Provérbios 15 - Biblia en Guaraní - ?anderuete ?e’? Por? 2015

1Pe ñe’ẽ mbohovái porã ombogue pe pochy; pe ñe’ẽ pohýiva katu ohatapyña pe pochy rendy.

2Umi heko potĩva jurúgui osyry arandu; umi iñañáva jurúgui katu ochororo ivýro reko.

3Ñanderuete resa opa rupiete oĩ, oma’ẽhína iñañáva ha imba’eporãva rehe.

4Pe ipy’aguapýva juru ningo ojogua pe yvyra oporomoingovévape, ha upe itie’ỹ ñañáva py’apy katu omyangekõi hapicha py’apýpe.

5Pe ivýrova omboyke itúva rekombo’e, ha upe oñemomba’éva hekombo’epy rehe iñakãguapyva’erã.

6Pe heko potĩva rógape oĩ heta mba’e hepýva; ha angekõi vai katu oĩ iñañáva rógape.

7Umi iñarandúva juru omyasãi akãguapy porã, ha ndaupéichai umi ivýrova juru.

8Umi iñañáva kuave’ẽmby mba’evai Ñanderuetépe g̃uarã, ha umi heko potĩva ñembo’e katu ombovy’a Ñanderuetépe.

9Pe tekove ñaña rape mba’evai Ñanderuetépe g̃uarã, Ha’e katu ohayhu pe heko potĩva rape.

10Jehavira pohýi ohupitýta upe opiáva tape porãgui, ha upe oñemboykéva tekombo’epýgui omanova’erã.

11Ñanderuete oikuaapa ojehúva omanomava’ekue retãme ha añaretãme, ha ko’yteve tapicha py’apýpe oĩva guive.

12Pe oñembohorýva ndohayhúi oñemongavaju ramo ichupe, ha upévagui ndoikoséi umi iñarandúva apytépe.

13Pe py’apy rory ombohova porã ijárape ha pe py’apy oñembyasýva omokangy ichupe.

14Pe py’apy oñemoaranduséva oheka pe arandu, ha umi ivýrova juru katu henyhẽ výro rei ñe’ẽgui.

15Pe ojepy’apy asývape g̃uarã opaite ára hasyeterei, ha pe ipy’a rorývape katu ojogua peteĩ vy’aguasúpe.

16Iporãiteve ñanemboriahúrõ ha jakyhyje Ñanderuetégui, jareko rãngue mba’e repyeta angekõi reheve.

17Iporãve pe tembi’u ka’avoguiguáva mborayhu reheve, ja’u rãngue peteĩ guéi oñemongyrava’ekue py’aro reheve.

18Pe tekove ipochy reíva oñorãirõsénte, ha hasyete katu peteĩ ipochýva ombogue hapicha pochy rendy.

19Pe iñate’ỹvape g̃uarã oimeraẽ tape iñuatĩmba voi, ha umi heko potĩva tape po’i katu ojogua tape oñemyatyrõmbapyrévape.

20Pe ta’ýra iñarandúva ombohory itúvape, ha pe tekove ivýrova katu ojahéi isy rehe.

21Pe ivýrovape ombohory heko ñembotavy, ha pe tekove iñarandúva katu oguata hekoitépe.

22Ñane rembiaporã osẽ vai ndaipóri ramo tekombo’e porã, ha hetahápe oporohekombo’éva osẽ porã.

23Oimeraẽva ovy’a ijuru ombohovái porã ramo; pe ñe’ẽ hekoite pegua ha hi’oraitépe ho’a porã ichupe.

24Iñarandúvape g̃uarã pe tekove porã rape ojupive ohóvo (yvága gotýo) ha péicha oñemomombyryve ohóvo omanomava’ekue retãgui.

25Ñanderuete ombotapereva’erã umi oñembotuicháva róga, omoĩ hatãva’erã katu imenave’ỹmava yvy rembe’y.

26Umi iñañáva jepy’amongeta ningo mba’evai Ñanderuetépe g̃uarã, ha umi heko potĩva ñe’ẽ katu ombovy’a ichupe.

27Pe imba’epotaitereíva ohundíta hóga, ha pe oñemboykéva pe ñembopopegua ñemígui oikoveva’erã.

28Pe heko potĩva py’apy opensa porã oporombohovái mboyve, ha umi iñaña rekóva juru katu omyasãi iñe’ẽ reínte.

29Ñanderuete oiko mombyry iñaña rekóvagui, Ha’e katu ohendu umi heko potĩva ñembo’e.

30Umi tesa horýva ombovy’a hapichápe ha peteĩ notícia porã oñemombe’úva ñandéve ñanemokyre’ỹ ha omombarete ñane retyma.

31Peteĩ apysa ohenduséva tekombo’e hekoite peguáva ovy’a oiko ramo iñarandúva apytépe.

32Upe omboykéva tekombo’e ohundi hi’ánga resãi, ha pe ohendúva tekombo’e katu iñaranduve ohóvo.

33Pe kyhyje Ñanderuetégui hi’a arandu ha ñandetuicha hag̃ua ñande ñañemomirĩ raẽva’erã henondépe.