1Angái, angái umi Siónpe oikóva ojepy’apy’ỹre, ha peẽ peikóva Samária cérro rehe pejerovia rei pene mburuvichakuéra rehe ha Israelguakuéra oho rei hapykuerikuéra.
2Tapeho Calnépe, ha pema’ẽ porã opaite mba’e rehe, ha upégui tapeho Hamatguasuetépe, upéi peguejy Gátpe, umi Filisteaygua távape, peimo’ã piko umi tetã iporãveha ko tetã kóvagui, ha ijyvy ituichaveha pende yvýgui.
3Peẽ peimo’ã pe ára ivaietéva imombyryeteha gueteri pendehegui ha upévare pemboyke pe justícia.
4Peñeno pepytu’u hag̃ua peteĩ tupa ojeguapávape elefánte rãinguégui ha pe’u umi ovecha ra’yrusu ha umi tóro ra’yrusu oñemongyrapyréva.
5Pembopu pende árpa peguenohẽvo pene akãgui purahéi, David ojapo haguéicha.
6Pembo’u víno vasoguasúgui, ha peñemohyakuã mba’e ryakuã asýpe ha ndapejepy’apýi ojehúva rehe Jose retãre.
7Upévare peiko raẽtamante ambue tetãme cárcelpe ramoguáicha ha upéicha opava’erã pende puka puka pende karuguasuhápe.
8Pende Ruete, Yvága Atykuéra Jára, ome’ẽ iñe’ẽ ijehe voi ha he’i: Israel chembopochy oñembotuicha haguére ha ndacha’éi avei hogaguasu rehe ha amoĩta itavakuéra ha opaite mba’e oĩva guive ipype hesekuéra ija’e’ỹva poguýpe.
9Ha 10 kuimba’e okañy ramojepe peteĩ ógape, upépe voi omanombáta.
10Ha ipehẽngue peteĩva ou ramo oguenohẽ hag̃ua hógagui hetekue, ohapy hag̃ua ikanguekuéra ha oporandu ramo upe óga ruguápe oĩvape: Oimeve piko gueteri nendive. Ha’e ombohováita: Nahániri. Ha he’ive: Ekirirĩ, ndaikatúigui ja’e Ñanderuete réra.
11Peikuaa porãke, pende Ruete oitypáta umi ogaguasu ha ombokusuguéta avei umi óga michĩva.
12Oñanikuaa piko umi kavaju itaguasu ári térã umi guéi piko oyvymbovokuaánepa (oara) itaguasukuéra ári. Peẽ pemoambue pe justícia pohã vaípe, ha pe justicia’a mba’e iróvape.
13Peẽ pevy’a rei pejévo: Orepu’aka Lodabar táva rehe, ha ore rombopoguy ore pu’aka rupi avei Carnaímpe.
14Nde, Israel retã, ema’ẽ porãke, he’i pende Ruete, Che aguerúta pendeári peteĩ tetã pendejopy asýtava, Hamat ojeikeha guive Araba ysyry peve.
Who We AreWhat We EelieveWhat We Do
2025 by iamachristian.org,Inc All rights reserved.
