1Moises he’i ko’ã ñe’ẽ mayma Israel ñemoñarenguérape desiértope, Jordan rembe’y asúpe, kuarahyresẽ gotýo, ñuguasu Arabápe, Suf rovái, Paran, Tofel, Laban, Hazerot ha Dizahab pa’ũme.
211 ára ojeguata’arã ojehupity hag̃ua Horébgui, Seir cérro, Cadesbarnéa peve.
3Ha ojehu pe áño 40-hápe, pe jasy 11 hápe, pe ára peteĩháme, Moises oñe’ẽ jevy Israel ñemoñarenguérape opaite mba’e Ñanderuete he’imava’ekue ichupekuéra,
4ha ombopoguy rire Sehónpe, Amorguakuéra retã ruvicha, oikova’ekue Hesbónpe ha Ógpe, Basan retã ruvicha, oikova’ekue Astarótpe, Edrei ypýpe.
5Jordan rembe’y asúpe, Moab retãme, Moises omyesakã ko’ã tembiapoukapy ha he’i:
6Jahve, Ñanderuete, oñe’ẽkuri ñandéve Horébpe, ha he’i: Aréma peime hague ko cérrope.
7Pepu’ã ha tapeho Amorgua cérrope ha opaite umi oikóva upérupi, pe ñuguasu Arabápe, pe cérro ha umi ñu oĩva Négev guive ha yguasu rembe’y peve, oĩva Canaangua yvýpe, ha yvate gotýo Líbano peve, ha kuarahyresẽ gotýo pe ysyryguasu Éufrates peve.
8Pehechakuaáke, Che ame’ẽmaha peẽme ko’ã tetãnguéra yvy; pembopoguy ha peñemomba’e hag̃ua ijyvykuéra rehe, pende Ruete he’iva’ekue ome’ẽtaha Abraham, Isaac, Jacóbo ha iñemoñarenguérape.
Ojeporavo mbojovakehára9Umi ára umívape che, Moises, añe’ẽ ha ha’eva’ekue peẽme: Che año ndaikatúi añangareko penderehe.
10Ñanderuete penembohetaitereíma, ha péina ápe peẽ pendereta mbyjakuéra ára peguáicha.
11Ñanderuete, pende rukuéra Jára, tapenemboheta 1.000 jevyve gueteri ha tapenderovasa, Ha’e opromete haguéicha peẽme.
12Mba’éichapa che año aguerahapáta pene rembipota vai ha pene ñe’ẽ jejuavy (pléito).
13Peme’ẽna chéve pende apytégui, pende tribukuéra apytégui, kuimba’ekuéra iñarandúva, iñakã porãva ha ikatupyrýva, amoĩ hag̃ua ichupekuéra pene mburuvicha ramo.
14Ha pechembohovái chéve péicha: Iporã rojapopa pe nde eréva.
15Ha peiporavo pende tribukuéra apytégui umi kuimba’e iñarandu ha ikatupyrýva, ha umívape che amoĩ pene mburuvicha ramo, 1.000 ári, 100 ári, 50 ári, ha 10 kuimba’e ári, ha pende tríbu sãmbyhyhára ramo.
16Upéramo ha’eva’ekue pene mbojovakehárape: Pejapysaka porãke pene pehẽnguekuéra rehe, ha pembojovake hekoitépe pene pehẽnguekuérape ha tetã ambueyguakuérape.
17Aníke pegueraha rei avavépe mbojovakehára rendápe; pehenduva’erã michĩva ha tuichávape; ndapekyhyjeiva’erã avavégui, Ñanderuete mba’e ningo pe ñembojovake; ha pe ñembojovake hasyeterei ramo peẽme, pegueru chéve, che pohendu hag̃ua.
18Upéramo ha’emava’ekue peẽme opaite mba’e pejapova’erãva guive.
Umi 12 mañahára rembiapo19Ha ñasẽvo Horébgui, jahasapákuri pe desiérto ndetuichaitéva ha ñanemongyhyjéva rupi, peẽ pehechamava’ekue, Amorguakuéra yvy rape rehe, Ñanderuete he’i haguéicha ñandéve; ha ñag̃uahẽ Cadesbarnéape.
20Upépe che ha’eva’ekue peẽme: Ñag̃uahẽma Amorguakuéra cérrope, Ñanderuete ome’ẽmava’ekue ñandéve.
21Peikuaa porãke, Jahve, Ñanderuete ome’ẽ peẽme ijyvy, upévare tapeho ha pemoĩ hetayguakuéra pende poguýpe, Ñanderuete, ñande rukuéra Jára he’i haguéicha peẽme, ani pekyhyjétei ha ani pendepy’akangýtei.
22Ha pejupa che rendápe, ha peje: Ñamondóna ñane renonderãme kuimba’ekuéra ohecha hag̃ua ñandéve upe yvy upéva ha ou jevývo toikuaauka ñandéve pe tape mamo rupípa jahakuaa ha mba’eichagua távapepa ñag̃uahẽ’arã.
23Ha umi mba’e peẽ pejeva’ekue ningo ajohu porã, upévare aiporavo 12 kuimba’e pende apytégui, peteĩ kuimba’e peteĩteĩ pende tribukuéragui.
24Ha oho hikuái ha og̃uahẽvo pe cérrope, oike Escol cerrokuéra pa’ũme, ha omaña porãmba hikuái.
25Ha ogueru hikuái ñandéve umi yva omono’õva’ekue upépe, ha omba’emombe’u ñandéve, ha he’i: Iporãha pe yvy Jahve, Ñanderuete, ome’ẽtava ñandéve.
26Peẽ katu ndapehosevéi, pepu’ã uvei Jahve, Ñanderuete rehe;
27ha peñe’ẽguyguy pende rogakuérape, ha peje: Ñanderuete nañanderayhúigui ñanerenohẽva’ekue Egípto retãgui, ha ñandereity Amorguakuéra pópe ñanehundi hag̃ua.
28Ore pehẽnguekuéra orembopy’amirĩ ha he’i hikuái: Ko’ã tetãyguakuéra ituicha ha ijyvateve ñandehegui, itavakuéra ituichaiterei ha itáva kora jere ijyvate ára peve; ha avei rohecha upépe umi Anac ra’yrekuérape (gigantekuérape).
29Upéramo ha’éma peẽme: Ani pendepy’akangýtei, ha ani pekyhyje ichuguikuéra.
30Ñanderuete, Ñandejára, ohóta ñane renonderãme, Ha’e oñorãirõta ñanderehe ojapo haguéicha ñande resa renondépe Egípto retãme.
31Ha pe desiértope pehecháma mba’éichapa Jahve, Ñanderuete, ñandegueruva’ekue ñag̃uahẽ meve ko’ápe, ku túva ogueru háicha ita’ýrape ijyva ári.
32Ha upeichavérõ jepe peẽ ndapegueroviái Ñanderuete, Ñandejárape.
33Ha’e ohóma ñane renonderãme ohechauka hag̃ua ñandéve pe tape tatarendy térã arai rupi, ha Ha’e he’i avei ñandéve moõpa japytáta pyharekuépe.
Ñanderuete ohavira Israelguakuérape34Ha Ñanderuete ohendu pene ñe’ẽngururu pejeva’ekue, ha ipochýgui ome’ẽ iñe’ẽ he’ívo:
35Ko’ã tekove ñaña ñemoñare ndohechamo’ãi pe yvy porã aprometeva’ekue ituvakuérape,
36Caleb katu, Jefune ra’y, ohecháta pe yvy; ichupe ha ita’yrakuérape ame’ẽta pe yvy ha’e opyrũva’ekue, oiko haguére hekoitépe pende Ruete rapykuéri.
37Ha peẽrupi Ñanderuete ipochy avei chendive, ha he’i chéve: Ndereikemo’ãi avei pe tetã pévape.
38Josue, Nun ra’y, ne rembiguái, ha’e oikéta avei upépe; emokyre’ỹ ichupe, ha’e ome’ẽtagui Israelguakuérape pe yvy imba’etee ramo.
39Umi mitã peguerekóva ha pejeva’ekue ho’apataha penderayhu’ỹva pópe, umi mitã umía oikuaa’ỹva gueteri ivai térã iporãva, umía oikeva’erã upépe, ha ichupekuéra ame’ẽva’erã pe yvy imba’eteérãva ramo.
40Ha peẽ pejevy ha tapeho desiérto rehe, Yguasu Pytã rape gotýo.
Hormápe oikova’ekue sarambiguasu Israelguakuéra apytépe41Upéramo pejékuri chéve: Roñemoangaipa Ñanderuete rehe; ore rohóta ha roñorãirõta, Ñanderuete he’i haguéicha oréve. Ha peteĩteĩva oñembosako’i iñorãirõ rembiporu reheve oho hag̃uáicha upe cérro upévape.
42Ha Ñanderuete he’i chéve, ere ichupekuéra: Ani ohótei ha ani oñorãirõtei, naiméigui penendive; ani hag̃ua ojapo sarambi pendehegui umi penderehe ija’e’ỹva.
43Ha ha’epa rire peẽme, napeneñe’ẽrenduséi; pepu’ã uvei Ñanderuete rehe, ha tova’atã ha ñembotuichapópe, pehókuri pe cérrope peñorãirõ hag̃ua.
44Upérõ Amorguakuéra, oikóva pe cérrope, ojeity pendeári ha kávaicha penemuña, ha sarambi ojapo pendehegui Seir guive Horma peve.
45Ha pejevývo penerasẽ Ñanderuete renondépe, ha Ñanderuete nohendúi pene ñe’ẽ, ni ndojapysakái penderehe.
46Upévare pehasa asy, peiko aja Cadéspe.
Who We AreWhat We EelieveWhat We Do
2025 by iamachristian.org,Inc All rights reserved.
