1Angái, angái umi ohóva Egíptope ñepytyvõ rekávo, ha ojerovia hikuái kavaju, kavaju arigua ha heta cárro rehe; ha ndojeroviái Israel Jára pu’aka rehe, ni ndohekái ichupe.
2Ha’e iñarandu ha oguerukuaa mba’evai, ha katuete ojapóta umi mba’e he’imava’ekue. Ha’e ombyatýta umi iñañávape ipytyvõhára ndive.
3Umi Egiptoygua yvyariguánte avei, ndaha’éi Jaratee, ikavajukuéra to’ónte ha ndaipytúi; Ñanderuete oipyso ramo ipo, ho’áta umi iñañáva ha ipytyvõhára hendive, mokõivéva ikangy joaitéta.
4Ñanderuete he’i chéve péicha: Ku leõ ha ita’yrarusu okororõ háicha hembi’urã ojapyhymava’ekue ári, ha oñembyaty ramojepe umi ovecha rerekua omondýi hag̃ua isapukáipe, noñemondyimo’ãi, ha ndokyhyjemo’ãi pe tyapu ojapóvagui hikuái; upeichaite Ñanderuete oguejýta Sion cérrope oipytyvõ hag̃ua hetãyguakuérape.
5Umi guyra oveve háicha haity ári oñangareko hag̃ua ita’ýra rehe, péicha Ñanderuete, yvága atykuéra Jára, omo’ãta Jerusalénpe osalva hag̃ua itavayguakuérape.
6Peẽ Israel ñemoñare pepu’ãva’ekue Ñanderuete rehe, peju jevýke hendápe.
7Ha upe ára upévape umi yvyarigua omombopáta ijára gua’u ra’ãngakuéra ojejapova’ekue pláta ha órogui, umía angaipavóra po rembiapónte.
8Upérõ Asíria ho’áta, ndo’amo’ãi kuimba’e kyse puku rupi, peteĩ omano’ỹva kyse puku rupi ohundíta ichupe; okañýta hikuái kyse pukúgui, ha imitãrusukuéragui oikóta hembiguaikuéra ramo.
9Hetã ruvichaguasu ryryipópe oñehundíta, ha imburuvichakuéra oñemondýigui ohejáta ipoyviveve, péicha he’i Ñanderuete, hata oĩhína Siónpe, ha hatakua Jerusalénpe.
Who We AreWhat We EelieveWhat We Do
2025 by iamachristian.org,Inc All rights reserved.
