Josue 21 - Biblia en Guaraní - ?anderuete ?e’? Por? 2015

Levigua tavakuéra

1Umi Levigua ruvicha ou pa’i Eleazar, Josue, Nun ra’y, ha umi Israel tríbu ruvichakuéra rendápe,

2ha oñe’ẽ ichupekuéra Sílope, Canaan retãme, he’ívo: Ñanderuete he’ikuri Moises rupi oñeme’ẽ hag̃ua oréve tavakuéra roiko hag̃ua, ha pe ñu ijerekuévo ore rymbakuérape g̃uarã.

3Upéramo umi Israel ñemoñare ome’ẽ Leviguakuérape, umi táva ha umi ñu oĩva ijerekuévo, Ñanderuete he’i haguéicha ichupekuéra.

4Ha umi Coatguápe g̃uarã, Aaron ñemoñarenguéra, Levi tríbugui oñeme’ẽ po’a jeporavo rupi Juda, Simeon ha Benjamin tríbu yvýgui 13 táva.

5Ha umi ambue Coat ra’yrekuérape g̃uarã oñeme’ẽ po’a jeporavo rupi 10 táva Efrain, Dan ha Manases tríbu mbytere yvýgui.

6Umi Gerson ra’yrekuérape g̃uarã oñeme’ẽ po’a jeporavo rupi 13 táva, Isacar, Aser, Neftali ha Manases tríbu mbytere yvýgui oĩva Basánpe.

7Ha umi Merari ñemoñare rogaguasukuérape g̃uarã oñeme’ẽ Ruben, Gad ha Zabulon tríbu yvýgui 12 táva.

8Upéicha Israel ñemoñarenguéra ome’ẽ po’a jeporavo rupi Leviguakuérape ko’ã táva iñunguéra reheve, oĩva itáva jerekuévo, Ñanderuete he’i haguéicha Moiséspe.

9Juda ha Simeon tríbu yvýgui raẽ oñeme’ẽ

10po’a jeporavo rupi ko’ã táva Aaron ñemoñarépe, Coat rogaguasúpe g̃uarã, ha’e Levi ra’y mokõiha:

11Quiriat-arba, Anac ru mba’ekue, pevahína Hebron, Juda cérrope, ha pe ñu oĩva ijerekuévo.

12Ko táva rehegua kokue ha itava’ikuéra oñeme’ẽva’erã Caleb, Jefone ra’ýpe, imba’eteerã ramo.

13Ha’ekuéra ome’ẽ Aaron ñemoñarenguérape Hebron ha pe ñu oĩva ijerekuévo táva mo’ãha ramo pe oporojukávape g̃uarã; ha hi’ári oñeme’ẽ avei ichupekuéra ko’ã táva: Libna ha pe ñu oĩva ko táva jerekuévo,

14Jatir iñu reheve, Estemoa iñu reheve,

15Holon iñu reheve, Debir iñu reheve,

16Ain iñu reheve, Juta iñu reheve ha Betsemes iñu reheve; 9 táva oñeme’ẽ ichupekuéra ko’ã mokõi tríbugui.

17Ha Benjamin tríbugui oñeme’ẽ ichupekuéra irundy táva: Gabaon iñu reheve, Geba iñu reheve,

18Anatot iñu reheve, Almon iñu reheve.

19Ko’ã 13 táva oñeme’ẽ Aaron ñemoñarenguérape ha pe ñu oĩva itáva jerekuévo.

20Ha umi ambue Coat ñemoñare rogaguasu hembývape, oñeme’ẽ ko’ã 4 táva po’a jeporavo rupi Efrain tríbugui:

21Siquem iñu reheve, Efrain cérrope, táva mo’ãha ramo pe oporojukávape g̃uarã; ha Gézer iñu reheve,

22Kibsaim iñu reheve ha Bet-horon iñu reheve.

23Ha Dan tríbugui oñeme’ẽ ichupekuéra 4 táva: Eltéque iñu reheve, Gibeton iñu reheve,

24Ajalon iñu reheve ha Gat-rimon iñu reheve.

25Ha Manases tríbu mbyterégui oñeme’ẽ ichupekuéra mokõi táva: Taanac iñu reheve ha Gatrimon iñu reheve.

26Upéicha oñeme’ẽ Coat ñemoñarenguéra rembyrépe g̃uarã 10 táva ha umi ñu oĩva ijerekuévo.

27Umi Levigua, Gerson rogaguasukuérape, oñeme’ẽ Manases tríbu mbyterégui mokõi táva: Golan, Basánpe, iñu reheve táva mo’ãha ramo oporojukávape g̃uarã; ha Bees-tera iñu reheve.

28Upéi Isacar tríbugui oñeme’ẽ ichupekuéra: Cison iñu reheve, Daberat iñu reheve,

29Jarmut iñu reheve ha En-ganim iñu reheve.

30Aser tríbugui avei 4 táva: Miseal iñu reheve, Abdon iñu reheve,

31Helcat iñu reheve ha Rehob iñu reheve.

32Ha Neftali tríbugui mbohapy táva: Cedes, Galiléape, iñu reheve, táva mo’ãha ramo pe oporojukávape g̃uarã; ha avei Hamotdor iñu reheve ha Cartan iñu reheve.

33Mayma Gersongua táva oĩ 13, iñu reheve.

34Ha umi Merari rogaguasukuéra hembývape gueteri, Leviguakuéragui, oñeme’ẽ Zabulon tríbugui irundy táva: Jocneam iñu reheve, Carta iñu reheve,

35Dimna iñu reheve ha Naalal iñu reheve.

36Ha Ruben tríbugui irundy táva: Bezer iñu reheve, Jahaz iñu reheve,

37Cademot iñu reheve ha Mefaat iñu reheve.

38Gad tríbugui 4 táva: Ramot, Galaad pegua, iñu reheve, táva mo’ãha ramo umi oporojukávape g̃uarã; ha Mahanaim iñu reheve,

39Hesbon iñu reheve ha Jazer iñu reheve,

40Merari ñemoñare rogaguasukuérape g̃uarã oñeme’ẽ ko’ã táva po’a jeporavo rupi.

41Ha opaite táva Israel ñemoñarenguéra ome’ẽva’ekue Leviguakuérape oĩ 48, ha oñeme’ẽ ichupekuéra avei iñunguéra oĩva ko’ã táva jerekuévo.

42Ha opaite ko’ã táva oguereko avei iñu ijerekuévo.

Israel oñemomba’e Canaan yvy rehe

43Péicha Ñanderuete ome’ẽ Israélpe opaite yvy he’iva’ekue ituvakuérape, ha oñemomba’e rire hese oiko ipype hikuái.

44Ha Ñanderuete ome’ẽ ichupekuéra pytu’u ijerekue rehe, opromete haguéicha ituvakuérape; ha hesekuéra ija’e’ỹvakuéra ndaikatúi oñemoĩve hesekuéra, Ñanderuete ome’ẽmbágui ipópe hesekuéra ija’e’ỹvakuérape.

45Upéicha opaite ñe’ẽ Ñanderuete he’iva’ekue ojapotaha Israelguakuérape g̃uarã, añetehápe Ha’e ojapopa avei (oprometeva’ekue).