Isaías 22 - Biblia en Guaraní - ?anderuete ?e’? Por? 2015

Ñe’ẽ pohýi Jerusalengua rehe

1Marandu jehechauka válle rehegua. Mba’éiko ojehu peẽme, Jerusalengua, pejupi hague pende róga ape ári.

2Nde, nerenyhẽva ayvu ha apañuãigui, nde táva nderoryva’ekue, umi ndepype omanova’ekue nomanói kyse pukúpe térã ñorãirõme.

3Ne ñorãirõhára ruvichakuéra okañy joa guyrapa’ỹre, ha ojepokuapa ojejohúva guive ndepype, ha umi okañýva mombyry jepe ojepokuapa oñondive avei.

4Upévare ha’ékuri: Cherejána peẽ tajahe’o asy hag̃ua, ani peñeha’ãtei chemoangapyhy, oñehundipágui che retãyguakuéra.

5Pe ára péva py’a tarova, jepy’apy asy ha sarambiguasu ouhína Ñanderuete, yvága atykuéra Járagui, pe jehechauka vállepe, oity hikuái táva tápia yvate, isapukái asy oñehendu porã pe cérro peve.

6Elam ogueru ihu’y ryru icarrokuérape ha ikavaju arigua avei, ha Kir oguenohẽ isoldádo rete mo’ãha.

7Nde válle porãitéva, henyhẽmba cárrogui ha umi kavaju arigua oñembyatýma táva rokẽguasu renondépe.

8Ha ojepe’áma Juda ñemo’ãha; ha upe ára upévape Juda oma’ẽ hóga ka’aguy pegua rehe, oñeñongatuhápe iñorãirõ rembiporukuéra.

9Pehecháma David táva tapiakuára oñembohetahína ha pemyenyhẽ y hetágui pe y renda iguy pegua.

10Ha peipapa Jerusalen róga, ha peity umi óga pemyatyrõ hag̃ua itapiakuéra.

11Ha pejo’o peteĩ yvykuaguasuetéva (sánja) umi mokõi táva tápia pa’ũme pemono’õve hag̃ua y pe yrenda tujápe g̃uarã; peẽ katu napema’ẽi pende Apohare rehe, Ha’e voi ombosako’i porãmbava’ekue ramojepe peẽme g̃uarã.

12Upévare Ñanderuete, yvága atykuéra Jára he’iva’ekue peẽme pe ára pévape pejahe’o ha peñembyasy, peñemyakã perõ ha peñemonde ao vosakuépe;

13peẽ katu pevy’asénte, pejuka vaka ha ovechakuéra, pe’u joa so’o ha víno, ha peje: Jakaru ha jay’u, ko’ẽramo ñamanombáta.

14Ko’ã mba’e Ñanderuete, pe yvaga atykuéra Jára he’i chéve che apysa kuápe: Ko’ã pene rembiapo vai ndojepe’amo’ãi pendehegui pemano meve, he’iuka Ñanderuete yvága atykuéra Jára.

Sébna rekovia ojupíta Eliaquim

15Ñanderuete, yvága atykuéra Jára, péicha he’i: Tereho, eike Sébna, pe pirapire rerekua rendápe, pe oñangarekóva tetã ruvicha róga rehe, ha ere ichupe:

16Mba’éiko nde rejapo ko’ápe, térã mávape g̃uarãpa remba’apo ko’ápe, rejo’ose piko ne rendag̃ua ha itaguasu pa’ũme rejapo hag̃ua nde tyvyrã.

17Ejapysaka porãke, Ñanderuete ndeguerahaukáta mbaretépe nemombo hag̃ua mombyry.

18Ha’e nembyapu’áta ha nembyapajeréi hatãta, ku pelótaicha nemombóta peteĩ tetã mombyrýpe ha upépe remanóta, upépe ojegueraháta avei nde carrokuéra nemomba’eguasueteva’ekue, nde ningo remotĩete nde jára róga.

19Che roitýta ne rembiapógui, ha romyañáta tetã ruvicha rógagui.

20Upe ára upévape ahenóita che rembiguái Eliaquim, Hilcías ra’ýpe.

21Ha amondéta hese nde aokuéra, ha amoĩta iku’a jokuaha rehe nde kyse puku, ha ne mburuvicha reko amoĩta ipópe; ha ha’e oikóta peteĩ túva ramo Jerusalen ha Judayguakuérape g̃uarã.

22Ha amoĩta ijati’y ári David róga rokẽ lláve, ha oipe’áta hokẽ ha avave nombotymo’ãi, ombotýta ha avave ndoipe’amo’ãi.

23Ha amoĩ hatãta ichupe ku clávo ojekutu ha opytarõ guáicha hendag̃uáme ha oikóta mba’e ojehayhuetéva guapyha ramo itúva rógape.

24Osãingóta hese itúva rogayguakuéra, ita’ýra ha heminenonguéra (inietokuéra), ha opaichagua tembiporu ojey’uha michĩva, ña’ẽmbe ha kambuchikuéra.

25Upe ára upévape, he’i yvága atykuéra Jára, pe clávo ojekutu hatã haguépe ojeitýta ha ho’áta, ha opẽta umi mba’e oñemosãingomava’ekue hese, péicha he’i pende Ruete.