Salmokuéra 118 - Biblia en Guaraní - ?anderuete ?e’? Por? 2015

Mba’e ndetuicháva Ñanderuete ojapo

1Pemomba’eguasúke Ñanderuetépe, py’aporã ha imborayhu ndopái araka’eve.

2Israel retã te’i: Ñanderuete mborayhu ndopamo’ãi araka’eve.

3Aaron róga te’i: Imborayhu ndopamo’ãi araka’eve.

4Umi okyhyjéva Ñanderuetégui te’i: Imborayhu ndopamo’ãi araka’eve.

5Ajepy’apy jave ahenói Ñanderuetépe, ha Ha’e cherendu ha chemosãso.

6Ñanderuete oĩ guive chendive ndakyhyjemo’ãi yvyarigua rembiapo vaígui.

7Ñanderuete chepytyvõgui cherayhu’ỹva oñehundíta.

8Iporãve jajerovia Ñanderuete rehe jajerovia rãngue yvyarigua rehe.

9Iporãve jajerovia Ñanderuete rehe jajerovia rãngue mburuvichakuéra rehe.

10Mayma tetã ojerovia’ỹva Ñanderuete rehe chemongora ramojepe ahundipáta ichupekuéra Ñanderuete réra ha ipu’aka rupi.

11Opáguio ha’ekuéra chemongora ramojepe ha ojerepa cherehe hikuái, Ñanderuete rérape katuete ahundipáta ichupekuéra.

12Ku la réina omumumba cherehe hikuái, ku tata ohundi háicha ñuatĩ piru, péicha ahundíta ichupekuéra Ñanderuete rérape.

13Chemyaña hatã hikuái chereity hag̃uáicha, Ñanderuete katu ou chepytyvõ hag̃ua.

14Ñanderuete chemombarete ha upévare aropurahéita ichupe, Ha’émante cheguenohẽ che jejopy vaígui.

15Oñehendu heko potĩva rógape peteĩ sapukái rory ha ñepytyvõ reheguáva, Ñanderuete po akatúape oĩgui pu’akaguasu.

16Ñanderuete ohupi ramo ipo akatúa ohechaukáta ipu’aka.

17Namanomo’ãi, aikovéta uvei, amombe’u hag̃ua Ñanderuete rembiapokuéra.

18Ñanderuete chehavira pohyietéma, ndacherejái katu amano.

19Peipe’a chéve g̃uarã Ñanderuete rogaguasu rokẽnguéra aike ha amomba’eguasu hag̃ua Ñanderuetépe.

20Kóva Ñanderuete rokẽ, pévarupi oikeva’erã umi heko potĩva.

21Che amomba’eguasu ichupe, cherendu ha chepytyvõ porãgui.

22Pe itaguasu (Hesu Crísto) umi óga mopu’ãhára omboykeva’ekue, péva ningo pe itaguasu ojeporúva pe óga py rendag̃ua.

23Ko’ã mba’e oiko Ñanderuete rupi, ha topyta mba’e techapyrãva ramo ñande resápe g̃uarã.

24Ko ára kóvape Ñanderuete ombosako’i, upévare javy’aite ha ñanderory hesehápe.

25Nde, ore Ruete, ko’ág̃a orepytyvõmína osẽ porãmba hag̃ua oréve.

26Tojehovasa pe oútava Ñanderuete rérape; Ñanderuete rogaguasu guive ore pohovasa.

27Ñanderueténte yvága atykuéra Jára, Ha’e ningo ore resape, pemosã umi kuave’ẽmby renda ratĩ rehe umi tymba oñekuave’ẽtava.

28Nde ningo che Jára, romomba’eguasúta; Nde che Ruete, che romboetéta.

29Pemomba’eguasúke Ñanderuetépe, Ha’e ipy’a porãitégui ha iporiahuvereko oikóta opaite árape.