1David ou Nóbpe, pa’i Ahimélec rendápe; ha Ahimélec oñemondyiete ohechávo ichupe ha he’i: Mba’éicha piko reju ne año, avave ou’ỹre nendive.
2Ha David he’i pa’i Ahimélecpe: Tetã ruvicha chejokuái ha he’íkuri chéve: Aníke oikuaátei avave mba’erãpa romondo ha rojokuái; ha che ha’éma che irũnguérape pe tenda ore rojojohu hag̃uáme.
3Ko’ag̃aitépa mba’e reguereko ha’umiva’erãva. Eme’ẽna chéve 5 pan térã rerekomíva.
4Ha pe pa’i he’i Davídpe: Ko’ág̃a ndarekói mba’eveichagua pan, umi pan oñemboykévante Ñanderuetépe g̃uarã; ame’ẽkuaa ndéve oime ramo peẽ ndapeikóira’e kuña ndive.
5Ha David he’i pa’ípe: Añetehápe kuñakuéra opyta mombyry orehegui kuehe ha kuehe ambue; che asẽ ramoguare mitãrusukuéra ipotĩma voi, ko’ág̃a oñemboheko potĩve ohóvo.
6Péicha pe pa’i ome’ẽ ichupe umi pan oñemboykeva’ekue Ñanderuetépe g̃uarã, upépe ndaipórigui ambue pan, Ñanderuete renondépe oñemoĩvamante, ha oñerenohẽmava’ekue Ñanderuete ypýgui oñemoĩ hag̃ua hekovia pan pyahu aku.
7Upe árape oĩhína upépe Ñanderuete renondépe peteĩ Saul rembiguái, hérava Doeg, Edomgua, Saul ovecha rerekua ruvicha.
8Ha David he’i Ahimélecpe: Ndererekóipa ápe yvyra puku akua térã kyse puku ikatúva jaiporu. Ndaguerúigui che kyse puku térã ambue ñorãirõ rembiporu, tetã ruvicha oipotágui ajapo pya’e pya’e iñe’ẽ.
9Ha pe pa’i he’i ichupe: Goliat kyse puku, pe Filisteaygua mba’ekuémante, ku terebínto máta cerrokuéra pa’ũme ndepu’akava’ekue hese, upéva oĩ ápe oñeñu’ãmba ahoja pererĩ sakãme, oĩ pe ao jeguaka pa’i omondéva kupépe, péva reipota ramo eraha; ápe ndaipóri ambue. Ha David he’i: Ambue peichagua ndaipóri voi; eme’ẽna chéve péva.
10Upéicha David pe ára pévape okañy Saul ypýgui, ha oho Aquis, pe Gat retã ruvicha rendápe.
11Ha Aquis rembiguaikuéra he’i ichupe: Kóva piko ndaha’éi David, Israel retã ruvicharã. Ndakóvai piko ku ojereropuraheiva’ekue jerokyhápe oje’évo: Saul ojuka 1000-pe, ha David katu 10.000-pe.
12Ha David oñongatu iñe’ã kuápe ko ñe’ẽ kóva ha okyhyjeiterei Aquis, Gat retã ruvichágui.
13Ha oñemboheko ambuete henondepekuéra, ha ijapytepekuéra oiko itarováva ramo ha oinupã pe okẽguasu rehe, ha oheja osyry hendy hendyva rehe.
14Ha Aquis he’i hembiguaikuérape: Pema’ẽ porãke peẽ pehecha voi ko kuimba’e itarovaha. Ha mba’erã piko pegueru kóvape che rendápe.
15Chéiko aikotevẽ itarováva rehe, peru hag̃ua ko oñembotarováva che renondépe. Kóva piko oike’arã che rogapýpe.
Who We AreWhat We EelieveWhat We Do
2025 by iamachristian.org,Inc All rights reserved.
