Apostolkuéra 18 - Biblia en Guaraní - ?anderuete ?e’? Por? 2015

Páblo oho Coríntope

1Ko’ã mba’e rire, Páblo osẽ Aténasgui ha oho Coríntope.

2Coríntope Páblo ojohu peteĩ Judayguápe hérava Aquíla, Pontoygua, hembireko Priscíla ndive, ou ramóva Itáliagui. Itália retã ruvichaguasu Cláudio omosẽukágui opaite Judayguakuérape Rómagui.

3Páblo opyta hendivekuéra, omba’apógui avei hikuái Pábloicha cárpa apohára ramo, upe ára guive omba’apo oñondive.

4Páblo omombe’u opaite sábado árape Ñanderuete rógape Hesu Crísto evangélio, oñeha’ã ogueroviauka hag̃ua Judayguakuéra ha tetã ambueyguakuérape.

5Sílas ha Timotéo og̃uahẽvo Macedóniagui ojohu Páblope omyasãiva kyre’ỹme Ñanderuete ñe’ẽ, oikuaaukávo Judayguakuérape Hesu ha’eha pe Crísto.

6Judayguakuéra oñemoĩgui hese ha oñe’ẽvaígui Hesu Crísto rehe, Páblo oityvyro ijao ha he’i ichupekuéra: Pende ruguy to’a pene akã ári. Che chepotĩ, águi rire aháta tetã ambueyguakuéra rendápe.

7Ha osẽvo ijapyteguikuéra, og̃uahẽ Tício Jústo rógape, ha’e ningo omomba’eguasúva Ñanderuetépe, ha hóga opyta Ñanderuete róga ykére, oñembyatyhápe umi Judayguakuéra oñemoĩmava Páblo rehe.

8Críspo katu, pe oñangarekóva Ñanderuete róga rehe, ojerovia Hesu Crísto rehe opaite hogayguakuéra ndive. Heta Corintoygua ojapysaka porã Páblo ñe’ẽ rehe, upéi ojerovia ha ojebautizauka avei.

9Upe pyhare upévape Ñanderuete oñe’ẽ Páblope techapáype ha he’i: Ani rekyhyje, eñe’ẽ ha emombe’u uvei Hesu Crísto evangélio ha ani rekirirĩ.

10Che aĩgui nendive, ha avave ndojapomo’ãi nderehe mba’evai, che areko heta ojeroviátava cherehe ko táva kóvape.

11Páblo opyta peteĩ áño ha 6 jasy Coríntope, ha ombo’e ichupekuéra Ñanderuete ñe’ẽ rehe.

12Gálion, oiko ramo Acáia departaménto ruvicha ramo, Judayguakuéra oñemoĩ joa Páblo rehe, ha ogueraha ichupe mbojovakeharakuéra rendápe.

13Ha he’i hikuái: Ko kuimba’e kóva ombo’e tetãyguakuérape omomba’eguasu hag̃ua hekope’ỹ Ñanderuetépe.

14Ha Páblo oñe’ẽ ramo, Gálion he’i Judayguakuérape: Ojehu ramo peteĩ mba’evaiete pende apytépe katuete che ajapysakáta pene ñe’ẽ rehe,

15nambojovakemo’ãi katu pene rekombo’e, térã pende Jára rembiapoukapykuéra. Umi mba’e peẽ voi pehechakuaava’erã. Ko mba’e kóvape g̃uarã ndaikoséi pene mbojovakehára ramo.

16Ha omosẽ ichupekuéra pe mbojovakeha rógagui.

17Ojapyhy hikuái Sóstenespe, pe oñangarekóva Ñanderuete róga rehe, ha oinupã ichupe mbojovakeha róga renondépe. Upéva katu mba’evete Gálionpe g̃uarã.

18Páblo katu hi’are gueteri heta ára Coríntope. Uperire oñemomaitei paha ha oho bárcope Priscíla ha Aquíla ndive Síria retãme. Cencréape Páblo oñemoakãperõ ojapo hag̃ua iñe’ẽ ome’ẽva’ekue (ivóto) Ñanderuetépe.

19Ha Páblo og̃uahẽvo Efésope oike Ñanderuete rógape oñemongeta hag̃ua Judayguakuéra ndive, Aquíla ha Priscíla katu opyta Efésope.

20Umi Judaygua ojerure asy ramojepe Páblope opyta aremive hag̃ua hendivekuéra, ha’e ndopytasevéima.

21Ojeívo he’i uvei ichupekuéra: Aju jevýne pene rendápe Ñanderuete oipota ramo,

22ha oike peteĩ barcoguasúpe oho hag̃ua Cesaréa peve, ha oguejývo barcoguasúgui oho Cesaréagui Jerusalénpe, ha omomaitei rire upepegua hermanokuérape oho Antioquía, Síria peguápe.

23Upépe hi’aremi rire oho jevy Galácia ha Frígia departamentokuérape omokyre’ỹ hag̃ua hermanokuérape.

Apólos oñe’ẽ Efésope

24Apólos, peteĩ Judaygua onaceva’ekue Alejandría, Egípto retãme, og̃uahẽ Efésope, ha’e ningo peteĩ kuimba’e oñe’ẽkuaáva, iñarandúva ha oikuaa porãitéva Ñanderuete kuatiañe’ẽ.

25Ha’e ningo omyasãi kyre’ỹme Ñanderuete ñe’ẽ, ipytu porã hendy reheve oñe’ẽ ha oporombo’e hekópe umi mba’e Hesu reheguáva, oikuaa ramojepe Juan bautísmo pevénte, pe Pytu Porãmbáva oguejýma hague ndoikuaái gueteri.

26Ha’e oñepyrũ oñe’ẽ kyhyje’ỹre Ñanderuete rógape oĩva Efésope, Priscíla ha Aquíla ohendu rire Apólospe ogueraha ichupe hógape ha oikuaauka porãve ichupe opaite Hesu Crísto evangélio.

27Ko Apólos ohoségui Acáia departaméntope, umi hermáno Eféso pegua omokyre’ỹ ichupe pévape ha ohai avei peteĩ kuatiañe’ẽ Corintoygua iglésiape omog̃uahẽ porã hag̃ua ichupe. Ha Apólos, Ñanderuete me’ẽmby rupi, oipytyvõ porãite Corintoygua hermanokuérape ojerovia porãve hag̃ua ohóvo Hesu Crísto rehe.

28Ohechauka porã Judayguakuérape, Hesu añetehápe ha’eha pe Crísto oñeha’ãrõvahína, omokirirĩ meve ichupekuéra.