Jeremías 6 - Biblia en Guaraní - ?anderuete ?e’? Por? 2015

Jerusalengua ohasa asýta ñorãirõrãme

1Benjamin ñemoñarenguéra pekañy Jerusaléngui ha pembopu turu Tecóape, pemopu’ã tatatĩ, techaukaha ramo Bethaquérempe, cháke, nórtegui ou jejopy vai ha ñehundiguasu.

2Ahundíta Sion rajy (Jerusalén), pe iporãitévape.

3Oúta hi’ári umi ovecha rerekua ijovecha atykuéra reheve; ijerekue rehe omopu’ãta hikuái hóga aoguigua; ha peteĩteĩ oñangarekóta ijovecha atykuéra rehe hendaitépe.

4Peñembosako’íke peñorãirõ hag̃ua Jerusalen ndive; pepu’ã joáke ha jajeity hi’arikuéra asaje mbytépe. Angái, angái ñandehegui, ka’aruetéma ha kuarahy oike jepéma.

5Pepu’ã ha jajeity hi’arikuéra pyharekuépe, ha ñahundi hogaguasukuéra.

6Péicha he’i pende Ruete, Yvága Atykuéra Jára: Peikytĩ yvyra, ha pemopu’ã yvy aty Jerusalen tápia jerekue rehe ojehasa hag̃ua hi’ári; kóa ha’ehína pe táva ojehavirátava, henyhẽmbaitégui ñaña rekógui.

7Ku y osẽ háicha yvúgui, péicha Jerusaléngui osẽ tapiaite ñaña reko; oñehendu oikoha ipype mba’e heko pegua’ỹva ha ñemonda; jekutu ha ñenupã che resa ohecha ipype.

8Jerusalen, eñembyasy rejapo vaiete haguére, ani hag̃ua che ánga oñemboykétei ndehegui, ani hag̃ua ajapo ndehegui yvy perõ, avave oikose’ỹháme.

9Péicha he’i Yvága Atykuéra Jára: Ojeporeka jevy jeýta umi Israelgua hembýva rehe ku parral rakã’a ojeheka jevy háicha ojeheja rei’ỹre hi’a peteĩnte jepe, ejepovyvy jevy ku parral rakã’a mono’õhára ojapo háicha umi parral apytépe.

10Mávapepa añe’ẽta cherendu hag̃ua. Mávapepa Che amomarandúta cherendu hag̃ua, ijapysapepa voi, ha ndaikatúi cherendu, oñembohory uvei hikuái pende Ruete ñe’ẽ rehe ha péva ndohayhúi voi hikuái.

11Upévagui cherenyhẽ che pochýgui, chekane’õma ajejokove hag̃ua; upévare añohẽta che pochy mitãkuéra ári umi tape rupi oikóva, ha umi mitãrusu oñembyatýva ári; jepokuapyhápe ojegueraháta pe ména hembireko ndive, ha itujáva avei.

12Hogakuéra, ijyvykuéra ha hembirekokuéra oñeme’ẽta ambuépe g̃uarã, Che aipysótagui che po ainupã hag̃ua umi oikóvape ko tetãme, he’i pende Ruete.

13Michĩvéva guive tuichavéva peve, opavavetéva omonda; pe proféta guive pa’i peve, oporombotavýnte voi.

14Ha’ekuéra oipohãno vai vai che retã mba’asy vai ku ndaha’éi ramoguáicha mba’eve, ha hi’ári he’i: Py’aguapy, py’aguapy, ha ndaipóri py’aguapy.

15Otĩva’erãmo’ã hikuái ojapo haguére mba’evaiete; ha’ekuéra katu notĩri ha ndoikuaái voi avei mba’épa he’ise ñemotĩ, upévare ho’áta avei hikuái umi oñehundítava ndive; ahavira vove ho’apáta hikuái, he’i pende Ruete.

16Péicha he’i pende Ruete: Tapeho umi tape rupi, pema’ẽ porã ha peporandu pe tape porã ymaguare rehe, moõitépa oĩ pe tape iporãitéva, ha peguata hi’ári, pejohu hag̃ua pytu’u pene ángape g̃uarã. He’i katu hikuái: Ndoroguatamo’ãi.

17Ha amopu’ã peẽme g̃uarã guárdia (mañahára) oñangareko ha pendeavisa hag̃ua ituru pu rupi ou ramo tetã ambueygua. Ha’ekuéra katu he’i: Norohendumo’ãi.

18Upévare pende Ruete he’i: Tetãnguéra, pejapysaka porãke peikuaa hag̃ua mba’épa ojehúta che retãme.

19Ejapysaka porãke, yvyariguakuéra: Péina ápe, Che voi aguerúta mba’evai ko tetã kóvape g̃uarã oñemoĩ haguére cherehe; ipy’apy nohenduséi voi che ñe’ẽ, ha omboyke hikuái che rembiapoukapy.

20Mba’éiko chéve g̃uarã umi mba’e ryakuã porã Sábagui oúva; ha pe takuapi hyakuã porãva tetã mombyryetégui oiporúva. Pene kuave’ẽmby nachembovy’ái, ha pene kuave’ẽmby pehapýva nachemboguerohorýi.

21Upévare, pende Ruete he’i: Péina ápe, Che ambosako’ipáta ko tetã kóvape g̃uarã itakuéra oñepysãnga hag̃ua, ha ho’áta umi túva ita’ýra ndive; pe óga ykeregua iñirũ ndive oñehundipava’erã.

22Péicha pende Ruete he’i: Pema’ẽ porãke, oúta peteĩ tetã yvatéogui, peteĩ tetã ndetuicháva opu’ãta umi mokõi yvy apýra guive.

23Ipópe ogueru iguyrapa ha ijyvyra puku akua; iñarõ hikuái ha ndoiporoporiahuverekomo’ãi; hyapu ha okororõva ku yguasúicha, kuimba’ekuéra ikatupyrýva ha oñorãirõkuaáva ou Sion távape ojeity hag̃ua hi’ári.

24Ñahendúma herakuãguasu, ha ñanemokangypa voi, ha ore roryryipa ku kuña imembymbotávaicha.

25Aníke pesẽtei pende kokuégui, ha aníke peikótei umi tape rehe; umi ñanderehe ija’e’ỹva ikyse puku reheve ou oporomongyhyje ha omosarambipa hag̃ua.

26Che retã, ejeku’a jokua, eñemonde ao vosakuépe (ao hũvape), ha ejapajeréi tanimbúpe; eñembyasy ha ejahe’o, pe kuña imenave’ỹva ojahe’o háicha omano ramo imemby ha’eñomíva ha hasẽva py’a ñembyasýgui; cháke, upe ñanembyaítava pya’e oúta ñandeári.

27Ñanderuete he’i chéve: Che romoĩ ndéve reipy’ara’ã hag̃ua che retãme ku óro mbohykuháraicha, nde reikuaa ha reha’ã hag̃ua ijeguata.

28Ha’ekuéra oñemoĩmba Ijára rehe ha oñe’ẽ vai reisénte, ipy’a hatã ku brónce ha hiérroicha, oñemongy’apa hikuái hembiapo vai rupi.

29Pe mba’e ohatapyñáva oipeju porã ha tata hakuete ramojepe pe plómo mbohykuhára omba’apo reíta ndojeiséigui umi mba’e ky’a plómogui.

30Óro morotĩ mombopyre oñembohérata che retã, Ñanderuete voi omombo haguére Judápe.