1 Juan 5 - Biblia en Guaraní - ?anderuete ?e’? Por? 2015

Pe jerovia ombopoguy ko yvyarigua reko

1Oimeraẽ ogueroviáva Hesu ha’eha pe Crísto, ha’éma Ñanderuete ra’y térã itajýra, ha upévare ha’ekuéra ojohayhuva’erã Ñanderuete mborayhu reheve.

2Péicha ningo jaikuaa jahayhuha Ñanderuete ra’ykuéra ha itajyrakuérape: Jahayhu ramo Ñanderuetépe ha jajapo ramo hembiapoukapykuéra.

3Kóva ningo Ñanderuete mborayhu, jajapo ramo hembiapoukapykuéra; ha hembiapoukapykuéra ndaipohýiri jajapo hag̃ua.

4Opaite Ñanderuete ra’y ha itajýra añeteguáva ombopoguy ko múndope ijerovia heko pegua rupi.

5Máva piko upe ombopoguýva ko múndope, pe ogueroviáva Hesu Crísto Ñanderuete Ra’yha.

Pe Pytu Porãmbáva rembiapo

6Hesu Crísto ningo ouva’ekue y ha tuguy rupi, nda’y añói rupi, y ha tuguy rupi uvei. Ha pe Pytu Porãmbáva ningo oikuaauka péva, pe Pytu Porãmbáva ha’égui pe añetegua.

7Mbohapy ningo oĩ umi oikuaaukáva ko mba’e kóva:

8pe Pytu Porãmbáva, y ha tuguy, ha mbohapyve oĩ oñoñe’ẽme oñondive.

9Ñande jaguerovia ramo yvyarigua rechahare ñe’ẽ, jagueroviaveva’erã Ñanderuete ñe’ẽ, iñe’ẽ ituichaitereive oimeraẽ yvyarigua ñe’ẽgui ha Ha’e he’imava’ekue Hesu Crísto Ita’yrateeha.

10Pe ojeroviáva Ñanderuete rehe oguereko ipype iñe’ẽ añeteguáva, ha pe ojerovia’ỹva katu ombojapu Ñanderuetépe, ndojeroviáigui Ñanderuete ñe’ẽre, Ha’e he’iva’ekue Ita’ýra rehe.

11Ha Ñanderuete me’ẽmby ñandéve g̃uarã ningo kóva: Tekove tapia g̃uarãva, ha ko tekove tapia g̃uarãva oĩ Ita’yrapype.

12Upévare upe oguerekóva Hesu Crísto ipy’apýpe oguereko tekove tapia g̃uarãva; ha pe ndoguerekóiva Ñanderuete Ra’ýpe, ndoguerekói avei pe tekove tapia g̃uarãva.

Pe tekove tapia g̃uaravã

13Upévare che ahai peẽme, pejeroviáva guive Hesu Crísto rehe, peikuaa porã hag̃ua peguerekoha pe tekove tapia g̃uarãva.

14Ha pe ojeroviáva hese ha ojerure ramo peteĩ mba’e, Ha’e oipotáva avei, katuete Ha’e ohendúta imba’ejerure.

15Ha jaikuaárõ, Ha’e ñanerendutaha oimeraẽ mba’e jajerurérõ, jaikuaa jarekomaha umi mba’e jajerureva’ekue ichupe.

16Oime ramo peteĩ ohecháva iñermáno oñemohembiapo vai, peteĩ tembiapo vai ndaha’éiva omano hag̃uáicha, tojerure hese ha Ñanderuete ome’ẽta ichupe pe tekove. Oĩ ningo tembiapo vaiete omano hag̃ua, upévare che ha’e ani hag̃ua ojejerurétei.

17Opaichagua tembiapo oñemoĩva Ñanderuete ha hembiapoukapy rehe ningo tembiapo vai (angaipa), ijapytépe katu oĩ umi tembiapo vai ndogueraháiva ñemanóme.

18Jaikuaa ningo opaite Ñanderuete ra’y ha itajýra noñemohembiapo vairiha, Hesu Crísto oñangarekógui hesekuéra, ha pe aña ndopokói hesekuéra.

19Jaikuaa porã ningo ñande, Ñanderuete mba’eha, ha jaikuaa avei ko múndo oĩha gueteri Satana (aña) poguýpe.

20Jaikuaa ningo Ñanderuete Ra’y ou hague, ha ome’ẽ ñandéve akã porã ñande jaikuaa hag̃ua pe Añeteguávape, ha ñande ñaĩ pe Añeteguavapype, he’ise Ñanderuete Ra’y Hesu Crístopype. Ha’e Ñandejára Añeteguáva ha pe tekove tapia g̃uarãva.

21Che ra’ykuéra ha che rajykuéra, peñeñangarekóke umi jára gua’u ra’ãngágui.