1Pejeruréke Ñanderuetépe omongy hag̃ua hi’araitépe. Ñanderuete ombyatýta araikuéra, ha omongy porãta okakuaa porã hag̃ua opaichagua ñemitỹngue pende kokuépe.
2Umi jára ra’ãnga gua’u imba’ekuaa rei ha umi paje apohára katu ijapu, ha’ekuéra omombe’u ike pegua ombotavy hag̃ua, omoangapyhy rei hag̃ua, upévare che retã oiko rei ovecha herekua’ỹvaicha.
3Che pochy herekuakuéra ndive, ahaviráta imburuvichakuérape, upévare ángel atykuéra Jára voi oñangareko jevýta hetã rehe, ha hetãgui oikóta peteĩ kavaju ñorãirõ megua iporãitévaicha.
4Che retãgui osẽta pe itaguasu che róga pyendarã, ichugui osẽta pe yvyra mbyky akua, ichugui osẽta pe guyrapa ojeporúva ñorãirõme, ha ichugui osẽva’erã avei opaite mburuvichakuéra.
5Ichuguikuéra oikóta ipy’aguasúva ha ñorãirõme opyrũmbáta hese ija’e’ỹva rehe ha oitýta hikuái tujukuápe tape rupi oĩvare, ha oñorãirõ joáta hikuái Ñanderuete oĩgui hendivekuéra, ha umi kavaju arigua oikóva oñemotĩmbáta.
6Che amombaretéta Judayguakuérape, Che aipytyvõta Jose ñemoñarenguérape, Che aguerupa jevýta hetãteépe, aiporiahuverekógui ichupekuéra, ha oiko jevýta hikuái ymaguaréicha, Che namboykeirõguáicha ichupekuéra araka’eve, Che ha’égui Ijaratee, ha ahendúta ichupekuéra.
7Efrain ipy’aguasúta, ipy’apýpe horýta ku víno ho’urõguáicha; ita’yrakuéra ohechapáta ichupe ha ovy’a joáta, ipy’apýpe oguerohorýta Ñanderuetépe.
8Che ahenóita ichupekuéra peteĩ turu pu rupi, ambyatypáta ha aguenohẽta ijejopy vaígui, ha oñemboheta hetavéta hikuái ymaguaréicha.
9Jepevémo amosarambiva’ekue ichupekuéra umi tetã apyte rupi, umi tetã mombyrývagui, imandu’ava’erã hikuái cherehe, ha ita’yrakuéra ndive oupa jevyva’erã.
10Che aguerupáta ichupekuéra Egípto retãgui ha aguenohẽta ichupekuéra Asíriagui ha agueraháta ichupekuéra Galaad ha Líbano yvýpe, ha ha’ekuéra ndaijapamo’ãi ipype, hetaitereígui.
11Ha’ekuéra ohasáta yguasu tuichaitereíva rupi, Che voi ainupãta pe y pochy ha amokãmbáta pe ysyry Nílope, Asíriaygua otĩetereíta ha Egípto pu’aka oñehundíta.
12Ha Che amombaretéta ichupekuéra che pu’aka rupi oiko porã jevy hag̃ua, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
