Hebreoyguakuérape 9 - Biblia en Guaraní - ?anderuete ?e’? Por? 2015

1Pe ñembopy’apeteĩ tenondeguáva oguereko avei hembiapoukapy icúltope g̃uarã ha pe óga jojohuha yvýpe g̃uarã.

2Oñemopu’ã peteĩ óga aoguigua ha mymba pirekueguigua oguerekóva mokõi kotyguasu, pe kotyguasu peteĩha oñemboykéva pa’ikuérape g̃uarã, ha ipype oĩ: Pe tataindyenda, pe mesa ha hi’ári umi pan oñekuave’ẽmava’ekue Ñanderuetépe g̃uarã.

3Ha pe koty mokõiha oñemboykéva Ñanderuetépe ha pa’iguasúpe g̃uarã, ha kóa oñemboja’o pe kotyguasu peteĩhágui peteĩ aosãingo (cortína) rupi.

4Ha pe kotyguasu ryepýpe, oñemboykéva Ñanderuetépe ha pa’iguasúpe g̃uarã oĩ: Peteĩ kuave’ẽmby renda ojehapy hag̃ua mba’e ryakuã porã, pe karameg̃ua ñembopy’apeteĩ reheguáva ojejaho’ipava’ekue órope, ha ipype oĩ peteĩ kambuchi michĩva mana reheve, Aaron yvyra po’i hokyva’ekue, ha mokõi itape umi 10 tembiapoukapy reheve,

5ha pe karameg̃ua ñembopy’apeteĩ reheguáva ári oĩ mokõi querubin (ángel ruvicha) overapáva mbytépe ohechauka hag̃ua Ñanderuete oĩha upépe, umi querubin pepokuéra ojaho’i pe karameg̃ua mbotyha (tápa); opaite umi tembiapoukapy ko’ãva rehe ndaikatúi ko’ág̃a oñeñe’ẽ peteĩteĩ rehe.

6Upéicha oñembosako’i ko’ã mba’e, oĩmba hag̃ua; pe kotyguasu oñemboyke pa’ikuérape g̃uarã térã kotyguasu peteĩháme oike pa’ikuéra meme árape ojapo hag̃ua pe cúlto rehegua rembiapokuéra.

7Pe kotyguasu mokõiha katu Ñanderuete ha pa’iguasúpe g̃uarã, pe pa’iguasúnte ikatu oike peteĩ jevýnte meme áñope, katuete oguerahava’erã kuave’ẽmby ruguy hi’angaipatee rehe ha opaite ambue Israelguakuéra angaipáre, ojejapova’ekue oñemoĩse’ỹre Ñanderuete rehe, (Levítico 16; Números 15,22-31).

8Ko’ã mba’e rupi pe Pytu Porãmbáva oikuaaukase pe tape pe tenda heko potĩete añeteguávape (he’ise Ñanderuete rendápe) ne’ĩrava gueteri ojehechauka, oĩ aja pe óga jojohuha.

9Ko’ã mba’e, ñande ko’ag̃aguápe ha’énte peteĩ ñembojoja, tymba ruguy rupi kuimba’ekuéra ha kuñakuéra ndaikatúigui omopotĩete ipy’apyñe’ẽ (conciéncia), omomba’eguasu ramojepe Ñanderuetépe ko’ã kuave’ẽmby ruguy rupi icultokuérape.

10Ko’ã tembiapoukapy ñahenduramóva tembi’u rehe, umi mba’e oñemboy’úva ha ñande rete jejohéi rehe ojejapoukava’ekue og̃uahẽ meve pe ára oñembopyahupa hag̃ua; ko’ã tembiapoukapy to’o (tete) reheguávante.

11Ko’ág̃a katu Hesu Crísto oúma pa’iguasu añeteguáva ramo, ogueru hag̃ua yvága rehegua mba’eporãita. Ha pe iglésia Ha’e omopu’ãva ha Ha’e omba’apohápe ndaha’éi kuimba’e térã kuña rembiapo, ni tembiapo ko’ag̃agua, Ñanderuete voi ojapomava’ekue yma guivéma.

12Hesu Crísto ndoikéi kavara térã vakara’y ruguy reheve pe kotyguasu oñemboykéva Ñanderuete ha pa’iguasúpe g̃uarã, huguytee reheve uvei oike peteĩ jevýnte ohupity hag̃ua tetãnguérape g̃uarã pe salvacion tapia g̃uarãva.

13Umi kavara ha tóro ruguykue ha pe vaka pyahu tanimbukue ojehypyiva’ekue umi oñemongy’áva rehe, ojeporúnte omopotĩ hag̃ua kuimba’e ha kuña rete, (Números 19).

14Hesu Crísto katu ome’ẽ huguy, ho’a’ỹre angaipápe, Ñanderuete Pytu Porãite pu’aka tapia g̃uarãva rupi, ha huguy ningo pe kuave’ẽmby añeteguávante Ñanderuetépe g̃uarã, upévare Ha’émante omopotĩva’erã ñande py’apyñe’ẽ ñane angaipágui jaservi hag̃ua Ñanderuete oikovévape.

15Upévare Hesu Crísto opyta pe ñembopy’apeteĩ pyahu Jaratee ramo, imano rupi Ha’e operdona umi oñemoangaipava’ekuépe pe ñembopy’apeteĩ tenondeguarépe ha umi uperiregua oñehenóivape ohupity hag̃ua pe tekove tapia g̃uarãva Ñanderuete oprometeva’ekue.

16Peteĩ kuimba’e rembipota paha, ha’e omano mboyve, ojepokuaa ohai hag̃ua peteĩ kuatiañe’ẽme (testaméntope), ojejapova’erã hekopete ijapohare omano rire, ha’e oipota ha ohai hagueichaite.

17Koichagua kuatiañe’ẽ ovalénte ijapohare omano rire, ijapohare oikove aja opyta rei gueteri.

18Upévare pe ñembopy’apeteĩ tenondevéva ndovaléi avei tuguy’ỹre.

19Oñemombe’u rire peteĩteĩ tembiapoukapy Moises rembiapoukapýgui, ha’e ojapyhy ovecha rague pytãva ha peteĩ sórgo rakã omyakỹ hag̃ua vakara’y ha kavara ruguykuépe ojehe’ava’ekue y reheve, ha ohypýi pe kuatiañe’ẽ tembiapoukapy reheguáva ha Israelguakuéra oñembyatýva rehe, ha he’i:

20Kóva ningo pe ñembopy’apeteĩ reheguáva (pácto) ruguy Ñanderuete omoañetembáva peẽme g̃uarã.

21Upéicha ha’e ohypýi avei pe tuguy pe óga jojohuha rehe ha opaite hembiporu rehe, ojeporúva pe óga jojohuha rembiapópe.

22Haimete opaite mba’e oñemopotĩ tuguýpe, Moises rembiapoukapy he’i háicha, ha oñehẽ’ỹre tuguy katu ndoikói perdon avei, (Levítico 17,11; Efesoyguakuérape 1,7).

Hesu Crísto kuave’ẽmby ñandepe’a angaipa poguýgui

23Umi kuave’ẽmby ojejapova’ekue ha ojehechaukamava’ekue yvága pegua ta’ãnga rupi, oñemopotĩ jevy jeyva’erã, umi mba’e oĩva yvágape katu oikotevẽ kuave’ẽmby iporãvéva rehe.

24Hesu Crísto ndoikéi pe óga jojohuhápe kuimba’ekuéra ojapova’ekue, ha ojoguáva pe yvágape oĩvape, Ha’e oike uvei yvagaitépe, Ñanderuete renondépe, ñanderehehápe.

25Hesu Crísto ndoikéi heta jevy oñekuave’ẽ hag̃ua, pe pa’iguasu ojapo háicha, oikéva peteĩ jevýnte meme áñope pe kotyguasúpe oñemboykéva Ñanderuete ha pa’iguasúpe g̃uarã, pe tuguy imba’e’ỹva reheve.

26Upeicha’ỹ rire Hesu Crísto omanova’erãmo’ã heta jevy, ko yvy ojejapo guive; ko’ág̃a katu opávo umi ára atyguasu Ha’e voi oñekuave’ẽma peteĩ jevýnte operdona hag̃ua tetãyguakuéra rembiapo vai.

27Kuimba’ekuéra ha kuñakuéra omanova’erã háicha peteĩ jevýnte, ha uperire oikóta pe ñembojovakeguasu,

28péicha avei Hesu Crísto oñekuave’ẽma peteĩ jevýnte ogueraha hag̃ua heta angaipa; Ha’e ou jevývo ndoumo’ãvéima ogueraha hag̃ua kuimba’ekuéra ha kuñakuéra angaipa, ou jevyva’erã uvei ogueraha ha osalva hag̃ua umi oha’ãrõvape ichupe.