1Pe sábado ára ohasa rire, pe domíngo ára ko’ẽjúvo, María Magdaléna, ha ambue María oho ohecha hag̃ua Hesu sepultúra.
2Ha oiko peteĩ yvy ryryiguasu, ha peteĩ Ñanderuete yvága rembiguái oguejy yvágagui ha oipe’a pe ita, ha oguapy hi’ári.
3Ha hete ojoguaite araverápe, ha ijao morotĩ ku yro’y rypy’áicha (nievéicha).
4Ha umi tahachi okyhyjégui ichugui oryryipa, ha ho’apa hikuái omanóvaicha.
5Ha pe yvága rembiguái katu oñe’ẽ umi kuñáme, ha he’i: Ani pekyhyje, aikuaa pehekaha Hesúpe, oñemosãingova’ekue kurusúre.
6Ha’e ndaiporivéima ko’ápe, oikove jevýma, Ha’e he’i haguéicha, peju pehecha hendague.
7Pya’e tapeho ha peje hemimbo’ekuérape, Ha’e oikove jevymaha omanova’ekue apytégui, ha péina oho pene renonderãme Galiléape. Upépe pehecháta ichupe. Ko’ã mba’e amombe’úva peẽme katuete oikopava’erã.
8Ha oho hikuái Hesu tyvýgui kyhyje ha vy’a tuicha reheve, ha ñaniháme oho hikuái omba’emombe’u hag̃ua hemimbo’ekuérape.
9Upérõ Hesu osẽ ojohu hag̃ua ichupekuéra, ha he’i: Maitei. Ha oñemboja ha oñañu’ã hikuái ipy ha omomba’eguasu ichupe.
10Ha Hesu he’i ichupekuéra: Ani pekyhyje. Tapeho pemombe’u che hermanokuérape oho hag̃ua Galiléape, ha upépe cherecháta hikuái.
Soldadokuéra oñembopopegua11Ha’ekuéra oho aja, mbovymi umi tahachi apytégui oho avei pe tavaguasúpe, omombe’u hag̃ua umi pa’i ruvichakuérape opaite mba’e ojehúva guive.
12Ha oñembyaty rire umi karai ancianokuéra ndive, oñemoĩ peteĩ ñe’ẽme ome’ẽ hag̃ua soldadokuérape heta pirapire,
13ha ohekombo’e hikuái ichupekuéra he’ívo: Pemyasãi ko ñe’ẽ kóva: Pyhare, ore roke aja, ou hemimbo’ekuéra ha omonda hetekue.
14Ha ã mba’e og̃uahẽ ramo tetã sãmbyhyhára apysápe, ore roñe’ẽta ichupe ha ndo’a vaimo’ãi peẽme.
15Ha’ekuéra ojapyhy pe pirapire ha ojapo oje’e háicha ichupekuéra ha upéicha ko ñe’ẽ kóva oñemosarambi opaite Judaygua apytépe ko ára kóva peve.
Hesu ojokuái hemimbo’ekuérape16Ha umi 11 temimbo’ekuéra oho Galiléape, pe cérro Hesu he’iuka haguépe ichupekuéra.
17Ha ha’ekuéra ohechávo ichupe ojeity hikuái henondépe; ha oĩmimi ogueroviapa’ỹva.
18Ha Hesu oñembojávo ha oñe’ẽvo ichupekuéra he’i: Oñeme’ẽmba chéve opaichagua pu’aka, yvága ha yvy apére.
19Upévare tapeho ha peñemohemimbo’e opaite tetãnguérape, ha pebautiza ichupekuéra Túva, Ta’ýra ha Pytu Porãmbáva rérape.
20Ha pembo’e ichupekuéra ojapo hag̃ua opaite mba’e Che ha’eva’ekue peẽme pejapo hag̃ua. Ha peikuaa porãke, Che aĩha penendive opaite ára opa peve ko ára atyguasu (ko múndo).
Who We AreWhat We EelieveWhat We Do
2025 by iamachristian.org,Inc All rights reserved.
