Apostolkuéra 9 - Biblia en Guaraní - ?anderuete ?e’? Por? 2015

Sáulo ojejohu Hesu Crísto ndive

1Upeaja Sáulo opersegui mbaretépe umi ojeroviávape Hesu Crísto rehe, ha upevarã oho pa’iguasu rendápe,

2ha’e ome’ẽ hag̃ua ichupe peteĩ kuatiañe’ẽ Ñanderuete rogakuéra Damásco peguápe g̃uarã, opersegui hag̃ua avei umi oguatávape Hesu Crísto rapére, oapresa ha ogueru hag̃ua jepokuapýpe kuña ha kuimba’ekuérape Jerusalénpe.

3Upérõ Sáulo oho hapépe ha oñemoag̃uívo Damáscogui upejavete peteĩ tesape yvágagui oúva ojajaipa ijerekuévo.

4Ha Sáulo ho’ávo yvýre ohendu peteĩ ñe’ẽ he’íva ichupe: Sáulo, Sáulo mba’érehepa nde chepersegui.

5Ha Sáulo ombohovái: Karaiguasu, máva piko Nde. Ha Hesu ombohovái: Che ningo Hesu Crísto, upe nde repersegui reikóvo.

6Epu’ã katu ha eike Damásco tavaguasúpe, upépe oje’éta ndéve mba’épa rejapova’erã.

7Iñirũnguéra oñemondýi opytávo, ohendúgui peteĩ oñe’ẽva ha ndohechái katu avavépe.

8Upérõ Sáulo opu’ã yvýgui, ojesape’ávo ndohechái mba’eve, upévare iñirũnguéra ogueraha ichupe ipógui Damásco peve.

9Upépe opyta mbohapy ára ohecha’ỹre, okaru’ỹre ha hoy’u’ỹre.

10Oiko ningo Damáscope peteĩ Hesu reheguáva, hérava Ananías, ha Hesu he’i ichupe techapáype (visiónpe): Ananías. Ha Ananías ombohovái: Che Jára, ápe aĩ.

11Ha Hesu he’i ichupe: Epu’ã ha tereho pe cálle hérava ikarẽ’ỹva, Júdas rógape, ha upépe nde rejohúta peteĩ kuimba’e hérava Sáulo, Tarsoygua, ha’e ningo oñembo’ehína.

12Ha pe Sáulo pévape ojehechaukáma payetépe peteĩ kuimba’e, hérava Ananías, ha kóva omoĩrõ ipo hi’ári ha’e ohecha jevýta.

13Upérõ Ananías he’i: Che Jára, ahendu ningo ha’e ojapo hague heta mba’evai heko potĩva rehe, Jerusalénpe.

14Ha oñeme’ẽ ichupe peteĩ kuatiañe’ẽ pa’iguasúgui oapresa hag̃ua nderehe ojeroviávape ha ogueraha hag̃ua jepokuapýpe Jerusalénpe.

15Hesu katu ombohovái ichupe he’ívo: Tereho, Che aiporavóma ichupe che rembiporu ramo, ha’e omombe’u hag̃ua che réra ambue tetãme, tetã ruvichakuérape ha Israel ra’ykuérape.

16Che ningo ahechaukáta ichupe opaite mba’evai, ha’e ohasa asyva’erãva gueteri che réra rehehápe.

17Upérõ Ananías oho ha oike Júdas rógape, ha omoĩvo ipo Sáulo ári he’i: Sáulo, che hermáno, Ñandejára Hesu Crísto ojehechaukava’ekue ndéve pe tape reju haguérupi, Ha’e chembou ne rendápe rehecha jevy hag̃ua ha nerenyhẽ hag̃ua Pytu Porãmbávagui.

18Ha upevove ho’a pe pytũ heságui pira pirekuéicha, ha ohecha jevy. Ha opu’ã ha ojebautizauka.

19Ha okaru riréma, imbarete jevy. Ha opyta Hesu Crísto reheguáva apytépe heta ára Damáscope.

20Upéi omombe’u Ñanderuete rogakuérape oĩva Damáscope Hesu Crísto Ñanderuete Ra’yha.

21Oñemondyipa umi ohendúva guive ichupe, ha he’i joa: Ndaha’éi piko kóva pe operseguiva’ekue Hesu Crísto reheguávape Jerusalénpe, ha ko’ápe ou oporoapresa ha oporogueraha hag̃ua avei pokuapýpe Jerusalénpe pa’iguasukuéra rendápe.

22Sáulo katu imbareteve ohóvo ha ohechauka porã Damascoyguakuérape Hesu Crísto Ñanderuete Ra’yha ha omokirirĩ ichupekuéra.

23Heta ára ohasa rire, Judayguakuéra oñemoĩ katu peteĩ ñe’ẽme ojuka hag̃ua Sáulope.

24Oñemombe’u katu Sáulope Judayguakuéra omoñuhãseha ichupe, upevarã oñangareko hikuái opaite táva tápia rokẽnguéra ára ha pyharépe ojuka hag̃ua ichupe.

25Hesu remimbo’ekuéra oikóva ko távape, omoĩ Sáulope peteĩ ajakaguasúpe ha omboguejy ichupe pyharekuépe pe táva tápiare.

26Ha og̃uahẽvo Jerusalénpe, ha’e oñeha’ã oñembyaty hag̃ua Hesu Crísto reheguáva ndive, opavave katu okyhyje ichugui, ndogueroviáigui ha’e avei iñermanomaha avei.

27Upévare Bernabe oñemoirũ hendive ha ogueraha ichupe apostolkuéra rendápe, ha omombe’u ichupekuéra mba’éichapa Hesu Crísto ojehechaukava’ekue Sáulope Damásco rapére, ha Hesu oñe’ẽ hague avei hendive, ha Sáulo omombe’u porã hague Hesu Crísto evangélio Damáscope.

28Péicha Sáulo opyta porã hendivekuéra, ha oñepyrũ avei omyasãi Hesu Crísto evangélio Jerusalénpe,

29ha oñoñe’ẽ’api umi Israelguáva ndive oñe’ẽva Greciaygua ñe’ẽme, ha’ekuéra katu oñeha’ã ojuka hag̃ua ichupe.

30Ambue Hesu Crísto reheguáva oikuaa vove péva, ogueraha hikuái ichupe Cesaréa peve, ha upégui omondo hikuái ichupe Társope.

31Uperire Hesu Crísto iglésiayguakuéra oiko py’aguapýpe opaite umi Judéa, Galiléa ha Samária departamentokuérape, ha oñemopu’ãve ha oñemombareteve ohóvo Ñanderuete kyhyje rupi, ha okakuaa ha oñemboheta Pytu Porãmbáva ñemoangapyhy rupi.

Enéas oñemonguera

32Ha ojehu ningo Pédro oho jave oñandúvo umi tavakuérape, og̃uahẽ avei Lídape, ha oñandu umi Hesu reheguáva upépe oikóvape.

33Ha upépe ojohu peteĩ kuimba’e hérava Enéas, ojapóma 8 áño oĩ hague hupápe ijapágui.

34Ha Pédro he’i ichupe: Enéas, Hesu Crísto nemongueráma, epu’ã ha emyatyrõ nde rupa, ha upevove Enéas opu’ã.

35Ha opaite Lída ha Sarongua ohecha porãmba pe oikova’ekue, ha ojerovia Hesu Crísto rehe.

Tabíta oñemoingove jevy

36Ha Jópepe oiko peteĩ kuñakarai ojerovia porãva Hesu Crísto rehe, hérava Tabíta, he’ise guasu, kóva henyhẽ tembiapo porãgui ha oipytyvõ porã mboriahukuérape, ipirapire rupi.

37Umiha árape ha’e hasyete ha omano, ha ombojahu rire ohupi hikuái ichupe peteĩ koty yvatépe.

38Lída hi’ag̃ui Jópegui, ha Hesu Crísto reheguáva oikuaávo Pédro oĩha Jópepe, omondo ipiári mokõi kuimba’épe ha ojerure asy ichupe he’ívo: Aníkena nde’are reju hag̃ua ore rendápe.

39Ha Pédro opu’ã ha ou hendivekuéra. Og̃uahẽvo Pédro, ogueraha hikuái ichupe pe koty yvatépe, ha ojerepa hese ha jahe’ópe oñemboja hendápe heta viúda ha ohechauka ichupe ijao Tabíta ojapova’ekue ichupekuéra g̃uarã, oiko ramoguare gueteri hendivekuéra.

40Pédro he’i ichupekuéra osẽmba hag̃ua pe kotýgui, ha oñesũ oñembo’e hag̃ua, ha oñembojerévo pe tetekue gotýo he’i: Tabíta epu’ã. Ha ha’e ojesape’a, ha ohecha Pédrope, oguapýva henondépe.

41Ha Pédro ome’ẽ ichupe ipo ha oipytyvõ ichupe opu’ã hag̃ua, upéi ohenói Hesu Crísto reheguávape ha umi viúdape ha ohechauka ichupekuéra Tabíta oikove jevymaha.

42Jópe ha opa ijerekuévo ojekuaa ko mba’e kóva, ha upévare heta ojerovia Hesu Crístore.

43Ha Pédro opyta heta ára Jópepe, Simon peteĩ tymba pire myatyrõhára rógape.