Provérbios 26 - Biblia en Guaraní - ?anderuete ?e’? Por? 2015

1Naiporãi háicha pe ama rayvi rypy’a ku’i arahakúpe térã pe ama oñemono’õha árape, péicha avei naiporãi pe itarováva oñemomba’eporã.

2Pe guyra ra’y oveve rei háicha, ha pe mbyju’i oveve háicha oikóvo henda’ỹre, péicha avei maldicion hendape’ỹ ndohupitymo’ãi avavépe.

3Pe tukumbo kavajúpe g̃uarã, pe tĩnguaha búrrope g̃uarã, péicha pe yvyra po’i ivýrova ape rehe g̃uarã.

4Ani rembohovái ivýrovape výro rekoitépe, ani hag̃ua nde avei reiko ha’éicha.

5Embohovái hekoitépe pe ivýrovape, ani hag̃ua oimo’ã ha’e voi iñaranduha.

6Upe ojokuáiva peteĩ ivýrovape oikytĩ ipytee ha omonda imba’eteéva.

7Pe iparĩva retyma osãingo reiete, péicha hína avei pe ñe’ẽ arandu ivýrova jurúpe.

8Peteĩ ita mombohára oñapytĩ ramo pe ita ihondítare, péicha hína pe omomba’eguasúva peteĩ ivýrovape.

9Ñuatĩ ojekutupyréva oka’úva po rehe, peichaite hína ñe’ẽ arandu umi ivýrova jurúpe.

10Ku hu’y mombohára oporojapipávaicha umi oĩva guivépe ijerekuévo, péicha ningo pe ojokuáiva tembiapo repy rehe pe tekove ivýrova térã oka’úvape.

11Ku jagua ho’u jevývaicha og̃ue’ẽva’ekue (ovomitava’ekue), péicha hína pe heko ñembotavýva ojapo jevy jeýrõ heko ñembotavy reko pegua.

12Nde rehecha ramo peteĩ tapicha he’íva ijehe iñaranduha, ichupe g̃uarã naipohãvéima, oĩve katu esperánza pe ivýrova rehe, hese rãngue.

13Pe iñate’ỹva he’i: Pe leõ ra’y oime tapépe; pe leõ oime oka rupi (nomba’aposéigui).

14Pe okẽ ojere háicha oguapyhápe, péicha ojerejere hupápe pe iñate’ỹva.

15Pe iñate’ỹva omoinge ramojepe ipo mba’yrúpe, ikaigue ogueraha hag̃ua pe tembi’u ijurúpe.

16Pe iñate’ỹva oimo’ã ha’e iñaranduveha 7 oporohekombo’e porãvagui.

17Peteĩ ohug̃uaitĩ ramo mokõi oñorãirõvape ha oike ramo imbytépe, péva ku ojapyhy ramoguáicha peteĩ jaguápe inambígui (ndaha’éi ramo imba’eteéva).

18Ku oñemoĩva itarova ramoguáicha opoívo hu’y hendýva ha ita pohýiva oporojuka hag̃ua,

19peichahína pe tekove vai ombotavýva iñamígope he’ívo: Añetehápe ñembojaruhápente ajapókuri.

20Jepe’a’ỹre ogue pe tata, ha oĩ’ỹrõ ijurumy’ỹiva, opa pe ñorãirõ.

21Pe yvytu ohatapyña háicha pe tatapỹi, ha pe jepe’a pe tata, upéicha pe oñorãirõséva ohatapyña pe ñorãirõrã.

22Pe ijurumy’ỹiva ñe’ẽ ha’ete ku tembi’u he’ẽ asývaicha, ha oikéva ñande py’apy ruguaite peve.

23Ku óro morotĩ omboape háicha kambuchi apérente, upéicha umi oporombojuru he’ẽva, ipy’apýpe katu iñaña.

24Upe hapicha rehe ndaija’éiva oñomi ñomi ijurúpe, ha ipy’apýpe katu omoheñói iñembotavyrã,

25oñe’ẽ rory jave, aníke regueroviátei, 7 mba’evai oĩgui ipy’apýpe.

26Peteĩ ipy’aróva oñomi ramojepe ipy’aro, ñembojovake rendápe, ojekuaáta hova mokõiha ha iñaña rekoha.

27Pe ojo’óva yvykua (ambue ho’a hag̃ua, ha’e voi) ho’ava’erã ipype; ha upe ombyapajeréiva (ambue ohupity hag̃ua) peteĩ itaguasu, hi’ári voi ho’a jevyva’erã.

28Pe juru ijapúva ombyaiseve ohóvo umi ombotavymava’ekuépe, ha pe ombojuru he’ẽva omyaña hapichápe jehasa asýpe.