Ezequiel 32 - Biblia en Guaraní - ?anderuete ?e’? Por? 2015

Pe tejujagua

1Ojehu pe áño 12-hápe, pe jasy 12-hápe, pe ára peteĩháme, Ñanderuete ñe’ẽ ou chéve ha he’i:

2Kuimba’e ra’y, epurahéi ñemano jahe’o purahéi faraon rehe, Egípto retã ruvicha, ha ere ichupe: Rejoguaite leõ ra’ýpe tetãnguéra apytépe, ha reiko ku tejujaguáicha ysyryguasu Nílope ha reipeju hatã ne tĩ rupi nde ysyrykuéra, rembotyai pe y nde pykuérape, ha reipyvu pyvu ysyrykuéra.

3Péicha he’i pende Ruete: Che aipysóta ndeári che red heta tetã rupi, ha’ekuéra neguenohẽ hag̃ua che rédpe.

4Che roitýta yvy ape ári, romombóta ñu nandihápe, amboguejýta ndeári opaite guyra árare ovevéva, ha amohyg̃uatãta nde ro’okuégui opaite mymba saite yvy ape ariguáva.

5Nde ro’okue amoĩta umi cérro ári, ha ne re’õnguégui amyenyhẽta umi cérro pa’ũ.

6Ha ambohykuéta nde ruguýpe ko yvy umi cérro ru’ã meve, ha umi yakã henyhẽmbáta nde ruguýgui.

7Ha ág̃a remano ramo, añu’ãta umi ára, ha amoypytũta mbyjakuéra; amo’ãta pe kuarahy araípe, ha pe jasy ndohesapemo’ãvéi.

8Nderupi amoypytũmbáta mbyjakuéra hendýva árare ha ajaho’íta pytũme ne retã, he’i pende Ruete.

9Heta tetã ojepy’apýta oikuaa vove Che rogueraha hague jepokuapýpe umi tetã apytépe, umi tetã nde ndereikuaáivape.

10Che roityha árape amopy’andýita nde rupi heta tetãme; umi tetã ruvichakuéra oñemondyipáta ndérupi, ág̃a ambovera vera vove che kyse puku hovakuéra renondépe, ha oryryipáta hikuái okyhyjégui omano ramog̃uarã avei.

11Péicha he’i pende Ruete: Babilónia retã ruvicha kyse puku oúta ndeári.

12 Isoldádo aty iñarõvéva aitýta ne retã ári, ha’ekuéra imbareteiterei ha ohundíta Egípto pu’aka ha omosarambipáta hetãyguakuérape.

13Hymbakuéra ahundipáta y rembe’ýpe; ha yvyarigua py ha hymba pysãpẽnguéra nomongy’aveiva’erã hi’y.

14Upéi amopotĩ jevýta hi’y ha ambosyrýta ijysyrykuéra acéiteicha, he’i pende Ruete.

15Amoperõta Egípto retã, ha amonandíta opaite mba’e ipype oĩva ajukapa peve mayma ipype oikóvape, ha oikuaáta hikuái Che ha’eha pe Oikovéva tapia g̃uarã.

16Kóa ningo pe purahéi ñemano jahe’o reheguáva, ojepuraheiva’erã jahe’ópe; tetãnguéra rajy opurahéita jahe’opópe Egípto ha hetãyguakuéra rehe, he’i pende Ruete.

17Pe áño 12-hápe, pe jasy peteĩháme, pe ára 15-hápe, Ñanderuete ñe’ẽ ou chéve, ha he’i:

18Kuimba’e ra’y, epurahéi peteĩ ñemano jahe’o rehegua purahéi Egípto retã rehe ha umi tetã ijykére oĩva guive rehe, ha eity ichupekuéra pe yvykua pypukuhápe, umi omanomava’ekue apytépe.

19Neporãiteve piko ambuekuéragui. Eguejy ha eñeno umi ipire’i oñekytĩ’o’ỹva ndive.

20Re’áta umi kyse pukúre umi omanova’ekue ndive; kyse pukúpe ho’apáta, upévagui egueru ichupe hetãygukuéra ndive.

21Upérõ umi soldádo imbaretéva, ipytyvõhára ndive, he’i joáta omanóva retã guive: Ha’ekuéra oguejýma ha oñeno umi ipire’i oñekytĩ’o’ỹva ndive, kyse pukúpe omanomava’ekue ndive.

22Upépe oĩ Asíria soldádo atyguasu; ijerekuévo oĩ ityvykuéra (isepultúra), umíape ho’ava’ekue kyse pukúpe.

23Ityvykuéra oñemoĩ pe yvykua pypukúpe, ha hapichakuéra oĩmba ityvy jerekuévo; umi ho’amava’ekue kyse puku rupi omyasãiva’ekue kyhyje oikovéva apytépe.

24Upépe oĩ Elam, ha opaite isoldadokuéra oñenomba ityvy jerekuévo, umía ho’ava’ekue kyse puku rupi ha oguejyva’ekue ipire’i oñekytĩ’o’ỹre pe yvykua pypukuvehápe, ha’ekuéra omyasãiva’ekue kyhyje umi oikovéva apytépe, ha ko’ág̃a katu oñemotĩ ityvýpe ambuekuéra oguejyva’ekue avei hendivekuéra.

25Ome’ẽ ichupekuéra hendag̃ua umi omanomava’ekue apytépe ha isoldadokuéra oĩmba ityvykuéra jerekuévo ipire’i oñekytĩ’o’ỹva apytépe, kyse pukúpe omanombava’ekue, ha omyasãiva’ekue kyhyje umi oikovéva apytépe, ha ág̃a oñemotĩ oñeñotỹ ityvýpe ambuekuéra ndive, oguejy ha omoñeno ichupekuéra ojejukava’ekue apytépe.

26Upépe oĩ Mesec ha Tubal, ha mayma hetãyguakuéra ityvy jerekuévo, ipire’i oñekytĩ’o’ỹva’ekue, kyse pukúpe ojejukava’ekue, omyasãigui kyhyje umi oikovéva apytépe.

27Noñemoĩri soldadokuéra ipy’aguasúva apytépe yma omanomava’ekue, oguejyva’ekue umi omanóva retãme hembiporu ñorãirõ megua reheve, ha ikyse pukukuéra oñemoĩ iñakã guýpe; ha hembiapo vai katu oja ikangue rehe ha hete mo’ãha oĩ hetekue ári omongyhyje haguére umi oikovévape.

28Nde, Egípto, rejepy’apy asýta umi ipire’i oñekytĩ’o’ỹva apytépe, ha reñenóta umi kyse pukúpe omanova’ekue ndive.

29Upépe oĩ Edom, hetã ruvichakuéra ha imburuvichakuéra, ipy’aguasuete ramojepe oñemoĩ hikuái umi kyse pukúpe ojejukava’ekue apytépe; oñenóma umi ipire’i oñekytĩ’o’ỹva ndive, oguejymava’ekue avei ityvýpe (isepultúrape).

30Upépe oĩmbaite umi mburuvicha nórte pegua ha mayma Sidon pegua, oguejyva’ekue omanómava apytépe, umi ipire’i oñekytĩ’o’ỹva apytépe, oñeno hikuái umi kyse pukúre ojejukava’ekue ndive, ha opyta otĩvo ambuekuéra oguejyva’ekue ndive avei ityvýpe.

31Faraon ohechapáta ko’ãvape ha oñemoangapyhykuaa mayma hapicha aty ndive; faraon omanóta avei kyse pukúpe ha hendive isoldádo aty, he’i pende Ruete.

32Ha’e omongyhyje haguére umi oikovévape, faraon ha mayma isoldádo aty ojepyso joáta umi ipire’i oñekytĩ’o’ỹva apytépe, umi kyse pukúre omanova’ekue ndive, he’i Ñanderuete.