Job 40 - Biblia en Guaraní - ?anderuete ?e’? Por? 2015

1Ñanderuete ombohovái Jóbpe, ha he’i:

2Iñarandu piko pe oñe’ẽ pohyiséva Yvágajára ndive. Pe chembojovakeséva tombohovái raẽ ko’ã mba’e aporanduva’ekue.

3Upémaramo Job oñe’ẽ Ñanderuetépe, ha he’i:

4Péina ápe, che chemichĩeterei ningo, mba’éiko ambohováita ndéve. Che pópe amboty che juru akirirĩete hag̃ua.

5Hetáma añe’ẽ, nañe’ẽsevéima, akirirĩeténtema.

Ñanderuete ohechauka ipu’aka

6Ñanderuete ombohovái Jóbpe pe yvytu jepoka ratã guive, ha he’i:

7Ejeku’akuáke ko’ág̃a kuimba’e ipy’aguasúvaicha, Che aporandúta ndéve, ha nde chembo’éta.

8Nde ningo ere Che ajavy hague ambojovake jave nde rekove, nde chemboheko vaisénte remoĩ porã hag̃ua nde reko.

9Nde jyva (pu’aka) piko ku nde apohare jyváicha. Ha osunu piko ne ñe’ẽ che ñe’ẽicha.

10Upéicharamo eñembojeguáke mburuvichaguasu rekógui, ha eñemondéna teko porãme.

11Eñohẽna nde pochy, ema’ẽ mayma oñembotuicháva rehe, ha eity ichupekuéra.

12Ema’ẽna mayma oñembotuichávare, emomirĩ ha ehundi umi tekove ñañáme mamo oĩháme,

13eñotỹmba umívape yvyku’i guýpe, emboty hovakuéra pytũ guýpe.

14Upérõ Che ahechakuaáta avei nde po akatúa nepytyvõ hague.

15Ema’ẽna pe mymba saite Behemot rehe, ichupe ajapova’ekue rojapo haguéicha ndéve; ho’u avei kapi’i vakáicha.

16Ema’ẽ porãke, ipu’aka oĩ ijatúape, ha hete ro’o imbareteite.

17Huguái ojepyso cédroicha ha hetyma ro’o rajyguekuéra ojoasapa ojuehe.

18Ikanguekuéra hatã ku cáño bronceguiguáicha, ha hetymakuéra imbarete ku ýva hierroguiguáicha.

19Ha’e che rembiapo tenondegua ha ame’ẽ ichupe ikyse puku (hãiguasuete).

20Añetehápe pe cérro omoheñói kapi’i ichupe g̃uarã, ha upépe mayma mymba saite oñembosarái vy’apópe.

21Opytu’u yvyra lóto kuarahy’ãme ha oñemokañy pirity ha karuguápe.

22Umi yvyra upépe oĩva omokuarahy’ã ichupe ha umi pirĩtýpe karuguápe oĩva oñemokañy.

23Eikuaa porãke, pe ysyry osẽmba ramojepe hembe’ýgui, ha’e ndojepy’apýi, py’aguapýpe opyta katu, jepevémo pe ysyry Jordan ojupi ijuru peve.

24Máva piko ojapyhyse ichupe ha mávapa ombohasase peteĩ pinda itĩ rupi.