýnte, ku kuña imembymbotávaicha.

9Ha upérõ peẽ peñemyangekõi asýta, ha’ekuéra pendejukáta ha opaite tetãnguéra oñemoĩta penderehe che réra rehe.

10Upéramo heta oñepysãngava’erã ha ho’áta angaipápe, ha oñome’ẽva’erã mburuvicha pópe, ha ndojohayhuveiva’erã.

11Opu’ãva’erã heta proféta gua’u, ha ha’ekuéra ombotavýta hetápe.

12Ha pe ñaña reko okakuaaitereígui, pe mborayhu ho’ysãveva’erã ohóvo.

13Ha upe ogueropu’akáva ipahaite peve, péva ojesalvava’erã katuete.

14Ha Ñanderuete retãguasu ha pe evangélio oñemyasãita oparupiete ko yvy ape ári techaukaha ramo opaite tetãnguérape g̃uarã. Uperire ae oúta pe ára paha.

15Pehecha ramo upe (anticrísto), omongy’áva Ñanderuete rogaguasu oñembo’ývo pe tenda oñemboykéva Ñanderuetépe g̃uarãnte, ku proféta Daniel he’i haguéicha, upérõ ae peikuaáta og̃uahẽmaha pe ára paha, ha upe omoñe’ẽva ko ñe’ẽ kóva tohechakuaa porã opaite mba’e, (Daniel 9,27; 11,31; 12,11).

16Ha upémaramo umi oĩva Judápe tokañy cérro rehe,

17ha upe oĩva hóga ári, ani oguejy ogueraha hag̃ua mba’eve hógagui.

18Ha upe oĩva kokuépe, ani ojevy ijahoja rekávo.

19Angái umi hyeguasúva ha imemby kambúva umi ára umívape.

20Peñembo’e ani hag̃ua pekañy araro’y aja térã sábado árape.

21Upérõ oikóta jehasa asyetereirasáva oiko’ỹ haguéicha gueteri araka’eve ko múndo ñepyrũmby guive aipo ára aipóva peve, ha araka’eve ojehuve’ỹva’erã.

22Ha umi ára umíva noñemombykyvéi ramo, avave ndojesalvamo’ãi; umi ojeporavova’ekue rehehápe katu oñemombykyvéta aipo ára aipóvape.

23Ha aipo ára aipóvape oime ramo he’íva peẽme: Péina ápe Crísto, térã péina pépe, aníke peguerovia.

24Ouva’erã ningo heta Crísto gua’u, ha proféta gua’u ojapóva techaukaha ha tembiapo techapyrãva oporombotavy hag̃ua ha ikatu ramo umi ojeporavopyrévape jepe.

25Ha peikuaa porãke, Che pomomarandumava’ekue rehe.

26Upévare oje’e ramo peẽme: Ma’ẽ, Ha’e oimehína desiértope, ani pesẽtei; térã oje’e ramo, pe ogapýpe oĩha, ani peguerovia.

27Pe aratiri rendýicha oúva kuarahyresẽguio ha ojekuaa pe kuarahyreike gotýo peve, péicha pe yvyarigua Ra’y outavahína ouha árape.

28Upe te’õngue oĩháme, upépe ijatýta avei yryvukuéra.

Mba’épa ojehúta Hesu Crísto ou mboyve

29Ha aipo jehasa asyguasu rire, pe kuarahy iñypytũmbava’erã, ha pe jasy ndohesapemo’ãvéi, ha mbyjakuéra ho’áta áragui, ha yvagakuéra pu’aka oñemongu’epava’erã.

30Ha ojehechaukáta ára rehe pe yvyarigua Ra’y techaukaha; ha opaite yvyariguakuéra oĩva guive yvy apére ojahe’opa joáta oñembyasýgui ha ohechava’erã pe yvyarigua Ra’y oúva arai ári ipu’akaguasu ha heko jajaipa reheve.

31Ha Ha’e omondóta yvága rembiguaikuéra turupuguasu reheve, ombyaty hag̃ua iporavopyrekuérape umi irundyve yvytúguio, pe ára apýra peteĩguio ambue ára apýra peve.

32Peikuaákena pe hígo máta ñe’ẽ mbojoja: Hakãnguéra hoky ha hogue ipyahu ramo peikuaa voi pe ára haku hi’ag̃uimaha oúvo.

33Upéicha avei peẽ. Pehechávo aipo mba’e aipóva peikuaákena che ajupotamaha, che aiméma okẽme.

34Añetehápe Che ha’e peẽme, ndohasamo’ãiha ko’ã ñemoñarenguéra ko’ãva (Israel retãyguakuéra) oikopa peve opaite ko’ã mba’e, (ha’éva guive).

35Yvagakuéra ha yvy ohasapáta, che ñe’ẽ katu ndohasamo’ãi ojejohu’ỹre.

36Upe ára ha upe hóra katu avave ndoikuaái, ni yvága rembiguaikuéra ni yvyarigua Ra’y ndoikuaái, Ñanderuete añoiténte oikuaa umi mba’e.

37Umi Noe ára peguaréicha, upeichaite oikóta avei yvyarigua Ra’y ou jevýrõ g̃uarã.

38Pe amaguasuete mboyve ha’ekuéra okaru, hoy’u, omenda ha oñomomenda, Noe ojupiha ára peve ibarcoguasúpe.

39Umi tetãyguakuéra ndohechakuaái pe amaguasuete ou peve ha ohundi opavavépe, upéicha ojehu jevýta avei yvyarigua Ra’y ou vove.

40Upe ára upévape mokõi kuimba’e oĩta kokuépe, peteĩ ojegueraháta, ha ambue katu opytáta.

41Mokõi kuña oñembisotahína, peteĩ ojegueraháta, ha ambue katu opytáta.

42Upévare peñembosako’i porãke ndapeikuaáigui araka’épa oúta pende Jára.

43Ha kóva peikuaa porã voi: Pe óga jára oikuaa ramo mba’e hórapa oúta pe mondaha, ha’e ndokemo’ãi ha ndohejamo’ãi ojeike hógape.

44Upévare peñembosako’íkena; peha’ãrõ’ỹve javénte oúta yvyarigua Ra’y (Hesu Crísto).

Pe tembiguái hekopegua ha hekopegua’ỹva

45Máva piko pe tembiguaiguasu heko peguáva, ijára ohejáva ipoguýpe hembiguaikuérape omongaru hag̃ua ichupekuéra meme árape hi’órape.

46Ovy’aite pe tembiguaiguasu ou ramo ijára ojohu opaite mba’e ojejapo hekoitépe, ha’e he’iuka haguéicha.

47Añetehápe Che ha’e peẽme, ipoguýpe omoĩmbaitéta imba’erepyeta guive.

48Ha hembiguaiguasu iñaña ramo ha he’i ramo ipy’apýpe: Che jára hi’aréta,

49ha oñepyrũ oinupã hapicha tembiguáipe, ha omoirũ umi okaru ha oka’úvape.

50Ha ou ramo ijára peteĩ ára ha’e oha’ãrõ’ỹve jave, ha peteĩ hóra ha’e ndoikuaaiete jave.

51Ijára ohavira vaimanteva’erã ichupe ha omombóta ichupe umi hova mokõiva apytépe, ha upépe oikóta jahe’o ha tãi pururũme.